گـال لريحانة تطيه سيف اطتهياه من الجهه الثانية وانا من شفت منظرهم هيج حلو لحيت الا اصورهم واخذت اكثر من عشر صور بمبايله 

گعـدت يمه اگلب بيهـن 

_ شووف شگد حلوات عليك الله جيب رام نحفضهن حتى لا ينمسحن

عبد الحق : ميخـالـف 

گمت على حيلي بأيدي الموبايل صاح عليَّ من شافني اريد اطلع

عبد الحق : مبايلي ولج 

_ هسة بس اشوفهن لحوريـة 

من ما سمعتله صوت خليت ومشيتلها للغرفة بساع من شافتني گعدت بصفها رفعت رأسها 

حـواري : عـدج شي أحلف مو خاليـة

مديتلها الموبايل 

_ شوفي رچلج وجهالج

باوعت الايدي مستغربـة واخذت الموبايل من ايدي بلعت ريگها من باوعت لصورتهم ضلت تگلب بيهن وبس خلصن ردته الي 

_ ما ناويـه تحنين على اخوي

حـواري : لا اخوج ابد ما يستاهل بشر يحن عليـه

_ زين ليش 

حـواري : ليش تسألون وچن هوَ ملام نازل من السما وما يسوي شي

_ ماكو زلمة بهـاي المواصفات حتى لو أخوي 

حـواري : تعبني والله طفت روحي كبرني باقل من سنه اخوج 

_ تردين لطبيعتج من تردين وياه ،مشتاگـه لگعداتكم وسوالفكم سوا 

حـواري : ما مشتاگـه لـ أي شي انا 

_ والله فد چذااابة ،مفرفح گلبج على شوفتـه 

حـواري : ما تسكتين 

ردت تمددت صافنة ،تگلي ما مشتاگتله وهيَ بس صفنتها كافيه تسولف الما تگوله هيَ گاعدين وطب فقار سلم وگـال 

فقـار : عمي وشيوخ جايين حتى يصالحون جـدي                     

نجوى : يااا عليك الله 

فقـار : أي والله بس مو وكتهم ابد 

شيماء : عسـاهم لا تصالحوا

عوزنا ظيم فوگ ضيمنا 

صفن عليها فقار مستغرب وعمة گالتلها 

نجوى : ياا ليش هيج تحجين خيـة

شيماء : جا اذا تصالحوا راح تطب علينا بت غازي ونرد مثل گبل 

نجوى : واذا طبت حالها من حالنـة

شيماء : ماكو حالها حالنه ،هيَ بت غازي مو بت أي واحد 

بحيرة گالتلها

نجوى : والله حيرتيني ما اعارف شگلـج 

شيماء : لا تلوميني خية محترگ افـادي على ابني صار شگد اريدلي خبر عليه يريح گلبي ماكو 

نجوى : حگـج 

ضلينا گاعدات ساعة هيج وردينا اول ما طبيت گابلت كتبي وثاني يوم هستوني نزلت من الخط ولاگتني هنـد عبرتها اريدن اطب بس ردت وگفت گبالي 

هنـد : بس احجي وياج بساع 

_ مستعجلـة 

هنـد : حتى انا بس اريد اوصلج حجايـة حلفني اوصلها 

چتفت ايدي 

_ أي وشني هيَ

هنـد : اخـوج مو عدنا وروح أمي وأبوي لا تحاسبيني على شي ما مسويه ولا النه ايـد بيه هذا حجيه وگال اوصله الج

_ ولازم اصدگ

هنـد : بعد بكيفـج

_ ما راح اصدگ لان ماكو غيركم اله ايد بأختفـائه 

هنـد : صدگي مو عدنا لان اول شي چان عرفنا احنا

ما رديت عليها وخليت ومشيت افكـر ويَّ روحي اذا مو عدهم وين ومنو اله مصلحـه بهل شي غيرهـم

بس رديت للبيت شفت امي تريد تطلع ومن سألتها وين گالت 

شيماء : ناخـذ حواري للساده مو گالوا جيبوها ورا الچياب 

_ جا انا وين اضل

شيماء : بدلي هدومج وأمشي وياي ضلي يم البنات 

_ خوش 

°حـواري°

دگيت عنـاد ما امشي اذا هوَ ويانـه 

نجوى : ولج يمة زحمة من عمتج ،امشي ولا تحجين وياه 

_ جا عبالج احجي وياه لا والله 

نجوى : دلبسي عباتج لخاطـري

تأفأفت وجريت العباة معلگـة لبستها وطلعت مطنگرة بس شافتني عمة گالت 

شيماء : هاا الله هـداج 

_ والله عمة ما احجي وياه لا عبـالج 

شيماء : بكيفـج عمة بس امشينا تأخرنـا 

گامت وانا وامي لحگناهـا وبس شافنة طلعنـا صعـد بالسيارة بعد ما چان واگف يسولف ويَّ صخر صعدت وراه دايره وجهي اباوع من الجامة الدرب كلـه ساكته حجاية ما حجيت وهوَ يحجي ويَّ امي وامـه طبيعي وبس وصلنه نزلت ورا امي امشي مدنگـة بين الخايفة وبين لا اريد اخلص من كلشي عشتـه طبينا وچان اكو ناس گبلنا بس انتبه علينا السيـد من بعيد كال

_ تعالوا گعدوا هنا 

أشر على مكـان قريب عليه گمنا وبس حق ضل بمكانـه لان المكان البيه احنا كله نسوان طول الفتره الگاعدة بيها احس بخنگتي تزيد ومن صار وكتي گمت گعدت گبال السيد وحق اجه وگف وراي حط ايده على راسي يقرأ عليَّ بصوت خافت روحي رادت تطلع دموعي وحدها صارت تصب وما صدگت يخلص 

وخر ايده من رأسي

السيـد : راح اطيكم اوراق احرگوهن وكت المغرب وبطاسة تخلوهن فوگاهن مـاي تغسل وجها بيهـن

نجوى : يعني بطل العمل سيد

السيـد : بعـد تجيبوها الي مرتين اقرا على رأسها عملها قديم ويحتاجله وكت الا يبطل 

تشكروا منه وطلعنا خاوية روحي چن شوف شصار وهوَ بس قرأ على رأسي صعدت بالسيارة لعبان نفس عدي احس اريد ازوع شكو شي ببطني ومن وصلنـا نزلت اسحل بروحي راد يسندني وجريت ايدي منـه ما راضيه بقربـه وبس طبيت تلگني البنات حجاية ما گدرت احجي بوجهي للغرفة بس نزعت العباة والحجاب تمددت چن الدنيا جاي تفتر بيَّ ويوم عن يوم بديت اتعب اكثر حتى الجهال ما الي خلگهـم و دم ضالين عد ريحانة وهيوفـة وامي وياهن

طلعت من الحمام امشي بلايه روح گبالي ريحانة تفتر شايلة حوراء فتحلها ايدي تطينياها صار چم يوم ما شايلتها اخذتها منها ابوسن بيها 

ريحانـة : ما جعتي اسويلج شي تاكليـه

_ لا كلشي ما اريدن 

نجوى : جا شلون يمة تضلين هيج

_ چا شبيدي انا

سكتن حايرات وانا گعدت افل گماط حوراء أبتسمت اباوعلها شلون تمغطت فلا تحب الگماط وبالتواسيل نگمطها 

هيوفـة : صباح الخير 

رفعت راسي على صوتها ،ردينا عليها وهيَ اجت يمي تسأل شلون صرت لان امس تخربطت 

_ احسن بس احس بروحي مخلوبـه مني 

نجوى : جا شلون يايمة غير هذا عمل مو لعب چعـاب

هيوفـة : ضالـه تحوس بگلبي اريدن اعرف مني هيج تسوي

نجوى : والله حتى انا

ريحانـة : السيد گـال على أثرها مو

نجوى : أي 

صفنت صفنـه طويله خلتنا نركز وياها 

نجوى : شكوو ريحانة وين راح بالـج

ريحانـة : هذا العمل چنت انا المقصودة بيه يمة

نجوى : شلون ولج

ريحانـة : تذكرت انا مرة من المرات لبست شالها ورحت لعيالي وچـم يوم والشـال اختفى حتى خسرتلها شال ببدالـه 

لطمت على خدوها امي تحجي وياها وانا فصلت مو يمهن افكر ليا درجـة من القذارة وصلن 

نجوى : يااا وليش هسة الا حجيتي

ريحانـة : هسة تذكرت ،بهذيج الفترة ما چان عدي خلگ حتى افكـر 

نجوى : يااايمة شلون يسون هيج

ريحانـة : هنَّ هذن على اعمالهن زين وطولت يمهن ست سنين 

هيوفـة : الله يغضب عليهن شني من بشر 

_ بهذاك الوكت چنتي حامل يعني لو صاير بيج شي 

ريحانـة : أول وتالي حصلن اليردنه لا ابني ضل ولا رچلي 

تحسرت وگـامت ما گدرت تضل گاعـدة وبالروحـة الثانية تعبت اكثر بحيث طلعت وطحت لومـا حـق گدامي وكضني چان تفلشت بنص الشارع 

كضيته من چتفـه سانده روحي عليه والدنيـا تفتر بيَّ

عبد الحق : حوريـة ،شبيج حاجيني 

يرد احجي وانا مغمضة عيوني النفس بالگوة أچره اخذني للسيارة وفتح بطل الماعي غسل وجهي ،شهگت بقوة ورچفـة صابتني كض فچـي لان شويَ وبعد سنوني يتكسرن 

عبد الحق : جرري نفس ،راح يوگف گلبج 

اناشغ وهوَ مخبوص بيَّ وامي گبالي تبچي امـه ما اجت ويانه يوم عن يوم جاي تتعب صحتها روحي شويَ وحسيتها راح تطلع 

عبد الحق : اشربي ماي هـاج 

اخذت البطل من ايده بالگوة بللت ريگي وبمعجزة الا هديت عدل حجابي يحجي وياي 

عبد الحق : هاا نمشي

هزيت رأسي بـ أي رفعت رچلي وكعدت عدل جوا ومن وصلنا نزل سندني ماعدي قابليـة اگله وخـر وهوَ شافني ساكته استغلها فرصـه

