من اموت برودتك خليها عتابوت
وبيدك كون نعش جنازتي تطبگة
وخايلي دمعتك عل گبر نيشان
خاف بجفن گبري دموع ما تلگة
وخاف يمر وكت وتزورني من بعيد
تدليك بمكاني حروره الشهگة
لـ علي رشم
°غاية°
نوح : هذا عمي كاظم بوية
نزلت ثوبي بساع وطبيت من التوتر ضليت اباوع من عد شباك المطبخ ،أبوي طلع مستعجل ،ضلوا واگفين ما سمعت حسهم ،منا لمن ركزت وياهم سمعت صوته المألوف علي يسأل
كاظم : أبوي هنا ؟
محمد : أي شرايد منه خوية ؟
كاظم : چاي اعايده انا وعايلتي وأليوم ما امشي منا الا وانا مراضيه
محمد : التحجيه موش سهل
كاظم : حتى لو ،طب خوية بلايه أمر عليك گله يستقبلني ببيته لو امشي ؟
مارد أبوي وطالت صفنته ثواني واندار يطب ونوح ضل يم عمي ،مشيت وراه اطگطگ اصابعي مرتبكة وگف أبوي گبال جدي حاير منين يبدي ،حس عليه عده حجي
رأجس : شعدك واگف گبالي ،رايد شي مو ؟
محمد : أي بوية بس تطيني الموافقة گبل لا احجي
رأجس : وين صايرة اطيك الموافقة گبل لا اعارف شني الرايده
جر نفس واول مرة اشوفن أبوي بهل تردد هذا ،گعد گباله وجدي من شافه هيج وحاله مو طبيعي ركز وياه
محمد : شوف بوية ،انا الموضوع الراح احجي بيه كلش زين اعارف رأيك بيه ،بس هل مرة رايد منك تسمعني وتطي فرصه
عگد حاجبه جدي ما مفتهم المغزى من حجي أبوي شني ،باوع أبوي ل جدة
محمد : اخوي كاظم برا .
وسع عيونه جدي ونتر
رأجس : شعدده جاااي ؟
محمد : أيامنه عيد بوية وابنك جاي حتى يعايدك
دار وجهه على جدة خازرها من حجت وكمل يحجي
رأجس : گله يرد منين ما اجه
غضة : وروح أبوي لو مشى كاظم من القرية هسة امشي وياه وما تشوف خلقتي بعد يا أبو محمد
عيون جدي رادت تطلع بس ضل ساكت وجدة گامت وصاحتني تسألني
غضة : عمج برا مو ؟
_ أي
مشت تريد تطلع وجدي صاح وراها خلاها تندار
رأجس : والله لو حجيتي وياه ضله يمي ما الج بعد
غضة : ما كاتله روحي على الضله عدك
دارت وجها وطلعت وانا ركضت وراها اريدن اشوف لقائهم شلون راح يصير بعد كل ذيج السنين الگضتهن أم محرومه من ابنها ..! !
صاحت على نوح الچان مطي ضهره للباب ،ضليت واگفه بمكاني وهو فتح الباب من سألته على عمي وطل عليها، وجه بوجه صاروا نشغت جدة من شافته ابد فلا انساها، نسى روحه ونسى هو دوسة هذا البيت متحرمه عليه وطب گاصد جدة الواگفة گباله وفاتحتله ايدها
غضة : يمةةة كاظم .
حضنته بقوة وهو مدنگ عليها حاضنها ساكت ،حضن ينهي فراگ سنين بين أم وابنها
غضة : "يابعد طوايف گلبي هل طول"
تباوعله گبالها ما مصدگه عيونها تشوفه ،أبتسم وعلت شواربه المختلط وي لونهن الشيب ،الشبه بينه وبين أبوي عجيب ،حتى نفس الابتسامه بس الفرق الشامه بوجه عمي...
بأست چتافه
غضة : الله ما حرمني شوفتك گبل لا اموتن .
كاظم : عمرج طويل يمة
غضة : يابعد امك صار شگد ما سامعة اليمة بحلگك
وگف بصفي ،حط ايده على چتافي
ليث : شوفي عمي شگد يشبه أبوي
_ كلش ،والله لو غريبة انا فلا اميز بيناتهم
ليث : چن توم مو ؟
_ أي والله
انداريت انا وليث على صوت جدي ورانا
رأجس : رجل التعتب باب بيتي تنكسر، لازم تناسيت حجاياتي يبن الغضب؟
كاظم : ما نسيتهن بوية .
