اتصال وصل على رقم الطوارء للشرطه، كان المتصل وقتها واحد من سكان عماره سكنيه مشهوره في وسط البلد، شغال دكتور اسنان وكان بلاغه:

-انا كنت عاوز ابلغ عن حاجه بتحصل عندنا في العماره اللى انا فاتح عياده فيها؟

-الاول عرفنا مين حضرتك؟

-انا الدكتور سامح خيرت، دكتور طب الاسنان، وبتكلم بخصوص ريحه سيئه اوي ظهرت في العماره، الحقيقه انا شاكك ان الريحه دي ريحه جثه متعفنه.

طبعا اول لما سمع فرد الشرطه البلاغ عن احتمال وجود جثه اهتم جدا بالبلاغ، وبعد ما خد بيانات الدكتور سامح وكمان العنوان بالتفصيل قاله:

-مش عاوزك تقلق يا فندم، في اسرع وقت هتكون عندك عربيه شرطه.

وفعلا غلال حوالي 25 دقيقه بس وصلت عربيه شرطه للمكان، كان فيها ضابط شرطه واتنين امناء واتنين عساكر، ولما وصلوا لقوا الدكتور سامح في انتظترهم وعرفهم بنفسه:

-انا الدكتور سامح اللى مقدم البلاغ.

رد عليه ضابط الشرطه وقاله:

-تقدر تحددلنا الشقه اللى خارج منها الريحه؟

-ايوه طبعا يا فندم، تقريبا كده هي شقه الاستاذ نصار وهي في الدور التاسع.

وفعلا طلعت الشرطه ومعاها الدكتور سامح للدور التاسع، وهناك لما ضابط الشرطه قرب من الباب شم الريحه وكانت صعبه جدا، وقتها اتأكد ان البلاغ مظبوط وان الريحه دي فعلا ريحه تعفن جثه، وقتها الضابط سأل الدكتور وقاله:

-هي العماره دي مالهاش بواب او حارس؟

-ليها يا فندم، عبد الستار حارس العماره، بس هو من يومين تقريبا كده مش باين، يمكن مسافر بلده.

-تمام هنبقى نشوف موضوعه بعدين.

اتصل الضابط بالاداره بتعته، وبلغهم بالوضع وطلب متخصصين من المعمل الجنائي علشان يفتحوا باب الشقه من غير ما يحصل أي تلفيات وتدمر الادله الجنائيه، وطبعا طلب دكتور الطب الشرعي لانه بقى شبه متأكد ان في حد مات جوه الشقه وجثته هي اللى مطلعه الريحه دي.

وفعلا وصل فريق المعمل الجنائي اللي فتحوا باب الشقه، وبمجرد انهم دخلوا حسوا بان الريحه بقت اقوي بمرات كتير عن الاول، وكمان حسوا ببرد شديد في الشقه ودا بسبب ان التكيفات اللى في الشقه شغاله رغم اننا في فصل الشتاء، وبعد ما دخلوا جوه الشقه ودوروا فيها لقوا شخص عى السرير، كان في وضع غير لائق نهائيا، كان عريان تماما وواضح انه كان في علاقه جنسيه، بس من النظره الاولي واضح ان مافيش أي طعنات او كدمات في جسمه، ودا خلى الشرطه تفكر ان ممكن ماتكونش جريمه قتل، بس الحاجه اللى دمرت الاحساس دا لو فعلا مش جريمه قتل ليه الجثه عريانه وكمان ليه التكيفات شغاله بالشكل ده؟

في الوقت اللى كان المعمل الجنائي والطب الشرعي بيشوفوا شغلهم، كان ضابط الشرطه بيسأل الدكتور سامح وقاله:

-ايه اللى تعرفوا عن المجني عليه صاحب الشقه؟

-ماعرفش معلومات كتير يا فندم، اللى اعرفه انه اسمه نصار، وكمان اعرف انه شغال رجل اعمال وعنده شغل كتير وشغله ناجح.

-تعرف شغال في ايه بالتحديد؟

-للاسف لا بس سمعت انه شغال في اعمال مختلفه مره عقارات ومره سيارات وكله مجرد كلام لان مافيش بيني وبينه معرفه وثيقه.

-طيب انت عرفت المعلومات دي منين؟

-في يوم هو جالي العياده بتعتي، وكانت سنانه تعباه وكان محتاج عمليه تنضيف وازاله جير الاسنان، ولما كان معايا في غرفه الكشف كان بيجيله اتصالات ولما بيرد عليها فهمت من مجمل كلامه انه شغال في العقارا وبيع وشراء السيارات والحاجات دي.

-انت اتعاملت معاه كام مره؟

-تعامل مباشر ماكنش في غير المره دي بس اللى جالي العياده بتعتي زي ما قولت لحضرتك، بس اوقات لو قابلته بالصدفه في مدخل العماره او حتى الاسانسير كنت ممكن بسأله عن احواله وهو كمان بيسأل عن احوالي بس من غير ما نتكلم في أي تفاصيل.

-طيب مالحظتش ان في أي خلافات بينه وبين أي شخص، يعني مافيش مره عمل مشكله مع حد من سكان العماره مثلا، او حتى حصلت أي حاجه غير طبيعيه معاه؟

-لا يا فندم، خلال الفتره اللى فاتت ماحصلش أي حاجه من اللى حضرتك بتقولها.