°غايـة° 

حطيت دولكـة الماي بالگـاع يم الصينية ورفعت راسي من گال جدي 

رأجس : امشي صيحي چدتج 

ليث : انا صحتها وما رضت تجي 

رأجس : امشي غاية گليلها يگول جدي تعـاي لا تصير مو حلوة 

وبس گتلها هيج يگول جدي علت صوتها تسمعـه 

غضـة : خلها تصير مو حلووة وروح أبوي ما اگعد وياه فد صينينة 

_ فدوة جدة نصي صوتج لا تصير طلابـة 

غضـة : وخلها تصير شني لشوكت يضل هيج بلاية گلب 

درت على الباب من انفتح واجه جدي 

_ ديلا جدة هيج احسن 

غضـة : وروح أبوي يا أبو محمد اذا ما تصالح كاظم اخليك تطلگني 

طب نوح وگف بصفي وجدي يباوعلها بغضب 

نـوح : جدة مصدگـة روحها وتريد تطلگ ما تدري زواجهم صار اكسباير 

غطيت حلگي مبتسمة اخافن لا أحد يشوفني واترزل

رأجس : اذا ضليتي بهذا عنـادج وحگ الخلقني اوديج الاهلج 

غضـة : هااا يعني العنـاد بس الك حلال موو

رأجس : لا اله الا الله والتالي وياج

غضـة : صالح كاظم ورده للقريـة

رأجس : تحلميــن 

غضـة : جا بعيني اذا ما اهدلك البيت وأمشي شوف 

رأجس : اذا لگيتي احد ياخذج الله وياج 

غضـة : جا ما اعارفك موصيهم عليَّ بعلي اخلي واحد من ولد اخواني يّجيني 

رأجس : خوش الله ويـاج

طلع وخله جده تشيل روحها وترگعهـا گعد أبوي يحجي وياها 

محمد : اطيـه صبر يمه أبوي ما يحب احد يحط رأسه وياه مو تعارفينه شني 

غضـة : شأصبر ولك سنين صااار وانا صابرة ما حن ما گـال ابني خطية 

محمد : هذا أبوي وهـاي طينته مو جديد علينـا 

طلع من صاحـه جدي توسلت بيها تاكل وما رضت تطلع وبالگوات اقتنعت اجيبن اكلها هنا اكـلت انا وياها وباليل اجونـه شيخ واحد و وياهم چم زلمـة علمود سالفـة چعفـر الضاله لهسه ما معروفة تاليتها شني

طب من برا فحطـان جر دولكـة الماي يشرب منها 

علي : خررب اهلك السكـر لعبت روحي منـه 

_ سامعـة انا اهل السكر حتى سنونهم تطيح 

علي : واصير ادور ثوربـه 

ضحكت ودرت عليه 

_ الثايب علي ابن ثمير 

ضحك يريد يسكت ما يگدر وفز مندار على عزيز من طگـه على رگبتـه كضها متوجع

علي : شبيك هيَ هيييج كافي عليَّ ابووي 

عزيز : نريد نسويك زلمـة 

علي : أنتم كافـي 

عزيز : طيح الله حضك 

علي : مشكور مشكور 

مشى فتح الثلاجـة يدور ماي بارد من ما لگـه حاجاني 

علي : هاي عود ليش ما عدكم ماي

_ غير شتـا شنسوي بيه بهالبــرد

علي : انا اريدن ماي بارد بعد علمودي حطوا 

هزيت رأسي 

_ تدلل 

علي : عفية عفية 

وبس طلع علي دنگت راسي من شفته يتقدم عليَّ ضليت حايرة وين اديرن عيوني منه وگف گبـالي

عزيز : شو باوعيلي

رفعت راسي وباوعتلـه ورديت بساع دنگـت بس انتفضت من گـال 

عزيز : تلعب روحج مني

حطيت عيوني بعيونه اهز رأسي 

_ لا والله لا 

عزيز : يعني ما ضجتي لان تشوه وجهي

_ انقهرت عليك لان تحب شكلك 

عزيز : بس هيج

هزيت رأسي بـ أي 

_ ما غير منك شي الحرگ أنتَ نفسك عزيز 

أبتسم ودار بساع على الباب من حس احد اجـه متت من الخوف من شفتـه صخر بس بساع هوَ غير الموضوع حتى ما يخليه يحس

عزيز : اريد گلاص جاي اذا ماكو زحمة 

نسيت شنو ارد ومشيت بساع صبيتله واطيته طب صخر مزغر عيونه ويباوعله 

صخـر : شعدك هنا

عزيز : مايصير اطبن

صخـر : لا يصير يصير غايـة 

_ هاا 

صخـر : طبي جوة 

طبيت ارچف وبس شافتني ميمنة حست اكو شي جرتني تسأل شصاير وانا حجيتلها كلشي 

ميمنة : مايصير توگفين وياه 

_ والله لان هيج گالي وحجيت تعارفيني شنو انا ما ردت يفكر بشي انا مو ببالي 

ميمنة : حگـج بس لا تعيديها

_ لا والله التوبـة

خلصت الگعدة ومثل كل مرة ما صار حــل الايـام تمشي بدون انتظار وكل يوم محسوب من عمرنـا وبيوم حاله حال باقي الأيام چنـه گاعديــن وطب صخر وما اعارف شلون باوعت وراه 

من الصدمـه گمت على حيلي اباوعلها ما مصدگـة هـاي چفــون

°نسمـات°

صعـدت بالگوة ارفع رچلي من الوچع بأيدي الصينية وأمشي ثگلانه عليَّ روحي من التعب فتحت باب الغرفة وطبيت گعدت گبالها بهل وكت ما عدي احد اشكيله همي غيرها 

جريت نفس طويل وبصوت هموم الدنيا كلها بيه گتلها 

_ شوكت تطيبين تعبت وحدي ما عدي سنــد اليسندني انذليت هواي انسكرت هواي وتعبت روحي من كلشي جاي اعيشه اصحي وهوني عليَّ هذا الظيم 

تباوعلي ما مفتهمـة شي من الجـاي اگولـه 

_ انا بحاچتج احسن روحي غريبة بيناتهم ماعدي اليدافعلي لو انزمخ بيَّ

_ شبيج

كلمة وحدة خلت دموعي تنزل ما مصدگـة شهگت 

_ گولي شنو المو بيَّ تعبت والله لخاطرج ضالـه هنا لو بوعيج ما چان ضليت لحظة عدهم 

_ روحي 

_ وين اروح واخليج منو الج هنا

_ ميخالف 

_ لا مو ميخالف اكلي

قدمتلها الصنينة حتى تاكل وگعدت اباوعلها والف سالفة ببالي منا لمن گضت اكل وما گدرت تاكل هواي اخذت الصنينة ونزلت گبالي صارت زينة لطمت مصدومة 

زينـة : عود صدگ بعدج ما محظرة روحج ولج الناس على جيه هسة 

كملت دربي ووگفت گبالها 

_ انا ويني وين هل سوالف ما اريدن لا زواج ولا شي 

زينـة : جا شني ضلتج هنا ما مليتي 

_ شلون ما مليت بزعت روحي بس ما اريدن اعوفها 

زينـة : انا يمهـا

_ ما اگدر والله 

زينـة : هسة تحظري والله يحلها 

بعد ملحة منها صعدت بلايه واهس بدلت بشداشة حلوة ومشت شعري الصبح سابحـة حطيت عطر ونزلت بس شافتني فكت عيونها مصدومـة

زينـة : وجهج چن وجه ميت صدگ تحجين رايده تطفرين الوام لو شني

_ جا شتردين احط مكيـاج

زينـة : لا عاد بس حمرة شويَ 

_ يمعودة خليهم يشوفني على طبيعني 

زينـة : انعل أم الطبيعة اذا هيج 

ضحكت وهيَ تعصبت اكثر من شافتني ما مهتمة وسويتها صدگ وطلعت للنسوان بهذا شكلي وكل ضني راح يغلسون بس صار العكس من اجه أبوي بالليل وگـال 

غافـر : خابرني أبو حكيم وگـال باجر يّجي الولد يشوف البت 

عمي اعترض ما راضي وابنه من مكانـه گمز يصيح 

علاء : انهي عليها وما اخيها تطلع للغريب 

صاح بيه أبوي 

غافـر : شني تنهي بكيفك أنتَ

علاء : جا بت عمي اوله بيها من الغريب 

غافـر : على السوابق العدك تحلم اطيكياها 

وابوه تخبل من أبوي هيج حجـة وگبت لليل ما فضت وتدخلوا بيها عمامي الباقين وانا ضاله بس اباوع بعيوني 

ندستني

زينـة : هذا صدگ عود يحبج

_ لا هذا فد واحد حقير يريد يكسر خشمي 

زينـة : أي مو اگولن وينه وين الحب هذا بس تلوگله سوالف العربده والطياح حظ 

والفجر گعدت حتى اسوي ريوگ لابوي بس شافني گال ما راضي 

غافـر : شعـدج گاعدة انا اتريگ بالطريق 

_ لا شلون 

سويتله الريوگ وگعدت يمه ياكل ويوصيني على روحي مثل كل مرة واطاني مصرفي ومن مشـى طلعت وراه رشيت دولكـة ماي وطبيت بوجهـي فوگ حتى اردن انام وهستوني غفيت وحسيـت بـ أيد تمشي على جسمي فزيت مروعبـة وما لحگت اعيط وانسد حلگي 

°كوكبـة°

ثانـي يوم من ضلتي هنا ،ويَّ أذان الظهر السمعتـه من المسجد انفتح الباب فزيت اوگف على حيلي وطرت من گال الشرطي

_ اخوج برا امشي تشوفيـه 

طلعت وراه اللبس بعباتي وچن ردتلي روحي من شفتـه بس شافني فتح ايده ،شمرت روحي بحضنه احلف بيه 

_ لا تبقيني هنا الله عليك طلعني 

سعـد : اطعلج والله بس اصبريلي 

وخرت مستغربـة من كلمة اصبريلي 

_ يعني ما اطلع اليوم

سعـد : صعبـة شويَ بس تتنازل خالتج 

غورگـن عيوني مأيسة 

_ فرصـة ولگتها عليَّ راح اخيسن هنا 

سعـد : منتظر واعدني يخليها تتنازل 

_ ما يگدرلها 

سعـد : لا يگـدر 

بس خلصت الوكت جبروني ارد رديت للزنزانـه وگعدت ابجي على ايامي الراح تجي ومن الخوف كلساع وجايني مغص ببطني بالليل زاد عليَّ وكل ضني راح اجيب عيطت ميتة من الوجع اريدن احد يسمعني 

_ الحگووولي بطنييي

گعـدت ما اتحمل الوجع بعد ارچف رچف طبلي شرطي يسأل شبيج ومن انتبـه على بطني طلـع يركض اخذوني للمستشفى بدوريـة كاملة وبس شافتني الدكتورة گالت 