نتر
رأجس : انا موش ابوك ،من ساعة الطلعت منا
اشر على الباب
رأجس : وايدك بأيد بت غازي مات طاريك عدي
تلفتت اباوع على كل الواگفين يباوعون بلايه ما احد يتدخل چن صار الوكت ولازم يصفى الحساب ولو تنسد لو تنحرگ الدفاتر القديمة وبين العتب والغضب كمل
رأجس : انا گلتلك طلگها واخذلك تاج رأسها .
ضغط على ايد جده الكاظه زنده
كاظم : عدي منها بزر بوية مالهم ذنب يطيحون بمشاكلنا .
رأجس : ماعدي مشاكل انا .
كاظم : چنتوا صحبه بوية، وتذكر ساعة الاجيت وگلتلك بوية انا حاب بت صاحبك ورايدها، أنت السعيتلي بيها ،وبعدين ردتني اطلگها وهي كل ذنب بالصار ما الها، وتذكر زين گبل لا نطلع من القرية بيوم دنگت على رچليك وگالتلك عمي حتى اهلي ما امشيلهم بعد والتريده يجرالك بس أنت عاندت وكلمتك ما لازم تصير ثنين وما خليتلي حل غير اخذ مرتي وجهالي وأمشي من القرية
رأجس : كسرت چلمتي ،وموش انا التنركن قرارتي وتمشي برأيك
كاظم : بكلشي وياك ،وساعة البيها لچحتوا چسار انا هديت وياكم عليهم وما حطيت اعتبار انا نسيبهم
رأجس : هذا ما يبرر فعلتك، منين ما أجيت ترد
اتوقعنا موقف جدي تغير بي ضل ثابت برايه ،كضت جدة عمي كاظم من راد يطلع وبحرگه هدت على جدي
غضة : مثلك بشر لا مر ولا راح يمر علي ،الحقد الشايله گلبك اضن لو غسلته بماي زمزم هم ما ينضف
خزرها وبس راد يجيها اعترض دربه أبوي ،صيح
رأجس : لا تحطيين رأسج براااسي غضة
غضة : انا بت خبيررر وتعارفني شني ،الحگ احجيه لو وراه مووتي
رأجس : راح اسب حتى ابوووج الورطني بيييج
غضة : عشتووو ورطوه، جا منو كتل روحه علي
دفع أبوي يصيح و وي أبوي وگف عمي باقر
رأجس : انعل اهلكم، هدونييي عليها اخليها تمشي مكسرة وي ابنهاا
محمد : والله زحمة بحق شيباتكم
باقر : بشبابهم ما تعاركوا هيج
غضة : گلوله يصالح اخوكم وانا بعد ما افكن حلگي وياه
بنص ذيج الأجواء المتوتره جفون مغطية وجها بالشال وگاعدة ،جسمها يتهز من الضحك ،غطيت حلگي وانداريت على نوح الواگف وراي وعيونه عليها ،غمزتله
_ هااا، شو تباوعلها ؟
تلفت يريد يضيع السالفة
نوح : ما مباوع
_ مو على الاساس الچذب حرام ؟
نوح : ما مچذب
_ احلف .
نوح : كافي لا تلحين
ما لحيت عليه مثل ما راد وانا كلش زين اعارفه عيونه ما توگع منها لو مرت بس يكابر ،خاطره مكسور منها وحگه ...
محمد : بوية احفادك برا ،زحمة ضالين بالسيارة وجدهم ما يستقبلهم
رأجس : خلهم يطبون بس هذا ومرته يردون منين ما اجو
اطانه ضهره وطب، مسح وجهه يشتغفر
كاظم : استغفرك ربي ،اللهم يجيبج يا طولت البال
طبطب على ضهره أبوي
محمد : العافية بالتداريج ،اليوم رضى يستقبل اولادك باجر يستقبلك أنت ومرتك
غضة : أي والله يمة ،صح حجي اخوك
كاظم : الله كريم
باقر : امشي نوح خل البنيات يطبن
غضة : جا وسياف ؟
كاظم : طالع يم صحبانه
غضة : خابره خله يجي
أبتسم
كاظم : صار
عيني على الباب متانيتهن يطبن ،أبتسمت من شفتهن ورا نوح يمشن وحده كاظه ايد
الثانية ومبين المستحى بملامحهن ،العيون كلها عليهن عمة عطاء مشتلهن هي وميمنة وانا
ضليت بمكاني واگفه اباوع لوحده منهن، وبساع تذكرت بصائر على گد ما تشبها ...