-شكرا يا دكتور سامح.

وبعد ما خلص ضابط الشرطه مع الدكتور سامح، طلب من رجالته يحاولوا يجمعوله اكبر قدر من المعلومات عن المجني عليه، وبعدها ابتدي يستمع لـ المعلومات اللى وصلها الطب الشرعي لما اتكلم دكتور الطب الشرعي وقال:

-من شكل الجثه رغم ان مافيش أي اثر لـ طعنه او كدمات او علامات على رقبه المجني عليه، بس رغم كل دا واضح ان في شبه جنائيه، ودا بسبب الحاله اللى مات فيها المجني عليه وهو عريان وتشغيل التكيفات، اللى عمل كده كان عاوز يأخر من تحلل الجثه علشان الريحه ماتطلعش بسرعه وتتأخر ومافيش حد يكتشفها على طول.

-طيب يا دكتور، مش وارد يكون مات بطريقه طبيعيه، وكان مثلا في علاقه جنسه واللى كانت معاه بعد ما خلصت سابته ومشيت وهو اتعرض لـ ازمه قلبيه او أي حاجه مات بسببها.

وقتها الدكتور ابتسم وقال:

-رغم ان التصور اللى انت بتقوله يا فندم ممكن يحصل فعلا، بس الحقيقه فيها مجموعه كبيره من الصدف احنا مش بنقبلنا في شغلنا، والاحتمال اللى انت بتقوله ممكن يكون واحد في المليون.

-طيب قدرت تحدد سبب الوفاه؟

-الحقيقه لغايه دلوقتي لا، من المعاينه المبدائيه واضح انه تناول حاجه هي اللى موتته.

-تقصد انها حاله تسمم؟

-بردوا ماقدرش احدد دلوقتي، لازم اخد الجثه للمشرحه وهناك هقدر احدد ايه سبب الوفاه، بس احتماليه تكون جريمه قتل وشبه جنائيه فوق ال 95%.

-تمام، ايه المعلومات التانيه اللى اتوصلتولها؟

-المجني عليه زي ما حضرتك اتوقعت كان في علاقه جنسيه فعلا، ولقينا خصله شعر في ايد المجني عليه، وواضح انه شعر حريمي وطبعا كانت للسيده اللى كانت معاه في العلاقه.

-تمام يا دكتور، هتقدر تخلص التقرير النهائي امتي؟

-خلال 48 ساعه.

-شكرا يا دكتور.

وبعد ما خلص الضابط كلامه مع دكتور الطب الشرعي، اتكلم مع رئيس فريق المعمل الجنائي وسأله عن المعلومات اللى وصلها، وقتها هو رد عليه وقاله:

-اولا احنا فحصنا باب الشقه، واتأكدنا ان مافهوش أي دليل على انه اتفتح بطريقه غير شرعيه.

-تقصد ايه؟

-اقصد لو دي جريمه قتل، فالاكيد ان القاتل دخل وخرج من باب الشقه بالمفتاح بتاع الباب او على الاقل احب الشقه هو اللى فتحله الباب.

-طيب وبالنسبه للبصمات؟

-دي بقى من الحاجات المحيره، احنا لقينا مجموعه بصمات كتير في الشقه، والاغرب ان البصمات دي كانت في كل مكان تقريبا حتى في المطبخ، وحتى لقينا سكينه موجوده في غرفه النوم الغرفه اللى مات فيها المجني عليه، وكانت عليها بصمه شخص غريب.

-بس الطب الشرعي اكد ان المجني عليه ماتعرضش لـ أي طعنات؟

-دا حقيقي يا فندم، ومش قادر احدد هي ليه السكينه دي كانت موجوده في غرفه النوم بالتحديد.

-طيب قدرتم تحددوا لو حصل أي نوع من انواع العنف في الغرفه مثلا، او في أي حاجه مسروقه؟

-الغرفه كانت مرتبه جدا ماعدا السرير طبعا، والسبب لان العلاقه الجنسيه حصلت على السرير، بس احنا لقينا خزنه صغيره محطوطه في دولاب المجني عليه، وقدرنا نفتح الخزنه عن طريق خبير لفتح الخزن، بس لما فتحناها مالقناش فيها حاجه خالص، كانت فارغه تماما ودي طبعا حاجه مش مفهومه.

-في أي معلومات تانيه حابب تضفها؟

-لا يا فندم دي كل المعلومات اللى اتحصلنا عليها لغايه دلوقتي.

-شكرا.

ولغايه هنا خلص ضابط الشرطه شغله في مكان الجريمه، زي ما صنفها الطب الشرعي بشكل مؤقت، وكان محتاج ينتظر تقرير الطب الشرعي، وكمان نتيجه التحريات المكثه اللى طلبها عن المجني عليه.

وبعد مرور 48 ساعه دخل مكتب ضابط الشرطه واحد من معاونيه وقاله:

-احنا قرنا نوصل لشخص كان يعرف المجني عليه كويس اوي يا فندم.

-مين الشخص دا؟

-هي وحده واسمها انتصار.

-هي فين؟

-موجوده بره يا فندم، لحظات واخليها تدخل لحضرتك.