_ لا تخافين هاي مو أعراض ولاده بس تقلصات قوية عدج تحتاجين راحة وهم اطيج مكسنات 

حاجيتها وانا مستهضمة على روحي 

_ يا راحة هاي دكتورة وانا مسجونـة 

باوعتلي مقهورة على متعاطفـة وياي 

_ الله يفـرجها عليج امي 

_ أن شاء الله 

مسحت دموعي وگمت وبس طلعت شفت سعد واگف اجاني يسأل شبيج 

_ تقلصـات عـدي ما جـاي يهدني راح اموتـن

سعـد : ما كتبتلج دوه

رفعتلـه الراچيتـه 

_ أي 

اخذها مني 

سعـد : راح اجيبه الج واجي 

طلع هوَ وانا ضليت واگفـه محاوطيني الجنود وبس جاب العلاگه اخذوها منه فتوشها واطونياها رديت وياهم والخنگـة ردتلي

متمددة عيوني ع السگف وطفرت على صوت القفل من انفتح 

الشرطـي : گومي طلعتي برائـه 

شهكت اردد 

_ عليك الله 

الشرطـي : اهلج برا 

خله الباب مفتوح وطلع گاعـي احس ما تشيلني بعد من الفرحة وبس طلعت صاروا گدامي 

سعد ومنتظـر واگفين يحجون ويَّ الضباط مشيت يمهم وگفت بسد أخوي اريد نطلع بساع گبل لا يصير بعد شي ويگلولي ردي وبس طلعنا انا گبلهم صعدت بالسيارة وبس اجوي گتلهم

_ شلون قبلت خالتي تتنازل

اندار عليَّ وسعد شغل السيارة

منتظر : انا خليتها تتنازل 

_ وقبلت 

منتظر : مو بسهولـة 

اندار يباوع للدرب ومن الباب تلگتني سكينـة حضنتني لا هيَ مصدگـة رديت ولا انا 

_ متت والله ما صدگت ارد گلت هاي هي راح اعفن بالسچن 

وخرت تحاجيني 

سكينة : شلون تعفنين اذا سعد ومنتظر ليل ونهار يركضون حتى تطلعين 

_ والله 

سكينة : أي والله 

انداريت من اجـه صوته وراي 

سعـد : يلا طبن جوا 

طبينـا انا وياها وهوَ رد طلع يم منتظر ومن تلگتني عرفت الأيام الجاية مو سهلة عليَّ هنا 

ناديـة : لا هلاً ولا مرحبا اجت المجرمة أم السچون 

بلعت ريگي بخصـة ما اريدن اصير طلابة من اول دقيقة من طبتي غلست على اعصابي وهيَ ضلت تحجي وراي گلبها محمل عليَّ بوجهي للغرفة طلعتلي هدوم بس اريدن اسبح احس روحي خست

سكينة : بين ما تسبحين راح اصبلج من الغدا تاكلين 

_ ياريت ،كتلني الجوع هناك 

سكينة : ليش ما يطون اكل

_ لا يطون بس حشـه نعمة الله 

سكينة : مو طيب

_ اكل سچن تردينـه طيب 

ضحكت 

سكينـة : هم صدگ 

هيَ طلعت وانا سبحت ورديت للغرفة بعدني امشط وطبت 

سكينة : تعـاي اكلي 

_ بس اخلص شعـري 

سكينة : يمعودة يبرد الاكل 

_ اذا يبس شعري بعد شيمشطـه

سكينة : ديلا بساع

_ معجزة يراد اذا شعري يتمشط بساع 

گعـدت تباوع عليَّ وانا امشط والاكل صار ثلج الا خلصته اكل واحجي وياها على ايامي اليمكن ابد ما انساهـن بالليل طلعت من الغرفـة مختنگـة افتر بالبيت هدوء وماكو احد رچليه اخذتني للباب الثاني من البيت فتحته وانا اباوع للسما اشتم الهوا البارد واردد ويَّ روحي 

_ شوكت تستقر حياتي مو كافي 

طلعت وسديت الباب امشي مشية مختنگ يريد بس يلگاله مكـان هواه طيب وانا ما عدي غير الشط مشتاگة لگعدتي هناك وبس وصلت قريبـة عليه بلهفة سرعت خطواتي وگعـدت ماده رچلي بالماي البارد فتحت شالي بس خليته على رأسـي 

ادور بعيوني على الطوطة تعودت كل ما اگعد هنا اشوفنها بس ما چانت اكو انداريت وراي ابـاوع من صار عدي احساس اكو احد وراي 

لميت الشال على رأسي وگمت على حيلي متانيتـه يحجي وهوَ ساكت سكوتـه صعب ينوصف اشبـه بسكوت بشر چانت فوضى برأسه وهـدت فچـــاه

كوكبة°

غمض عيونه ورد فتحهن وبچرة نفس واحد مختنگ مشتاگ گال

ليث : شگد ردت اشوفج وأنتِ ماكو

_ ما جاية الاهلي

ليث : كل هل مدة

هزيت رأسي بأي ورديت گلت

_ بالاصل ماعدي احد يستاهل اجيله

ليث : ليش وانا

_ أنتَ

ليث : بس ردت اشوفج بخير وهاي هيَ

كمل حجاياته وگعد من حس عليَّ ضليت واگفه التفت

ليث : اگعدي

تقدمت گعدت بعيد عنه بمسافة زينة باوعلي ودنگ باوع لبطني المبينة كلش

ليث : شنو بيج

_ ما اعرف

ليث : شلون ومبين عليج بأخر اشهر

_ صح ،بس ما ماشية للدكتورة

ليث : ما ياخذج

هزيت رأسي ب لا ودنگت بس من سمعته حجه رديت اباوعله

ليث : شيصير لو اول طفل الج أبني

درت وجهي منه اريدن احجيله عن العذاب الجاي اعيشه واسكت لان مبين البيه كافيه بس هوَ حس اكو حجي عدي

ليث : اكو شي صاير وياج

هذا البشر كلما يسألني عن شي ما اگدر اكضن دموعي من نبرة صوته الحنينه

ليث : ليش البجي كواكب حاجيني بيج شي

هزيت رأسي بلا ومسحت دموعي

_ گول شنو الما بيَّ تعبت جاي اعيشن عيشة مو عيشتي

ليث : أنتِ وياه

_ انا وياه لو امه جروحي چبيرة والحجي يزيد وجعهن

ليث : تلطگي

بدون سابق حجاها وچن اكو شي براسه

_ وين اتطلگ ابوي يذبحني گبل لا حتى افكر ما صدگوا يخلصون مني مو نوبه اردلهم

ليث : ما ترديلهم اخذج انا

صفنت بوجهه حايرة وانا بگلبي افكر معقولة بعد الصار مرتضى يردني لو يطلگني واخلص منه حتى لو اردن لظيمي ولا الظيم الشفته عده

فترة سكوتي هو ما حجه ابد ضال بس يباوعلي مثل بشر ما مصدگ الگباله حلم لو علم گمت على حيلي اريدن ارد گام وگف بساع يتلفت هستوني مشيت وحسيت بيه چرني طابگ ضهري ع الحايط عيونه مو يمي بأستغراب يباوع نضراتي لمكان نضراته وجهتهن اشوفن شكو وشني الشي الخلاه هيج يتصرف

_ ليث شك..

ما خلاني اكمل وسد حلگي بايده وبصوت ناصي يهمس

ليث : اششش

رد يباوع وعگد حاجبه وچن نضراته تشتتن وخر ايده ورد ليوره عيونه عليَّ

_ شكو ليث شبيك

ليث : ما اعارف يتخايلي لو صدگ بس شفت احد يفتر هنا

_ اكيد ولدكم

هز رأسه بلا

ليث : ولدنا ما يتلثمون هذا غريب دايس اراضينا

_ هاا

ليث : امشي اوصلج

_ لا انا امشي

ليث : امشي كوكبة گدامي

بس وصلني عد الباب رد بلايه حتى ما يحجي طبيت بكل هدوء امشي بغرابه بدت تمشي الايام مابيهن أي تغيير ،ومن طبيت بشهري الثامن عارفت بي ولد بين الفرحانة وبين لا مقهورة ليا ظيم راح اجيبه جهزتني سكينة من كلشي احتاجه وبس طبيت ببداية شهري اجاني الطلوگ شفت الموت بعيوني عشت معناة ما انساها تعسرت ولادتي وطبيت للعمليات ابچي خايفة لا يطلع صاير بأبني شي وما يگلولي

تمددت ع السدية ودكتور التخدير يحجي وياي حتى يضيع من خوفي

_ شگد عمرج بابا

_ 19

_ هذا أول جاهل الج مو

_ أي

فزيت من خلالي الكاونة وشويَ شويَ بديت احس بجفوني تثگل غمضت مو بأرداتي ومِن فتحت عيوني چنت اردد

_ ابني وييين جيبووه

واسمع صوت غريب يمي يگلي

_ ابنج بخير

رديت غمضت وبعد ما اعارف شني الصار الا من وعيت كلش سعد وسكينة يمي و وياهم امي چانت جاية من لا جارة وبس شافتني فتحت گالت

نادية : انا راح امشي للبيت ضلي وياها أنتِ

سكينة : صار

ما احد بينا منعها لان مبين امي ما تريد تضل ويَّ بتها الوحيدة بشدتها هاي بس طلعت گلت لسعد

_ جا ابني وين

سعد : بالخدج گالوا بس يستقر نفسه نستلمه

_ عليك الله مابي شي

سعد : لا والله گبل شوي چنت عده

_ حلوو

سعد : يشبهج

_ والله

أبتسم

سعد : أي والله

اجت گعدت يمي

سكينة : حلو بس ناعم

_ شمتاني ما يطلع ناعم على الظيم الشفته وانا حامل بيه

سكينة : أي والله صدگ

لليل طب سعد فزيت من شفت بأيده ابني صحت لسكينة گعدتني وهوَ اجه اطانياه بين ايدي شلته ما مصدگة هذا هوَ گبال عيني سالم وكامل الخلقة

سكينة : اللهم صل على محمد وآل محمد شوفي شگد حلو

باوعتلها ورديت عيني عليه وأول مرة أبتسم من كل گلبي بعد ذيج الاشهر كلها اجه گعد بصفها حضنها لصدره