غضة : تعالن ليه جده
مشتلها التشبه بصائر اول شي ،بوستها جده وبفرح بشوفتهن گالت
غضة : أنت سيوف مو ؟
سيوف : أي جدة
ردت باستها مرة ثانية وصاحت للثانية الچان حاضنها أبوي ،هداها ومشت لجده ،وجده ما مصدگه شوفتهن حتى من مشى عمي وطبينا ضلت مگعدتهن كل وحده من جهه بصفها
همستلها
_ امشي صيحيهن يچن يمنا خوما يضلن گاعدات هيج
جفون : جدتج ما تطيهن مبينه
اتأفأت ونزلت ردن ثوبي
_ كملي المواعين وانا امشي اصيحنهن
جفون : اهووو
_ اشتغلي لا تصيرين خايسة
جفون : انا خايسة من زمان شني ما تعارفين ؟
ضحكت ومشيت للصاله وهي وراي ضلت تدردم وچن انقاذ اجيتهن چانن گاعدات و عمامي و الولد گاعدين وهن غاديات دم من المستحى
_ جدة خلي البنات يگومن يمنا نتعرف عليهن
غضة : چا ما كاضتهن انا
وبس هيج گالت گامت الزغيرة وشمرتلي بوسه ،أبتسمت وگلت
_ سيوف تعاي أنت هم
گامت تعدل بشالها كلساع يريد يطيح من رأسها كضت ايدي وجرت نفس ،وبس شافتنة طبينا للمطبخ گالت بأبتسامه وهي توجه لكلام لسيوق
ميمنة : وجهج غادي دم
هفت على وجها
سيوف : گضه عمغي ما گاعده هل گعده بين هلگد ناس
ميمنة : لازم تتعودين منا وجاي
هزت رأسها ب أي ،بلعت ريگها وبصوت ناصي مكسور گالت
ميمنة : هواي تشبيهن اختي
سيوف : مني منهن ؟
ميمنة : بصائر ،أم عون الزغيرون
رمشت بعيونها حايره شني التحجي ونبرة صوت ميمنة كافية توصل الحسره الي بگلبنه كلنه بأبتسامه حتى لا تخلي الحزن يغيم على المكان ،فتحت ايدها تاخذ عون من ميمنة ،حطته بأيدها وهو يحرك بروحه ما مفتهم شي من دنيته بعد غير اللعب
سيوف : شگد حلوو، شتوكلوه عسسل
بأسته من خدوده وهو همش الحجاب من رأسها ضحكت وجرته تعدله على رأسها وتحجي وياه
سيوف : ليش وكح أنت ،هااا ليش وكح
تحاجيه بضحك وهو يكركر
_ السلام عليكم
باوعنا للباب كلنه وردينا السلام عليه ،هستوه تحرك يريد يطب ما مركز ولا منتبه على وجودها بيناتنه الا بعد ما بصوت خافت گالت خلته يوگف بمكانه باهت
سيوف : ميمنة اخذي عون
اخذت عون منها وعينها على اخوها الي نگلب حاله كله ومن سألته حسيت بيها تريد تشتت عيونه منها لان شوي بعد وتختفي البت من نضراتع عليها
ميمنة : شعجب نزلت هسة مو على الاساس باجر ؟
اندار عليها، مسح وجهه چن الحروف ضاعت وما يعارف شلون يجاوب ،كلنه نعارف بيه شگد يحبها بس اول مرة نشوف مشاعره بهل شكل هذا ومو بس حجي ، عدل بدلته العسكرية يدير عيونه بأمكان عشوائية
برهان : اطونه يوم عيدية
ميمنة : هذا أول عيد عدك من صدگ
أبتسم وهز رأسه ،مدري ليش حسيت المقصد مو على جيته، لا اكو شي ثاني ومن شفت البنات كلهن مبتسمات تأكدت من تفكيري
فلا تگعد راحه حجيها صرت افتهمه وكل حجاية اگعد احللها...! ! !
باوعلها بشكل طبيعي سألها ما چن هو نفسه گبل چم دقيقة ،شلون هيج يگدرون يتمالكون اروحهم شو انا اذا حجه وياي عزيز احسن الدنيا كلها عرفت اذا مو انا احجي عيوني تحجي ومن اريدن اضم على عمة عطاء تلجحني ومثل كل مرة تگلي فاضحه روحج وتكضني بدرس تعلوم وما يفيد ابد وياي
برهان : شلونج ؟
مدنگه وردت عليه
سيوف : الحمدلله بخيغ
برهان : ضلي دوم بخير
رفعت رأسها باوعتله وردت دنگت بساع وانا گد ما مركزة وياهم وفاتحه عيوني حسيتهن دمعن ،غمضت فركت عيوني وحسيت احد يندسني
اندارت عليها
جفون : تعاي خلينا نلم المشاعر تطشرن بالگاع
غطيت حلگي ما اريدن اضحك وهي كملت
جفون : شلون لقاء حلووو ،گضيت عمري اتاني جيتها
_ انا أجيت ابجي
جفون : ليش ولج
_ تأثرت
غمتني
جفون : خوبين أنت ضلي متأثره وي الرايح والراد
چانت صافنه وفجأه گالت
غمد : اگلكم جا شو بس سلم على سيوف جا مو انا هم وجه جديد عليكم
جفون : حظرة الضابط يسلم بس على الي يعجبوه
غمد : هاا
غمزتلها ميمنة وهي ولا جنها ردت
جفون : وداعتج
غمد : جا شبي انا اخبل ،بس عيوني يطيحن أكبر واحد
جفون : صااارت حارة
ضحكت غمد وطگتها على ايدها
غمد : انجبي والله جاي احجي الصدگ
ميمنة : صدگ عيونج حلوات ولونهن شوي غريب
غمد : حتى ابوي يگول بيهن غرابه على وراثتنا
ميمنة : صح
باوعت بعيونها وانا اگولن
_ سيوف كلش صفر ،چنهن عيون هيفاء .