سعد : بس تطيب كوكبة نمشي لايران ولا تعاندين

باوعتله وهزت رأسها بأي بأستغراب سألتهم

_ شعدكم بأيران

سعد : نتعالج

_ اممم ،اطفال انابيب ؟

هز رأسه بأي

سعد : بس لا تحجين گبل السفر بچم يوم انا اگول الاهلي

_ خاف ما يقبلون

سعد : هل شي يخصني مو يخصهم موافقتهم ورفضهم ما يغير شي

سكتت ودنگت ابوسن ابني الضال لهسه بلايه اسم

_ صدگ سعد منين جبت العقد

سعد : منتظر جابه الي هوَ وچنسيتج وچنسية ابوه

_ وابوه وين

سعد : ما سألت لان ما يفرق عدي اول وتالي راح اطلگج منه

زغرت عيوني متفاجئة من قراره

_ تطلگني

سعد : ليش ترديه

هزيت رأسي بلا

سعد : الزلمة الما وگفلج بهاي الشده حرامات تضلين على ذمته وهوَ صار اشهر ما سأل عليج

_ بس انا دچيت امه

سعد : يعارف أمه شني كلش زين بس هوَ يدير عيونه عن الحگ

مبين هواي ضايج من مرتضى بگلبي دعيت من صدگ اخلص منه وبس طلعت من المستشفى ثاني يوم انگلب كلشي بچية خالتي

طبت سكينة باهته اشرت على الباب

سكينة : هاي بيبية أبنج هنا

وسعت عيوني

_ خالة بشرى

سكينة : أي ولج

_ شجابهااا

ضميت ابني بحضني موسعة عيوني خايفة لا تاخذه مني وبنفس الوكت انفتح الباب وطبت هيَ وامي حرت شني الاحجي وياها من اجت جرته من ايدي بلايه ما تحجي وياي حتى دارت لامي

بشرى : ابن ابني ما يربا بعيد عن ابوه اذا ما ترد اخذه وياي

نادية : لا شني ما ترد بس تطيب عمليتها تعالوا اخذوها

_ ما ارد

خزرتني امي وخالتي بكل برود تحجي وياي مبينه ما طايقة شوفتي بس جاية عناد حتى تغيضني

بشرى : جا اخذ الولد وضلي أنتِ هنا لا تردين عاد ما ميتين على شوفتج احنة

جريته من ايدها متغاضية عن وجع بطني الصار من طفرت من مكاني نترت راصه على سنوني

_ ما اطي ابني

بشرى : نشوف منو الما تطي

حجت هيج وطلعت خلت روحي تفور گعدت ونزلته من ايدي ع الدوشگ كضيت بطني ادعي عليها من كل گلبي

_ الله ياااخذج ويخلصنا منج ومن شررج بلاء اسووود وطاح على راسي أنتِ وابنننج

گعدت گبالي تسكتني تتوسل لا يعلى صوتي اكثر بعد وانا مفرفحة

سكينة : عليج الله اسكتي ولج مابينه حيل الطلايب وخالتج مبينه جايه تريد تعلگها

جريت نفس عيني على الصار ضحيه اكثر مني اخذته سكينة وانا تمددت عيني على السگف الايام تمشي فتحت خياط العملية والعصر بس أجيت ما اجت بس خالتي چان مرتضى وياها كره الدنيا كلها انچمع بگلبي من سمعت صوته برا هسة تذكرني وين چان بأصعب يوم بحياتي

ما گمت حتى من طبوا ابني بحضني ضليت اباوعلهم برزانه اليشوفها يگول هنيالج عليه تقدم گعد بصفي

مرتضى : شلون صرتي

_ زين تذكرت تسأل

خرزني وباوع لامي

مرتضى : سمعتي لسانها بلسانين وياي

نادية : اطيحلك حضها والله

بشرى : أنتَ الردتها وعاندت شوف نتيجة اختياراتك

ما رد وفلا چن سمع اخذ كرار من ايدي ومن بعد ما صفن عليه باوعلي

مرتضى : يشبهج

ما رديت عليه ومن شافني ساكته حطاه بحضني وگبل لا يطلع گال

مرتضى : بالليل اردن عليج اخذج للبيت وحجي زايد ما اريد

_ ما اجي

مرتضى : مو بكيفج

اطانه گفاه ومشى باوعت لأمه أحلف

_ ما اردن والله وشيسوي ابنج يسوي العيشة يمكم ما اريدنها

بشرى : عاد شلون عيشة عايشتها هنا احترمي نفسج واسكتي

عضيت شفتي اتعوذ الشيطان وبس اجه سعد وحجيتله طلع يحجي ويَّ امي وصوته لهنا بالغرفة اسمعه

سعد : ما ترررد انا اخوها الچبير و ولي امرها طلاگ برگبتي بتج ضله ما الها ببيت أختج

نادية : وابنهااا ياخذوه منهاا تحرمها منه ترررريد مثل ما أنتَ محروم من الخلفة

باوعت على سكينة مقهورة امي تحجي وما تهتم لمشاعر المقابليها

سعد : انا حجيت العدي يردون ابنهم ياخذوه غير هل حجي ماكو

لطمت على خدي وسكينة تهدي بيَّ وانا روحي راحت مو چن حجايات انگالن حرگن روحي حرگ من الخوف

_ ويييين ياخذوه ولج سكينة لو اموت ما اطييي ابني

اخذت كرار مني من صار يبچي والسبب صوتي العالي تحجي وياي وتسكت بيه

سكينة : بس حجي والله ما يخليهم ياخذوه

شني لعب يربا بعيد عنج

_ لا والله لاا عناد يسووها صدگ تعبت بيه والله تعبت

سكينة : گولي يا الله جا سعد وين راح هوَ يوگف بوجهم

غطيت وجهي وبچيت بخوف وحيرة وبالليل بس اجه مرتضى حتى ياخذني طلعله سعد سندت روحي على الحايط وطلعت من سمعت صوتهم عله من باب المطبخ ضليت اباوعلهم و وراي سكينة واگفين بالحوش وحسن بيناتهم سعد روحه بخشمه بالگوة كاض روحه عن مرتضى

سعد : ما تاخذهاا انا أخوها واگلك تطلگ لا بكيف أبوي ولا أي واحد هنا

حسن : شايف روحك بس أنتَ اخوها لو شني هنا طراطير گدامك

سعد : خليني ساكت عنك دفترك يمي محترگ اذا اكضك اگضي بيك التوبة

حسن : على شني

سعد : تغشم روحك

مرتضى : امشي حسن صيح اختك وعود كملوا عركتكم بعدين

دار عليه خازره عيونه يردن ينطن

سعد : انا شجاي احجي دير وجهك ورد منين ما اجيت

مرتضى : وابني

بأبتسامة وبنبرة صوت استهزاء گال

سعد : أبنك ليش هسة تذكرت عدك أبن نسيت من خليتني احيرن شلون اطلعله البيان وهوَ ابنك مثل ما تگول

ما جاوب لان يعارف بروحه غلطان درت من حسيت بايد تخلت على چتفي

نادية : ردي احسن ما يعاند وتفلسين من ابنج ومصيرج احسبيها نصيحه من عدو اذا تردين

_ من يوم يومج عدو مو أم

طگتني على چتفي ونترت

نادية : ادبسزز

سحبت روحي بلاية ما احجي لان اعارف بيها تريد حجه عليَّ طبيت للغرفة احوسن حايرة وين اطي وجهي سعد ضل معاند ما يردني وهل شي

خله بگلبي شويَ راحه بس كلشي انگلب ساعة الگال ومبين كلشي محظر

سعد : السبوع الجاي راح نمشي لايران وگلت اگلكم

نزلت الگلاص من ايدها چانت تشرب جاي وهوَ گبالها گاعد ابوي حتى ما سأل لان امي مكفية وموفيه

نادية : أنتَ ويامن

سعد : انا ومرتي

نادية : شعدددكم

سعد : نتعالج يمة

نادية : قصدك تعالجها مو تتعالجون

سعد : مرتي وحگها عليَّ

نادية : ازوجك غيرهاا

بكل هدوء دار عيونه على سكينة الگاعدة بصفي ابتسمت مدنگة بحضنها كرار

سعد : ما اريدن غيرها انا بزرتي رايدهم منها يمة

طگت على رجليها متنرفزة

نادية : عااامية عيونك مو اگلك ساحرتك تگلي لااا

سعد : ساحرتني سكينة

يباوعلها مبتسم وهيَ ضحكت وهاي حركتهم خلت امي تتخبل بحيث حلفت لو اخذها وصدگ سافروا تتبرى منه

گام وگف يعدل بقميصه

سعد : مثلج ما شايف أم ما تتمنى الخير الابنها من المفروض أول وحدة تفرحين أنتِ

نادية : تصرف عليها وتالي ما يضل ازوجك بت خالتك وتترس البيت جهال

سكينة : الارملة

خرزتها امي ونترت

نادية : تسوى راسج هاي الارمله على الأقل احسن منج خضرت بطنها ومن مرة وحدددة

سعد : حرااام تحجين هيج يمةةة

نادية : چاي احجي الحگ خليني اخذها الك والله تسوى راس هاي

تأشر على سكينة وسعد مبين كلش تنرفز بس كاض روحه مايريد طلابه حطت كرار بحضني وصعدت ولحگها سعد ضليت اباوع مقهورة عليها وامي ابد ما سكتت وگبل موعد سفرهم بيوم صعدت يمها دگيت باب الغرفة وطبيت مبتسمة احجي وياها

_ كرار يگول راح اشتاگ لخاله واجه يشوفج

نزلت الغراض البيدها بالجنطة چانت تحظر جنطهم وأجت اخذته من ايدي تشمه وتحجي وياه

سكينة : بعد عيوون خالته يمة كرارر الحلوو انا هم راح اشتاگلك

مشيت گعدت ع الچرباية اباوع للهدوم المطشرة عليها

_ شگد راح تضلون

سكينة : ما اعارف بس گال سعد نطول فوگ الشهر

_ أن شاء الله تردون ومتحقق المتعنيله

سكينة : أن شاء الله ربي يسمع منج تعبت وما ضل غير هذا الحل

اجت گعدت يمي وطب سعد سلم ودنگ اخذ كرار من حضنها وهي گامت تكمل ومن نزلت لاگتني امي روحها بخشمها بلاية ما احاجيها مشيت للغرفة لان اعارف هسة وبهذا الوضع لو حجيت تشرب من دمي وانا گاعدة ابدل لكرار انفتح الباب استغربت من شفته حسن سد الباب وضل واگف ايده بجيوب البنطرون ويباوع عليَّ

_ شرايد

سؤالي بلاية اهتام دنگ عليَّ رفعت راسي اباوعله

حسن : تردين احجي لابوي تلاگين منو يم الشط

عضيت شفتي ماريد يشوفني خايفة من حجيه لان يستغل خوفي ويزيد بتهديده

حسن : فكري زيين الوحيدة أنتِ تتأذين

مشى للباب واندارلي متذكر بحقارة بلغني

حسن : وخاف ما تدرين مرتضى حالف يحجي الابوي اذا ما رديتي هذا السبوع

طلع وخالني وراه مثل التايه شلون اردن وانا اعارف لا مرتضى ولا خالتي راح يرحموني انا اعارف كلش زين شني راح يصيرلي لو صدک رديت

ضلت روحي تلوب مختنگة احسن البيت بكبره ما بيه هو عذب اشتمه هنا حتى الهوه متلوث بسمهم

وكلما جايني اختنگ اكثر وانا افكر

ويَّ روحي شني اليخلي الاهل هيج يكرهون البنية وينبذوها

نزلت كرار على فراشه وطلعت افتر بالبيت ومن شفت الكل نايم طلعت اتمشى لمكاني الضاله دوم اتهدد بيه گعدت عيني على السما اليوم الگمرية قوية وما چن الوكت هلگد متأخر وعابر نص الليل

نزلت شالي وفتحت شعري لبست الكتر بأيدي ودنگت اخذت ماي اغسل وجهي نشفته بالشال وانا من الهوسة البراسي ما اعارف بشني بالتحديد جاي افكر گمت على حيلي وهستوني حطيت الشال على راسي ودرت اردن للبيت شفته وراي فزيت وحطيت ايدي على گلبي

_ من شوكت هنا أنتَ

ليث : هسة اجيت

تنفست مهبوطة وهوَ عينه صارت على ايدي من رفعتها اعدل الشال

ليث : اطيناه

_ شنو

ليث : هاي البيدج

أشر على الكتر

_ ليش

ليث : لا تسألين كواكب اطينياه

نزعته واطيتهياه اباوعله لبسه بأيده ونزلها مغير الموضوع بلاية ما يجاوب على تسألاتي الواضحة بعيوني

ليث : شعدج بهل وكت طالعة

_ المفروض ما تسألني لان هاي مو اول مرة اطلع

ليث : وين اختفيتي

_ چبت

ليث : هااا

_ كرار

ليث : الله يحفظه

گالها وهوَ يبلع ريگه مسح على شعره بخفه ايده بس رچفتها خلتني اصفن عليه حمحم داير وجهه مني وانا مشيت اردن للبيت وراي سمعته يصيح بأسمي انداريتله ويَّ خيوط الفجر والهوا الخفيف شعره يحترك مشى ببطئ وگف گبالي

ليث : حطيها ترچيه بأذنج كواكب لو وراج سرب طيور اخذج ابنج لو تطلگتي يصير ابني معزته من معزتج بگلبي

لزم شاربه

ليث : وانا حفيد رأجس كلمتي وحدة ماتصير ثنين

_ بس أنتَ ما متزوج اهلك ما راح يرضون

ليث : مستعد اهدن الديره كلها ولا اهدج

دنگت بساع من طاحت دمعتي درت وجهي ورديت وهوَ وراي اسمع خطواته من يدوس على الحنطة

طبيت لگيت كرار بعده نايم تمددت بصفه وانا اتحسب على اهلي الچانوا بسبب بتعبي وخسارتي لكلشي من حقي اعيشه ثاني يوم العصر

ودعت سعد واختي الما جابتها امي وانا ادعيلها ترد والفرحة تنشاف بملامحها وبس مشت سيارتهم طبيت لگيت امي گاعدة وجارة ثوبها تدعي شگد ما اعارف بگلبها ما بيه رحمه بس ما تخيلت هيج

نادية : روحي يا سكينة يا بت جبار كوون ما خضرت بطنج وتنكسر عينج عمن خليته ما يباوع بوجهي

حطيت ايدي على صدري مصدومة من حجايتها وبس شافتني صاحت

نادية : وأنتِ اليوم تردين الرچلج سعد ومو هنا بعد نشوف ياهيَ ماتررد

_ ما ارررد

هيج حجيت لو حطيت حطب على النار ركضت عليَّ من شعري عتتني تصيح وتهدد

نادية : وحگ الله انا احجي الابوج واخليه يدفنج احترميي روحج واسمعي الحجيي

جريت روحي من ايدها اناشغ خنگتني وما چن بتها روحي اچت تطلع بين ايدها عيونها انعمن چن الگدامها عدوتها طبيت للغرفة ابچي شلت كرار فز من صوتنا العالي بالگوة سكت حضنته وبچيت بلايه حس شلون و وين اطي وجهي وانا متأكدة راح يجبروني

°غاية°

وگفت على حيلي مصدومة أاشر عليها

_ يمة هاي چفووون

محد چان منتبه اسمها من نطقته خله الكل يباوعون بالاتجاه العيني عليه ابوي طفر من مكانه وامي صاحت

زهرة : خااايبين صدگ هاااي جفووون

بچت بصوت عالي وركضت لحضن امي

جفون : يمةةة

لمتها امي بحضنها وثنينهن يبچن عيوني على أبوي المشى الصخر

محمد : شلوون جبتهاا لك مهدورر دمها ما تخااااف من جدك أنتَ

عينه عليها جاوب أبوي

صخر : لوما عمي سمير ما چان عارفت بالحقيقة الضامها بوية

محمد : ضميت حتى احافظ عليها صح غلطت بس هاي امانة منيير عمك

صخر : ولأنها امانة عمي رديتها لمكانها هنا مكانها الهدته

ما رد عليه أبوي واندار عليها يباوعلها بقلق من ردة فعل جدي لو شافها طول الوكت ضلت امي

ما مفارگتها چن ما مصدگة شوفتها شگد ما جانت شايلة بخاطرها منها بس من ردت وهسة گاعدة بصفها كلشي تغير

طگتها على چتفها خلتها تفز

عطاء : ادبسزز شلون تطلعين والله لو انا زلمة الا هاي رچليج رچلين الصخلة اكسرهن

جفون : عمة حاجيها والله چن زلمة طگنيي ايدي راحتت

غضة : بعد گلبي تستاهلين

جفون : ليش هيج جدة هاي لو غاية چان تعاركتي ويَّ عمة علمودهاا

غضة : خايبة ترحين وتردين فدوة لغاية سوايتج تكسر الظهر والله بس لوما بت منير چان طگوا ضهرج

جفون : من ايدكم الف مرة گلت ما اريدنه وصلت بيكم تجبروني

غضة : خايبة اكلي تبن ياهو الجابرج بس أنتِ غبية

جفون : ياهي الغبيية جدةة

غضة : أنتِ عمن ما تعارفين مصلحتج وين

جفون : يا مصلحة هاي جدة فدوة الگلبج خليني ساكتة

غضة : لا شو احجي حتى اكسر عوجيتي على ضهرج

جفون : هوَ أنتِ گادرة بس عليَّ

حضنت امي وامي تسمح على شعرها وفزت تحط الشال على راسها من اجانه صوت نوح من المطبخ يحجي بضحك

نوح : جدة عزيز تكفل بطلاگج فرررصتج هااااي

طب يفر بسويج السيارة ووجهه احمر ما انتبه الها الا بعد ما گامت تمشي للغرفة وسع عيونه يباوعلها بلع ريگه عيونه تتبع خطواتها ومن سدت الباب دار علينه

نوح : شعدها جاية

غضة : ردها اخوك

نوح : شني ردها

غضة : ما اعارف ما حجة ،من يّجي اسأله

نوح : وعلى شني اسأله ،ما تهمني

عطاء : أي صدگناك

ما رد وخله ومشى يصعد فوگ گمت يم ميمنة من صاحتني نصب الغدا احجي وياها واغسل بالخضره

_ عيونه انگلبن گلب ،شلون بعد يتقبل وجودها هنا

ميمنة : لا تفكرين يّجي يوم كلشي يصير احسن من گبل

بس التيمنا ع السفرة جدة گالت

غضة : امشي صيحي نوح خلِ ينزل ياكل

زهرة : لا عمة خليه

غضة : وعلى شني اخليه امشي غاية

صعدت وانا اعارف ما راح يرضى دگيت باب غرفته وطبيت چان واگف بايده المكينة يحدد شواربه الملحيات شكله

_ جدة تگول انزل تغدا

طفاها و مسح الشعر الصار الى وجهه

نوح : شبعان

_ شماكل وشبعان

نوح : شبعان وهاي هي

سديت الباب ووگفت گباله

_ ضايج لان شفتها

أبتسم بطرف شفته

نوح : كرهتها شوفتها خنگتني

_ لا تچذب

نوح : وداعة حرگة گلبي من مشت كرهتها

نزلت بساع وخليته من سمعت صوت ميمنة تصيحني صارت گبالي واگفه عد الدرج بصوت ناصي گالت

ميمنة : ما رضى مو

_ يگول شبعان

ميمنة : يچذب

_ اعارف

گعدت بلاية حس گبال جدة ومن شافتني ساكتة عارفت هوَ ما رضى من الشمس بدت تغيب ضليت احوس جدي راح يرد وخايفة من رده لو شافها

طفرت من مكاني بايدي كتابي من سمعت صوت السيارات برا وگفت اباوع من الشباك طب جدي وعمي باقر و وراهم طبوا الولد ضليت بمكاني ما تحركت ادعي ما تصير طلابة طلع أبوي مبين سمع صوتهم

محمد : هاا بوية بشروا انحلت

رأجس : عمك حلها

باقر : أي والله طيح الفصل كله

محمد : شلوون مو قافلين همَ

رأجس : ماكو شي يصعب على أل غضب صدگ ليش ما لحگتنه

محمد : ما گدرت أجي تعبان

رأجس : هاا

محمد : تعالوا بالديوانية عدي حجاية وياكم

مشى گبلهم للديوانية وانا اخذتلي زاوية يم الباب اسمع جدة طبت يمهم وامي وعمة لحگنها اول ما بدا يحجي اطاهم المقدمات

محمد : من ماتت أم جفون ضلت امانه عد ابوها وكلكم تعارفون شگد چان يعزها ،وما انسى ذيج الليلة من أمني عليها گبل لا يمشي لدوامه وبعد ما رد انا هل بت احجيها الكم حالها حال بناتي واعز بعد