أبتسمت وبساع حمرن خدودها ،ضحكت وكضت خدودها
جفون : شوفن لو هيج الانوثه لو ما تراد خوما مثلي انا وصاحبي چن زلم لا مستحى ولا خدود حمر
ميمنة : والله بس أنت الزلمه صاحبج فاره اخوي فر ذاك حق الما يتحاجه من تگله حقوق يگلها صار
جفون : جا لازم اشوفن حل لروحي
ميمنة : أي لازم جا هم خطية أبو السفينة
جفون : اهووو
غمد : ياهو أبو السفينة ؟
طبت عمة ومبين سامعة سؤالها
عطاء : هذا ابن عمج محمد الزغيرة ،عاشگ هاي الشحمة وهي ما تريده
سيوف : بسلا هذا الطببنه ؟
عطاء : أي ،شفتي شلون حلو وهي ما تريده
سيوف : يا ليش ما تغديه ؟
عطاء : متعافيه غير
غمد : خايبة شبيج جا غير ولد العم ستر وغطى
جفون : الستر اخذوه الكم والغطى هم وخله يكتلني البرد وكلشي ماريد يلااا
ضحكن على ردها بنص عصبيتها تچفص هل چفصات وتخلينا نضحك ،درت على صوت ليث يصيحني
_ هااا ليوثي
مد رأسه من باب المطبخ
ليث : شووو تعاي
_ يمةةة شكوو خوفتني
ليث : تعاي بساع وافهمج
لحگته من صعد فوگ يركض، طبيت وراه للغرفة اسأل
_ شبيك ؟
يفتر بالغرفة مشدوه ،دنگ جوا الچرباية يباوع ،ورد علي
ليث : الكتر ماكوو
صفنت عليه، علمود الكتر هيج گالب الغرفة بحيث حتى الدوشگ مال جرباية منزله للگاع ،اندار علي
ليث : دوريه وياي غاية
مدري شلون درت عيوني وانتبهت چان طايح بين الجرباية والميز الزغير بصفها ،مشيت رفعته
_ ليث هذا لگيته .
اندار علي وطبگ باب الكنتور چان يدور بين غراضه،اخذه من ايدي ولبسه بساع
_ هذا كترها ضاع وهيجي صار بيك ،جا شحال گلبك خوية
تنهد وجر نفس طويل، گعد على الچرباية شعل چگارة يدخن وبلايه ما يباوعلي گال بغصه حسيت بيها بحنچرتي مو حنچرته
ليث : اختفت هي وياه ،فص ملح وذابوا، خايف عليها منه
_ بس هو رجلها
ليث : حرامات ينحسب عليها رچال ،لج غاية الوگن الها انا والله
_ هاي قسمتها بعد
ليث : ردتها وهواي تمنيتها
_ جا ليش سكتت كل هاي السنين
ليث : ما چنت اضن بروحي هلگد عاشگها ،نوبات هواي اتمنى اگدر اكمل وي غيرها بس من تتراوح عيونها بين عيوني اتراجع
_ خوما تضل هيج ،اول تالي لازم تكمل حياتك لا بيوم تتندم على ايام شبابك الراح يگضن بالتمني
ليث : ادعي يطلگها
_ وتاخذها
ليث : لو عشر جهال وراها
_ وجدي شلون تقنعه ؟
ليث : اهدن كلشي لخاطر عيونها
ما عارفت بعد شني ارد عليه، أخوي واصل مرحله صعبه ،نزلت وخليته گاعد فوگ ومن سألني البنات شرايد منج طلعتلي چذبه