رأجس : وعليش هل حجي محمد

محمد : اطيني صبر بوية

باقر : احجي خوية ولو اعارف بالمضمون شني

محمد : اليوم وبعد ما مشيتوا طب صخر وياه امانة اخوي

رأجس : هنااا

محمد : أي والبت ابن الشيخ ما خليته يعقد عليها واتفقت وياه بس تهدا الاوضاع اردها

رأجس : يعنيي چذبت عليناا

محمد : لا بوية بس حافضت عليها هاي امانة برگبتي شما سووت

عله صوت جدي يصيح

رأجس : لك تعااارف شجاي تحجييي

محمد : اعارف بوية واذا ما رضيت بيها بيناتة انا اخذها واخذ عيالي وامشي من القرية

رأجس : يعني تحطنيي گدام الامررر الوااقع مووو

محمد : لا بوية الك حرية الاختيار بس انا بت أخوي ورايد احافظ عليها

رأجس : مثل ما حافضت على سمعتناا هيَ

لهنا اسمع صفگة ايده عمامي يهدون بجدي والولد يتوسلون بأبوي لا يحجي هيج انا كلش زين اعارف غير هل طريقة ما تجيب نتجية ويَّ جدي اندريت من سمعت صوتها وراي اجت وگفت بصفي تطگطک باصابع ايدها

جفون : جدي ما يردني هنا مو

_ حتى لو ما رضى أبوي موجود

تنهدت ومشت يم ميمنة ومن ردت اصواتهم علت خليت ولحگتها لان اعارف ما تنحل بهل سهولة وراح نضل بين عناد أبوي وجدي ،بس طبيت للمطبخ شفتها گاعدة بحضنها عون تطعمه وتضحك وياه

ميمنة : اجت الطيااارة عمم عفية بوليدي السبع

دنگت باسته وهوَ يضحك گعدت گبالهم مبتسمة گاعد بين رچليها حتى لا يطيح هسة بدا يگعد و گعدته مو قوية من بعيد شمرتله بوسه ولو بيدي اعضه بس تخنگني

_ فدوة للخدود

جفون : ينوكل اكل والله

_ أي والله

مبتسمة توكله وهوَ كاضها بوحدة من ايده من دشداشتها على گعدتنا وطب صخر سلم و حاجاها

صخر : تعاي احاجيج

ميمنة : شكو

صخر : اطي عون لغاية

مبين ما يريد يحجي گدامنا خلته عدي وگامت بساع وراه تدنت يمي

جفون : شعدهم هذولي

_ رجال ومرته شدخلنا

جفون : اموت اذا ما اعارف

_ اكسر رچليج اذا مشيتي وراهم

جفون : لا ما امشي

تگول لا بس عيونها تگول غير شي ضلت گاعدة تحوس گمت غسلت لعون وصعدت حتى اوديه الها لان نعس وما يعارف ينام الا بمكانه درت وجهي اباوعلها صعدت وراي عضيت اصبعي اتحلف بيها وهيَ ولا چنها كملت دربي لغرفتهم بس

دگيت الباب فتحه صخر اخذ مني عون وطب اطاه لميمنه بلايه ما اباوع درت وجهي وجفون ضاله واگفه على جهه تحوس

نزلت وهيَ وراي و ويَّ ما نزلنا طلع جدي من الديوانية روحه بطرف خشمه جفون ختلت وراي خايفة يشوفها ووراه طب أبوي و ليث هستوه مبين جاي من الگيعان وبس انتبه هاي جفون وراي

خزرها ومشى صعد فوگ جراها ابوي يوگفها گدامه

محمد : نزلتي راسي گبالهم يلموني بس تهون سوايتج وما تهونين

شهكت تبچي وحضنته ،حضنها وبأس رأسها يزيد على كلامه

محمد : انا عاذرج لان زغيرة وما تعارفين الصح من الغلط بس بعد هذا النفس بعلمي يصير

جفون : صار والله كلشي احجيلك بعد

محمد : عفية حبيبتي

وخرها ومشى لغرفته وهيَ ضلت تمسح بعيونها صوتها يرچف تريد تحجي ما تگدر وگفت گبالها اعدل حجابها

_ متندمه

هزت رأسها بأي

جفون : صوجي جبت الحجاية لعمي

_ قهرتيه هواي جفون

جفون : ريت القهر بگلبي انكسرت رچلي ولا طلعت

_ أي والله

مسحت عيونها تشهگ جريتها احضنها واحجي

_ ديلا عليش تبچين الصار صار

جفون : ما مصدگة رديت توقعت طول العمر راح اضلن بعيده عليكم

وخرتها اسأل

_ صدگ شلون اطاج الشيخ لصخر

جفون : من ردت وردة عمي سمير گايل للشيخ تحجيلي الحقيقة عاد الشيخ متفشل منه وحاجيله ومن يومها عارفت ما راح اضلن يمهم ومبين عمي حاجي لصخر واجه اخذني

_ وشلون اقتنع يردج ويَّ صخر

جفون : خلاه يتعهدله الا سلمني بيده ما اچذب عليج انا أجيت اموتن من شفت صخر

_ والله انا لو بمكانج اموتن بالدرب من الخوف

طگتني

جفون : اشتاقيتلج

_ والله حتى انا والغرفة بلياج وحشه

جفون : عمة يمج

_ دخيلج عمة ما تخليني اتنفس بالغرفة

جفون : ما تنجرع الله يساعد رچلها

عطاء : ياهي الله يساعد رچلها ولج

بلعت ريگها ودارت على عمة

جفون : على هاي شسمهااا

ح حواري ما تنجرع

عطاء : هاا على حواري

جفون : أي

عطاء : اذا ما اگلها تحجين عليها

جفون : يااا عمة لااا

عطاء : انا الج رمووش

طلعت للحوش افتر كتابي بأيدي شويَ وطلعت وراي جفون جابت بساط فرشته گعدت وهيَ بصفي تصفن ساكته وانا اقرأ هدوء كسره صوت السرقي مال باب من انفتح رفعت رأسي وانا اباوع عليه يمشي برهاوه جفون طفرت من شافته طبت تركض جوا وهوَ كمل ما متهم وگف گبالي گمت اعدل بحجابي اضم ضفيرتي جواه بس ما تنضم عيونه متعلگات ويَّ ايدي

عزيز : احلى من الليل لونه

درت عيوني مبوخ وجهي حضنت الكتاب لصدري

همس بصوته الخشن

عزيز : هنياله

_ عزيزز

عزيز : غاية گلبه

تحركت اطبن جوا لان لو ضليت گباله اتبخر من المستحى بس منعني من وگف بطريقي

عزيز : صار اكثر من شهر ما شايفج لا تطبين

_ اخواني

عزيز : ما يشوفون

اديرن بعيوني ما اگدر اخليهن يستقرن عليه

عزيز : غاية

رطبت شفتي احس ريگي يبس

_ هاا

عزيز : ما ضل شي ويگضي السادس فاض صبري

_ خلِ اطبن

ضحك بصوت ناصي

عزيز : طبي عمي هاي بس حجي وهيج صار بيج

ما رديت عليه وطرت جوا ايدي على گلبي الخفقان ذبحني لازم بكلشي يحط روحه روحه جريت نفس طويل ايدي على خدي وفزيت من سمعتها وراي تحجي

جفون : امورج عدله غاية مطحية المحامي والله طلعت بس انا فقيرة

خزرتها

_ جا مو طيحتي الممرض عيني

جفون : ماريده

_ وهوَ هم بعد ما يريدج حيل صار بخاطره منج

جفون : وخله ما يريدني ما ميته عليه

فزت من صارت حركه وراها انتبهت چان هوَ چاي بس ما نبهتها تعداها ولا چنها موجودة

ومشى للثلاچة طلع دولكة ماي منها وحاجاني

نوح : اريدن شي اكله جوعان

_ صار

أبتسم ابتسامه خفيفة جابر روحه عليها وخله وطلع للحوش بلايه ما اباوعلها طلعت طماطه من الثلاجة ثرمتها وگليتها وبس خلصت شلت الصينية وطلعت برا چان گاعد على البساط گام اخذ الصينية مني وگعد ياكل هدوه أول مره اشوفها ما چن هذا نوح الخابصنه بصوته

_ رايد شي بعد

هز رأسه بلا وبس طبيت ما لگيتها النعاس غلبني مشيت للغرفة حتى انامن وسمعت صوت خطوات ع الدرج تكترت على جهه وانا اشوفنه نزل ووراه ميمنة شايل جنطة سودة بأيده ولابس قميص وبنطرون وبس صاروا بنهاية الدرج وگفت گباله توصي بيه

ميمنة : عليك الله لا تخليني بقلق گول لبرهان يّجي يجيبلي اخبارك

صخر : صار يابة وبعد

ميمنة : شلون هيج والله بالي ما مرتاح مو دوامك يومي شسواك هيج

صخر : لا تخافين احاول اردنه مثل ما چان عينج على روحج وعلى عون

ميمنة : أن شاء الله مودع بالله

بأسها من رأسها وطلع ما انتبهوا عليَّ كل ضنهم ماكو احد گاعد طبيت للغرفة احوسن وبالي عده معقولة التحق مثل برهان ويطول ايام الا يّجي

تمددت بصف چفون چانت گاعدة وصافنة على السگف ندستها

_ شجاي تفكرين

جفون : هواي اشتاگيت لهاي الغرفة

درت عليها

_ أي

جفون : وجعي شبيج مدري شلونج

_ زينة كلشي مابيَّ

جفون : اذا أنتِ مطحية المحامي بعشگج شلون مو زينة

_ اهووو

غطيت رأسي وهيَ تجر بالبطانية مني من كلت مني وعارفت ما راح اهدها استسلمت وثاني يوم طلعنا انا وياها الصبح ريحة الچاي صارت بخشمي گاعدين يتريگون جدي من شافنه ملامحه كلها انگلبن أبوي صاحها وهوَ يسويلها مكان بصفه خله جدي يگوم من الصينية ضلت واگفه بمكانها متردده تتقدم

محمد : تعاي بوية

غسلت وأجت گعدت بصفه وليث گبالهم مدنگ يخوط بالجاي حتى ما رفع رأسه اليوم لا نوح ولا صخر موجودين انا هم غسلت وجهي وأجيت گعدت بصف ميمنة الي بحضنها عون يحوس