_ موصيني اكوي قميصه الجديد وناسيته
عبرت عليهن كلهن الا ميمنة لگيتها تباوعلي مزغره عيونها ومن طلعن البنات للحوش جرتني بصوت ناصي تحجي
ميمنة : جا مو امس كويتي القميص وحتى اطيتج هدوم صخر كويتيهن وياج شو صايرة تچذبين ولج
_ جا شسوي
ميمنة : شبي ليث ؟
_ مو مايصير احجي
ميمنة : حجالي صخر
_ على كوكبة ؟
هزت رأسها ب أي
ميمنة : تمنيته صدگ ماخذها، ليث خوش ليث چان عوضها على الظيم العايشته يم اهلها
_ تبقى امنيات
ميمنة : صح ،كلشي يصير ويانة بتقدير رب قدير
أبتسمت
_ احب من تحجين هيج
ميمنة : وانا احب من تحبين شنو احجيه
دنگت شالت عون الكاض ثوبها
ميمنة : مايصير تنزل بالگاع شوي يعني ،هاا ولك ما يصير
تكركره وهو يضحك يضم روحه بين رگبتها وچتفها شمته من رگبته ،جرت حسره تردد
ميمنة : حبيب خالته ،عون الزغيرون
_ نطلع برا يم البنات ؟
ميمنة : يله
مشت گبالي وانا وراها مثل المهرج اصفگ لعون الداير وجهه علي ،هلگد ما وجهه بشوش اريدن احطنه بلفه واكله ،تلفتت اسألها
_ جا وين البنات ؟
ميمنة : هناك
اشرتلي على شچرة النبگ ،گاعدات جواها ومن كبرها اغصاناها نازله تتحرك وي نسمات الهوا، مشيت گبلهن ،باوعت الايدناتهن كل وحده شايله صم نبگ
_ هااي منو صعدت ؟
جفون : القرد
_ ماكو قرد هنا
غمد : قصدها انا
_ شصعدج ولج
غمد : جا تردين اضل اباوع على النبگات وهن يتحركن گبالي وچماله مستويات زايد غير اموت
ضحكت وهي تحجي منفعله وتاكل ثنين ثنين
ميمنة : سولي مجال اگعد يمچن
تدنت سيوف وميمنة گعدت بصفها
مسحت ايدها وگامت
جفون : لا تحجن خلي اجيبن نبگ بعد
ميمنة : تطيحين
جفون : لا كلشي ما يصيبني
غمد : لان عاره
جفون : گولي عمن صيري مره خشنه
غمد : مره وخشنه ،شنو السالفه
جفون : خلي اجيبن نبگ واتفرغلج حتى اعلمج شلون الحجي يصير ،چماله تگول شنو مو شني
مشت گبل لا تسمع رد غمد ،كل ما التفت اشوفن ميمنة عيونها بعدهن على چفون الصاعده على غصن الشچرة الچبير ،منا لمن نزلت الا ردت طبيعي تحجي ويانه
جفون : باعن نتفق ابيعن كل صم بربع
كلنه گنالها
_ مانريد .
ضحكت وگعدت حاطه السله بالنص
جفون : چذب اتشاقه وياچن ،اكلن سم وزهر مر
طگيتها والبنات صاحن بيها وهي تضحك
جفون : اقصد صحة وعافية ،اكلن
باوعت للباب من انفتح وطبوا ضيرم وهيوفة ،ايده حاطها على چتفاها ويمشون
غمد : منو ذولي طيور الحب
أبتسمت وصحتها
_ هيوفة تعاي .