جرت ايده

ميمنة : ولك يااا امي راح تحترگ وتالي وياك عون

يريد يهمش گلاص الجاي ومن كاضته ضل يبچي گام ليث اخذه منها

ليث : اكلي خوية

ميمنة : شبعت أنتَ

ليث : الحمدلله

رفعت راسي على صوت دگة باب المطبخ وصوته يصيح بأسم ليث

عزيز : وين صرررت ليث بساااعك

ليث : تعااال طب

دنگت اضيع مستحاي من شوفته واسمعه سلم

عزيز : صباح الخير

الكل رد عليه وهوَ بضوجة يحجي ويَّ ليث

عزيز : اخرتنا مايصير هيج

ليث : لاحگين

عزيز : من شوكت صاير هيج برودي أنتَ

ليث : مو برودي بس چازت الروح من الطلايب كلش

عزيز : دمشينا ما ضل غير حل بعد

گام ليث اطه عون لميمنة وهموا يردون يمشون بس وگفتهم جدة من سألت

غضة : وين ماشين يا ستار

محمد : خلهم يمشون يمة وانا احجيلج

غضة : سترك يا ربي طلابة جديدة مو

طلعوا همَ وابوي رد ضهره على الحايط

محمد : اكوو بيوت هسة عرفناهن لبيت غازي ما گاعد بيهن احد گالوا يشمون يشوفن هلبت جعفر بيهن

زهرة : هيج وصدگ يرد جعفر يرادلها بخت وتتكحل عيون شيماء

محمد : يرد أن شاء الله

وللعصر وماكو الولد طر المغرب الا طبوا وكل خبر على جعفر ماكو ما لگوه مثل كل مرة الثار جاي يزيد ما ينقص وكل ما يمر يوم الحقد عليهم يكثر اضعاف الخوف من الحقيقية لا يطلع جعفر صدگ مكتول

°حواري°

نترت احس عقل ما ضال براسي يعاند الا يّجي

_ لا تگليلي ابوووهم ما يشوفهم والله ما يشوفهم

نجوى : صوووتج شبيج تخبلتي

_ أي تخبلت لا اردن ولا اشوووفه حتى لا تحاولن وياي الحجي ما يجيب نتيجة

افتر مثل المخبلة دمعتي بطرف عيني وطاحت بساع من انفتح باب الغرفة وصار گبالي هو درت وجهي منه ما اريد اشوفه

عبد الحق : عمة بس احجي وياها

خزرته وباوعت لامي

_ وييين طالعة يمة

نجوى : تفاهموا بيناتكم

بس طلعت امي قفل الباب وراها أشر ع الباب اريد اكض روحي وما اعلي صوتي

_ افتح الباب

عبد الحق : اذا ما افتحه شتسويين

_ اعيط والله الوادم عليك

عبد الحق : خلِ يطلع صوتج حتى سنونج اكسرها بحلگج

_ لا والله

عبد الحق : وداعة حوريتي

_ الله ياخذهااا وتخلص منك ربييي خلصني منه

ادعي مفرفح گلبي ،سد حلگي بأيده عيونه بعيوني

عبد الحق : كافي ما تتعبين أنتِ ،ما تملين

عضيت ايده ورديت ليورا

_ لان تعبت ما اريدنك بعد اجيب التعب لروحي ليش

عبد الحق : هاا صرت التعب انا

_ غيرتني حق انا ما چنت هيج بسببك والله تخبلت

ربط ايدي ما يخليني الطم على روحي

عبد الحق : عاقلة مخبلة انا اريدنج

_ هسة تذكرررتني هسة ردتني ويين چنت حاجيني وييين

عبد الحق : كااافي صوتج لا تصيحين

_ منو أنتَ حتى ما اصيح گدااامك أنتَ لا شيء بعيني صرررت

كضني من فچي عاصره بقوة بين ايده

عبد الحق : هواي صايرة تدوسين بالحجي

جريت روحي منه متأذيه

_ حتى جهالك اخذهم

رفع حاجبه

عبد الحق : هيج صارت

هزيت رأسي بأي وهوَ فتح الباب وطلع وبنفس الوكت طبتلي امي بعدها ما حاجيه حذرتها

_ اذا تلوميني هسه اهچن من الديرة كلها واشوفلي بيت يلفيني

نجوى : هسة حاجية انا

_ خاف تحجين يعني

گعدت بالگوات اچرن النفس اقنع بروحي ابدي وياه صفحة جديدة بس ما جاي اتقبل الفكرة كلما اشوفه احس عقلي يطفر مني وبس اريده يختفي من گدام عيني

زهرة : السلام عليكم

اريد اردن السلام وگمت على حيلي من شفت جفون وراها وسعت عيوني مصدومة

_ جفووون

ركضتلي فاتحة ايدها حضنتها

_ شوووكت اجيتي ولج شعجب

جفون : رديت وبعد ما افارگكم

وخرت اباوعلها ما مصدگة

_ علييج الله

جفون : والله

ضحكت ما مصدگة مزاجي بسرعة تبدل سلمت على امي والبنات وأجت گعدت گبال سيف وحوراء

جفون : شنو هاي تخبببل ولج

أبتسمت

_ دبة هاي مو مثل سيف

جفون : هم دب بس هي أكثر

شالتها تشم ريحتها وتضحك ما مصدگة

جفون : عود يعني صدگ صرتي أم وهذولي جهالج

_ اندري شو انا ما جاي اصدگ

جفون : ولا انا تطيني واحد

_ گدامج اختاري

ريحانة : يااا شو توزعين بيهم

_ خايبة يتعبووون

ريحانة : انهجم بيت البانية جا انا مو وياج بيهم

_ هوَ انا ليش ما اردن لان محد يحملهم غيرج

ضحكت تهز ايدها وعمة استلمتني

زهرة جا صدگ ليش ما تردين وتفضيها ترا طول زعلكم وكل ما طال زعل المرة وزلمتها انفتح باب جديد للفراگ بيناتهم

_ جا عمة انا ادوره دواره الفراگ الله وكيلج

زهرة : ياااا ولج حورية

نجوى : موتتني خية اسمعي حجيها

_ كلكم تعارفون انا حق ما اريدنه بعد چازت روحي منه فرد نوب

زهرة : وجهالج ولج

_ عدي هم عوزه ياخذهم

هيوفة : جا مو گبل شويَ تگليله حتى جهالك اخذهم

_ چذب بس حجي

زهرة : استهدي بالرحمن عمة وكلشي ينحل ما يصير من اول طلابة وتفترگون

_ ماكو طلابة

زهرة : حتى لو انسي كلشي لخاطرهم باچر عگبة يلومونج لان ما تنازلتي لجلهم

تنهدت اسمع لحجيها وهنَّ شافني سكتت اخذنها فرصة يحجن براسي وانا بس اصرفلهن أي وبالاخير گتلهم

_ اتطلگ لو يمدلي دربي ذهب

غمتني

زهرة : مو صوجج صوج التحجي صار ساعة

_ لا تزعلين عليج بداعة عمي بس بعد ما تهواه روحي

زهرة : جا اذا هيج أنتِ ما تحبينه

_ لا والله عمة مستهضمة منه

نجوى : وأنتِ هم ما قصرتي وياه كافي يا يمة

_ مو كافي محد عاش العشته انا هان عليه فراگي وطلع حتى حبه چذب

زهرة : لوما يحبج من صدگ ما چان صابر عليج كل هل وكت

_ انا الصابرة عليه مو هوَ

نجوى : جا رديله وتفاهموا

ما رديت من شفتهن قافلات عليَّ اخذت حوراء من جفون اسكت بيها خبلتني بس تلعي جفون ضلت يمي وعمة مشت وبيوم گاعدة انا وريحانة طب عزيز وگف گبالنه عينه عليَّ من سألته شكو گال

عزيز : گلت لحق يطلگج

غصيت بالهوا اگح ركضت ريحانة جابتلي ماي وهو واگف بمكانه ما تحرك من هدت الگحه وگدرت اچرن نفس رد گال

عزيز : انا وياج حتى لو جدي عارض راحتج اهم من كلشي

_ يعني راح يتدخل جدي

عزيز : هوَ گال يحجيله

_ جدي وين يرضى على الطلاگ

عزيز : يرضى ما عليج

بس طلع التفتتلها تحجي بقهر

ريحانة : والله تتندمين لليوم بعدني اعض اصابع الندم على الساعة الردت بيها اتطلگ

_ لو مسوي بيج مثلي هم تضلين

ريحانة : لا وهم چان سويت مثلج بس انا اگلج لا تضلمين روحج تتطلگين وهوَ گبال عينج كل مرة تشوفيه بيها راح يتجدد صوابج

_ امي شوكت ترد

ريحانة : من شفتي الحجي صح فريتي السالفة

_ بعزت روحي من هل سيرة

ريحانة : لازم تحطين النقاط على الحروف

_ حاطتهن من زمان بس محد بيكم يقبلهن

ريحانة : دسكتي اسكتي نقاطج غلط

_ أي صح الباء مسويته نون

ضحكت تهز ايدها ،ولليل وانا بالطبخ اغسل مميات الجهال طب فقار

فقار : جدي يريدج

_ اهووو

فقار : يردج يعني يردج لا تحاولين

_ ما اقبل والله

فقار : دمشي هسة وگليله ما تقبلين

مشيت للغرفة ادردم ،لبست عباتي وطلعت ويَّ فقار وبس طبيت جانوا ملتمين بالصاله من ضمنهن حق مستند على المخدة ويحجي

ويَّ جدي من گلت السلام كلهم ردوا الا هوَ ضل ساكت يباوعلي تجاهلت نضراته وبصوت واضح سألت

_ مودي عليَّ جدي

رأجس : أي تعاي عدي

أشرلي بصفه مشيت گعدت وحق من الجهه الثانية

رأجس : احجيلي ليش ما ترضين تردين

_ واذا حجيت راح تفرق عدك

رأجس : شلون يعني

_ ما اريدنه خلاني بأصعب ايام على سبب جاهلته انا

رأجس : اطيه فرصه وتفاهموا بيناتكم

غضة : بيناتكم بزر لخاطرهم

_ هوَ الرخص خاطري وخاطرهم صدگوني ما اگدر اعيش وياه

احجي وهوَ عينه ما نزلت مني ما حجه ابد ومبين دافع جدي دفعة زينه عليَّ عگب ما چان يگلي التردي هسة يدورله فرصه

رأجس : لخاطر جدي ردي وياه

بأعتراض ردت احجي

_ جدي

عبد الحق : حورية

باوعتله بأيده الچگارة طفاها بالنفاضه

عبد الحق : شهر اذا ما تفاهمنة ردي لاهلج وثاني يوم اطلگج

رأجس : واخذيها حجاية مني اذا صارن ثلاثين يوم وبعدكم ما متصافين انا اخليه يطلگج

_ هوااي جدي

غضة : خايبة مو هواي يگضن بساع

بين القبول والرفض رديت للبيت وانا اتحلف اسودنه بهذا الشهر گلب جديد بصف گلبه اطلعله انا الك اذا ما طلعتهن من عيونك شوف يا حق