تلفتت تدور على أثر الصوت ومن شافتنة حجت وي ضيرم ،هو طب جوا وهي اجت علينا
گبل لا توصل اشرت على البنات وهن وگفن يسلمن عليها
هيوفة : هذا الجمال راجع النه موو؟
ميمنة : أي ،بنات عمي كاظم ،سيوف وغمد
بوستهن ترد على ميمنة
هيوفة : والله عارفت گلت هل اشكال الحلوة النه بالاخص العيون
ميمنة : سيوف كلش تشبه عيونج
هيوفة : يشعن شع اللهم صل على محمد وآل محمد
ضحكت اباوعلها شوي وتختفي
_ ساحت من الخجل البت
هيوفة : ياعيني لازم تتعودين باچر عگبه وراج غزل ثگيل
جفون : ديلا يلا ويردوني اعقل وعاقلتنه طالعه عينها
هيوفة : أخر شي اتوقعه أنت تعقلين
جفون : أصلا لا تتوقعين وتتعبين
ضحكت تهز ايدها وأجت گعدت بصف ميمنة الضلت گاعدة لان عون نايم بحضنها، مسحت على شعره
هيوفة : مو چن ضعفان ؟
ميمنة : جاي يذبل منوره سنونه
هيوفة : سوده علي ،نوبه الدنيا حاره
ميمنة : والله متانيه الشتا يوم يوم
هيوفة : حگج ،گومي وديه جوا
ميمنة : ماگدر رچلي كلش نمنمت، اخذيه أنت
نزعت عباتها وگامت شالته ،كض ثوبها حيل
هيوفة : عباله أنت
ميمنة : حتى من ينام بالليل هيج يكضني
هيوفة : وين اوديه ؟
ميمنة : جوا خليه بغرفتچن لان هسة شوي ويگعد
هيوفة : خوش
مشت توديه وانا رديت مركزة من سألتهن
جفون : يعني عود صدگ چنتوا بأيران ؟
سيوف : أي ،ضلينه فتغه بالعغاق بين ما أبوي كمل معاملاتنه والجوازات وطلعنا
_ شلون عشتوا هناك ؟
سيوف : لهسه اتذكغ شگد بجيت وكل ما اضوجن اگلهم غدوني للقرية يم غيحانة
_ ريحانة دوم تذكرج
سيوف : مشتاقتلها
_ گبل لا تجون مشن، احنا متعلمين مصباح كل عيد نلتم للظهرية
سيوف : هناك فاغگت كل اللمات، لا طلعة ولا طبه
اجت گعدت تسألها
هيوفة : سمعت بيج تدرسين
سيوف : اممم، منين سمعتي ؟
هيوفة : من ضيرم من أجاكم گبل چم يوم
سيوف : صحيح، انا مغحله اخيغه هندسة أجهزة طبيه
هيوفة : وحلو هذا التخصص؟
سيوف : حلو بس مو سهل ،لان المغحله الاخيغه حيل تعب
هيوفة : يلا ما ضل شي ،وأنت غمد
غمد : سادس صرت
هيوفة : وي بركة
غمد : أي انا وياها نفس العمر
هيوفة : شلونها دراستكم هناك ،وشلون تعلمتن تحجن فارسي
سيوف : انا وسياف زينين بالفاغسي بس لا أبوي ولا امي تعلموه ،وغمد عود مشت هناك زغيغه بس مو كلش قوية بيه
جفون : ليش ما تعلمتي عاد تعلميني
غمد : يمعودة شسوي بيه اشو احنه گاعدين بمنطقة كلها عرب
ضلينه من سالفه لسالفه، وطشر لمتنه صخر من اجه وصاح ميمنة ،تدنيت عليها
_ صايرين هواي يتخنسون مدري شعدهم
خزرتني
هيوفة : وشعدج مركزة وياهم رچال ومرته
_ لا والله تغشمين روحج .
هيوفة : لا تتدخلين
_ ترا كبرت مو جاهله .
هيوفة : بعدج هلگدوتج
_ تشوفيني گصيرة عبالج جاهله ،ترا الصوج بيج كلش طويله أنت
هيوفة : اناوشج شوي طول لان راح تضيعين يم هذاك الواحد
_ هاا
هيوفة : ضاع لسانج ،دوريه مو هستوج مادته علي لو من ينجاب طاريه تفشين
_ مو نفاخه انا
هيوفة : سوالف جفون عوفيهن
ضحكت وگمت طبيت جوا ،ما اعارف شني يصير بروحي من ينجاب طاريه، شعور الاحسن بيه كلش غريب ما مر عليه من گبل مثل نسمة هوا باره بجو الحر تلامس روحي وتخلي اثرها كركبتي بأحرف اسمه من ينحجن ...
عندما ارادت أن تصف مشاعرها المتكركبه قالت :
كنسمه هواء بارده وسط جو الصهد
جفون : وين صافنه الجايبة راس المحامي ؟
حطيت ايدي على حلگي
_ شبييج ،ولج لا يسمعج احد
جفون : واذا ما سمعوا ،مو على الاساس حتى عمي يعارف بيه رايدج ؟
_ ميخالف بس ما صاير شي رسمي
جفون : وأنت اذا تضلين هيج ينجلط الزلمه گبل لا يصير شي رسمي
_ يااا شمسوية
جفون : المشكلة كلشي ما مسوية
طبت هيوفة وراها سيوف وغمد ،مشيت للصاله بساع من سمعت صوت أبوي يصيحني بس شافني گال
محمد : جا وين بنات عمج ؟
_ بالمطبخ .