ريحانة : شبيج ولج

شمرت العباة

_ ولج ما خلاليي حل ما گدرت ارفضض يريد اطيه فررصه شهررر

ريحانة : هسة انا شفتهمت من صياحج اگعدي واحجي

نزلت من فوگ مستغربة

هيوفة : شكو

ريحانة : جدي وده عليها وطبت ترعد

افتر مثل المخبلة وهنَّ بس حجيتلهن أيدن الفكره

ريحانة : شهر يگضي بساع وعود اذا ما تصالحتوا ردي

هيوفة : والله احسن شي سواه

خزرتهن ومشيت للغرفة ومن اجوي أبوي وأمي چانوا عد عمتي الچبيرة حجتلهم ريحانة وانا گاعدة بالغرفة اسمعهم

نجوى : والله عاشت ايده وزين ما سوا وياها

ريحانة : هيَ متخبلة لان كلهم صايرين ويَّ حق

باقر : امشي بوية صيحيها

گمت گبل لا تجي فتحت الباب وهيَ صارت گدامي

ريحانة : أبوي يريدج

هزيت رأسي بأي ومشيت وراها صاحني أبوي يمه گعدت وانا احسن بهدوء غريب صايبني حجه وياي هواي وختمها

باقر : بعد الشهر اذا گلتي ما ترديه وياج

بالليل لمت غراضي ريحانة وانا اباوعلها مخبوصة

_ شو فرحانة تردين تخلصين مني اعترفيي

ريحانة : ياا ولج غير اريدلج الزين

_ شلون زين عشتوااا بعدين منو گالج اليوم ارد

ريحانة : فقار گال

تحسرت ما جاي اقتنع اباوع للساعة راح تصير بـ 12 تمددت تعبانة ما جاي انامن زين هستوني جاي أغفى وطبت

ريحانة : گومييي اجاج حق

_ باجر گليله

غطيت راسي وهيَ اجت تجر البطانية مني گمت ادردم لبست حجابي وعباتي وباوعت للغراض والجهال

_ شأشيلن انا هسة

ريحانة : اوگفي اصيحله

طلعت بساع وردت هوَ وراها درت مطيته ضهري شلت حوراء وضليت اباوع لسيف

_ ريحانة البسي عباتج وتعاي وياي

عبد الحق : ضلي خوية انا اودي الغراض واردن

وداهن ورد شال سيف وطلع انا وراه امي چانت گاعدة دنگت بوستها وبصوت ناصي وصتني

نجوى : من هل ساعة ابدي بداية جديدة ولو راد گربج لا تمنعيه

_ مو بهل سهولة يمة

نجوى : اووف من عناادج

عدلت وگفتي وطلعت من سمعت صوته يصيحني بس فتح الباب وطبيت تلگتنه بركة بلاية ما تسلم عليَّ اخذت حوراء صحت عليها

_ ولج مووو هيج مرمرطتيها

باستها بقوة

بركة : ولج تخبببل شهل جماااال عليمن طالعة ولج

تخصرت

_ شنو قصدج ولججج

بركة : اگلج احسها صايرة تشبه ريحانة

_ حتى امي تگول

بركة : عيونها يخبلن

مشت تطب جوا وانا لحگتها نزعت عباتي اباوع للبيت بيوم من الأيام طلعت منه وبعد ما رديت

بركة : نضفتلج الغرفة والغراض من جابهن حق صعدتهن

_ صايرة معدلة

بركة : من يومي

_ اصدگ

بركة : لا

صعدت وهيَ وياي كلما اصعد باية واتقدم للطابق الثاني اختنگ باب الغرفة چان مفتوح طبيت وبأيدي حوراء چان حاط سيف ع الچرباية وبأيده مبايله يكتب بلايه حس حطيتها بصف اخوها ونزعت حجابي المبرده مشتغلة والغرفة بارده وانا منعسة حرت وين انامن حس عليَّ خله وگام من الجرباية وانا تمددت يم الجهال بساع غفيت ما حاسة على روحي وفزيت الفجر ويَّ اذان الصبح على صوتهم يبچون النعاس ساطرني وهمَ ثنينهم يلعون شوي وابجي

گمتلهم مطفية طلعت ممياتهم من الجنطة سويتلهم ورديت شلت حوراء حطيتها بحضني وسيف ع الجرباية حطيت الممه بحلگه

_ اووف يا ريحانة وينج تخلصيني منهم

بس ناموا رديت تمددت بس ما اجاني نوم غطيت عيوني من انفتح الباب وطب ضوا قوي من برا سده بساع وشمر شي على الگاع دنگت اشوفن شنو چان جايب فراش مده وحط المخدة والغطوة وتمدد ما رديت على مخدتي احوسن

طلع الصبح الا گدرت انام وما اعارف شگد مر وكت وسمعتهم يمي يحجون

عبد الحق : اخذي حوراء وانا اجيبن سيف ما خلوها تنام

بركة : هوَ الجاهل واحد وما ينجرع مو نوبة ثنين

عبد الحق : دنزلي بساع لا تگعد

تحركت اغطي روحي ورديت نمت وما گعدت غير ويَّ وكت الغدا نزلت لگيت بركة حايرة بيهم بس شافتني انسدحت على الگاع

بركة : اخذيهم مووتوني شگد يبجووون يايمة

ضحكت ودنگت عليهم أبوس بيهم وهوَ طب دنگ شال سيف يحجي ويَّ بركة

عبد الحق : راح امشي العصر اجيبلهم كواريك احسن ما يضلون هيج

بركة : أي عاشت ايدك

وصدگ للعصر وطبوا هوَ ونوح متگابلين على كاترونه چبيرة صعدوها وردوا جابوا الثانية ضليت ما تحركت لليل الا صعدت لگيته شادهن أشرلي على مكان بالغرفة

عبد الحق : خلي هنا واحد وهناك الثاني

ماريدت عليه وجريت أول واحد والثاني طبگتهن سوا چان بيهن چروخ يحتركن بسهولة

عبد الحق : فراشهن بالسيارة نسيت اجيبه

نزل بساع جاب الدواشك مالتهن وصعد الدوشگ الوردي خليته للكاروك الوردي والازگ للكاروك الأبيض خشب چانن كلش حلوات موديلهن جديد نازل ما شايفة منهن

عبد الحق : بعد تردين شي

_ لا

نزلت جبتهم وصعدت أخاف من اشيلهم ثنياتهم يضل يتخايلي واحد يطيح مني حطيت كل واحد بكاروكه وهمَ بس فاتحين عيونهم ويتحركون أبتسمت وانا اتأملهم ما مصدگة هذولي جهالي انا اخر شي بالدنيا توقعته أكبر واصير أم

من شفتهم ساكتين اخذتلي گلبية خفيفة ومشيت سبحت رديت لافه روحي بس طبيت گام هوَ طفه المبرده وخرت الخاولي من شعري مشطته وضفرته رشيت عطر ومشيت للچرباية تمددت وغطيت روحي وهوَ چان گاعد على الطرف الثاني بس غفيت حسيت بايد تطوق خصري نشغت ودرت عليه فاتحه عيوني

عبد الحق : بس اشبكج

_ وخر حقق

عبد الحق : صوووتج

_ وخر مني

ادفع بيه جسمي مكزبر من قربه وخر خازرني وانا بتوتر من نضراته ضليت ألمن بثوبي عليَّ هوَ نزل جوا وانا النوم بعد طار من عيني بس صبح الصبح صحصحوا الجهال بعد بدلتلهم ونزلت شايلتهم مسطورة سطر

_ صباح الخير

شيماء : ياهلا صباح النور اطينياهم

اطيتهم لعمة ومشيت للمطبخ تگابلت انا وبركة على الريوگ وانا احظر الصنينة طب من برا تعدانه بلايه ما يحجي ندستني

بركة : شمسويتله ومطنگر اخوي

_ ما مسويتله شي بس ما ردت ينام يمي

بركة : يااا ليش ولج

_ هيج بكيفي

بركة : خبال حتى خبال

التمينه ع الريوگ وطول الوكت چان ساكت برهان يحجي وياه ويكتفي بأي لو يهز رأسه

برهان : شني سالفتك

عبد الحق : ماكو شي بس دايخ بالشغل

برهان : أي مبين

ما رد عليه وطلع من البيت الظهر وانا بغرفتي اندگ الباب وطبت

بركة : امي تريدج

°هيوفة°

اباوعله بقهر من الوجع الجاي يعيشه گمت اطيته حباية مسكن شربها وتمدد حتى الضوه ياذيه گد ما متأذي من رأسه

_ اطفي الضوه

بصوت تعبان همس

ضيرم : أي

طفيت الضوه ونزلت گعدت يم عمة بالمطبخ بالي عده

نجوى : بعده رأسه يوجعه

_ جاي يزيد الوجع عليه راح اموتن من القهر عمة

نجوى : اسم الله لا تجيبين طاري الموت

_ شوفته بهل حال اخذت حيلي شوكت يطيب ويخلص من هل وجع

تنهدت قهرها عليه مو اقل من قهري على گدتنا وطبت حواري وحدها سلمت و وگفت فحطانة

نجوى : يمة شكوو شبيج

حواري : اضن لگوا جعفر

نجوى : ياااا عليج الله

حواري : أي والله واحد خابر برهان وگاله تعالوا اخذوا اخوك

نجوى : يااا الله يا رحمتك ياربي

انخصبنا ما مصدگين ،عمة طفت جدورتها ومشت لبيت جدي كلهم هناك التموا گعدت ريحانة ولحگناها بس طبينا بعدنا بالحوش والرمي صار بفلس بالقرية

حطيت ايدي على گلبي وطبيت اركض ورا ريحانة

زهرة : شنيي هالرميي ولچن

ريحانة : ما اعارف ما شفنه منو اليرمي

بنفس اللحظة طبوا الولد ومن بيناتهم وبنصهم چان جعفر طلعت عمة تركضله و خواته وراها دمعت عيوني ما مصدگة طلع صدگ عايش وضعه چان اقل ما ينگال عنه منتهي ضعفااان ولحيته عالية بالگوا واگف على طوله طببوه الولد جوا ،سلمنا عليه كلنا نتحمدله بالسلامة واخيرًا بعد ذيج الأشهر رد بيناتنه