محمد : امشي صيحيهن جدج يريد يسلم عليهن
باوعت لجدي يفر بسحبته چن ما راضي ومبين أبوي ضاغط عليه لان بس اجن هو طب بحجه ينام وتعبان
وبس گتلهن جدي يريد يشوفچن وحده صفنت بوجهي الثانية
سيوف : جدي رأجس
غمد : جا منو غازي، شبيج سيوف
سيوف : باعن ،انا احس ما طايقنه
جفون : حبيبتي تأكدي
هيوفة : يااا شبيج جفون
جفون : اتشاقه وياهن شبيج
هيوفة : يا شقة هذا
غمد : شقه لو بيت
جفون : قديمة وما تضحك
غمد : وانا ما گايتلج اضحكي
أبتسمت نهاية كلامها
_ هسة شلون ترا أبوي گال صيحيهن
باوعت لسيوف
غمد : انا احترم اختي الچبيرة ولازم هي اول شي تسلم على جدي
سيوف : أنت تحتغميني ؟
غمد : من اليوم داعتج
سيوف : لا غاح اصدگ
مشت كبل غمد وانا وهيوفة وجفون لحگناهن وبس شافهن أبوي صاحهن
محمد : تعالن عمي سلمن على جدچن وعايدنه .
اول شي سلمت عليه سيوف وراها غمد وهو رده چان كلش جاف وياهن عكسنه ،تنهدت عيني عليها مبين قهرها والهضمه بعيونها مبينه تخاف ترمش لا تطيح دمعتها الي بطرف رمشها ...
بلايه ما احس باوعتله، ما حس علي وما نزل عيونه منها ،كضيت ايدها وطلعت من الصاله حتى لا يصيرله موقف وي احد وينحرج لان الظاهر هذا هم ما يگدر يسيطر على عيونه...! !
بس سألتها
ميمنة : شبيج سيوف ؟
طاحت دمعتها وشهگت
سيوف : انقهغت من جدي
ميمنة : شني ،شحاجاج جدي ؟
سيوف : ما حاجاني ،بس حسيت غوحي منبوذه عده
ميمنة : لا تضوجين ياخذله فترة ويصير يعاملچن مثلنه ،عليش تبچين ياعيني
مسحت عيونها
سيوف : انا استهضم بساع
ميمنة : جا لو زامخ بيج شلون
طبت وگفت يم اختها، طبطبت على چتفها
غمد : صيري مثلي ،اخر همي شلون يحاجيني
سيوف : ما اغيد اضل هنا
ميمنة : ما صار هواي من اجيتن وين تمشين
سيوف : ما اتحمل ابقى بعد ،عليج الله حاجي احد يوديني
طب يسأل وهو كلش زين يعارف شني الصاير
برهان : شصاير ؟
ميمنة : سيوف تريد ترد لبيتهم
باوعلها بحس خافت گال وهو عيونه على عيونها المتغير لونهن أثر بجيها
برهان : بعد وكت ،بالليل انا اردنجن
سيوف : اغيدن امشي هسة الله عليك
انا كسرت خاطري وردن احضنها شحال هو ،حسيته جبر روحه يكابر ويضل واگف ويبين الوضع طبيعي عد گلبه
برهان : ما راح يرضون، وعد انا اردنچن بالليل
سيوف : والله
أبتسم
برهان : والله
وگبل لا يمشي گال لميمنة
برهان : خليها تغسل وجها
هزت ايدها وغمت روحها وردت غمتني
جفون : انا وياج نضل بس نباوع
_ انجبي المتعافية
جفون : شلون راح اوكلها عسل هي واخوها
_ عسل مو ؟
جفون : وداعة النحله
زغرت عيوني ما مصدگتها ،ولليل وردت اللمه مثل الصبح وأكثر ،وبيناتنة هن گاعدات مستغربات الوضع وبعده جديد عليهن بس يحاولن يتأقلمن، جده طايرة بين وما مصدگ كلساع وبايسه وحده بيهن
گامت متخصره تداهر بجده
هيوفة : خوب جدة انا نسيتيني واكو من اخذ مكاني
غضة : خايبة ما مصدگة شايفتهن انا ،لا تغارين
هيوفة : لا جدة شلون ما اغارن، أصلا راح ابجي
تحجي وبالگوة كاضه ضحكتها واحنة نضحك على مداهرهن
غضة : لا تزعلين شعدي غيرج انا چم ريشة، هي وحده
جفون : وخذاها ضيرم وخلانه ننساها
غضة : أي وروح أبوي ما حجيتي غير الصدگ ،ليش ما تمريلنه يجده ؟
هيوفة : جدة مو تعارفين بضيرم ما صار هواي من ردتله ذاكرته وبعده متأذي ،سوده علي ليليه رأسه هايج عليه
غضة : رد لشغله ؟
هيوفة : أي جدة رد
واحنا ملتمين على العشا طبت عمة خالدة ،سلمت وضلت واگفه
خالدة : جا بالصدگ والچذب ودوا علي ،لو انا منسيه
غضة : انا اعارف بيج عد اهلج
خالدة : عايدتهم ورديت عمة
زهرة : ما صار شي لا تضوجين وتعاي اگعدي ويانه
خالدة : لا عليش اضوج بالاصل تعلمت
اجت گعدت بصف امي ،واحنا ملتمات بالمطبخ قسم يغسلن المواعين وقسم على الجاي اندگ باب المطبخ گلت اكيد واحد من اخواني ،بس من فتحته شفته برهان
_ ها خوية ؟
برهان : بعد اخوج گولي لبنات عمي يتحظرن اوصلهن
_ صار
ضليت كاضه الباب وانداريت عليهن
_ غمد وسيوف برهان برا يگول تتحظرن حتى يوصلچن
عطاء : يااا وين يمشن؟
_ للبيت
عطاء : امي ما ترضى وحتى گالتلي انزل فراش من نضدتها الهن
سيوف : لا عمة نغد
عطاء : خايبة وين تغدين ،والله اگولن الأمي
صفنت حايرة وبنفس الوكت من برا اجانه صوته
برهان : عطاء لا تلحين عليهن البنات يردن يمشن
وخرتني وطلعتله
عطاء : عطاء بعينك خايب هازه كاروكك
برهان : لا لاعبين انا وياج سوا
عطاء : ما يمشن يله ورد منين ما أجيت
برهان : شوفيهن يرضن يضلن
عطاء : مو بكيفهن ،يله منا أبو الصور مو لگيتها حجه
برهان : ماشي بديتي تفضحين المستور
عطاء : واذا تريد استر المفضوح هم عادي بس حرك جيبك وكلشي تريد انا بالخدمة
برهان : اهاا، هنا الحجي
عطاء : وداعتك چزداني فارغ
برهان : ماعدي عذريني
عطاء : نايم عليهن مثل عزيز
برهان : انا صعب عمة ما تگدريلي خاف گدرتلي العزيز ،انا وضعي وحدي ارتبه
عطاء : مترهي
برهان : فوگ ما تتصورين
يحجون بصوت مو كلش عالي بس انا كلش قريبة عليهم وسمعت كلشي ،وخرت من الباب من اندفع وطبت
سيوف : التفتح حلگها وتگول امشي احجي الامي عليها
اندارت لسيوف
غمد : سمعتي ،خاف الج نيه تحجين
سيوف : غاح اسكت احسلي
طبت شايله حوراء
حواري : اكفلچن المواعين كلهن بس اخذنها مني
ميمنة : لوتيه شفتي السمك فارغ وهيج حجيتي
عطاء : اطينياها
اخذتها عمة وهي گعدت فحطانه
حوراي : انا ويني وين الزعاطيط
ميمنة : لا تنسين اكو واحد ببطنج هم
حواري : لا تذكريني فدوة خليني متناسيه
خالدة : نساوتج هل مرة شلونها؟
حوراي : احسن من اول مرة ،اضن تعودت
جفون : صرتي بزون
حوراي : انجبي بالغلط والله
عطاء : يحبلن ويصيحن بالغلط، اسكتي اسكتي
ردت ضهرها على الحايط تحجي
حواري : وانا عودن گلت اكبر زعاطيطي واعيش حياتي
جفون : تالي هم حبلتي
ريحانة : كافي جفون لا تخبليها اكثر
حواري : شني قصدج ؟
ميمنة : ما تقصد شي شبيج روحج بخشمج
حواري : اسكتوا محد يحس بي ،احسن روحي متورطه بحق وجهاله
بركة : مو احجيله
حواري : واذا ما حجيتي
بركة : نسيت صلفه وما تخافين لا من حق ولا من غيره
حركتلها حواجبها وتمددت بالگاع مسحونه روحها
ميمنة : تگول زينة وهي من هسة هيج ،جا تالي شلون
هيوفة : ما شايفتها من تجينه ،لا تگعد ولا تسولف تشمر الجهال علينا وتنام
ميمنة : حگها ما متعلمه على هيج مسؤولية
من طشوا كلمن البيته طبيت افرش ولحگني هن وريحانة ضلت علمود سيوف ،گعدن يسولفن وانا اسمعلهن
سيوف : يعني تزوجتي ؟
ريحانة : أي ، گبل ست سنين
سيوف : شعجب غضى جدي يطيج لغغيب ؟
ريحانة : انا ما ردت واحد من اولاد عمي عمن اعتبرهم اخواني
سيوف : اممم ،انا تفاچئت من عغفت ميمنة مغة صخغ
ريحانة : تلوگله ميمنة ،حتى تشبه شخصيته
سيوف : صح
گعدت على الفراش گبالهن وطبت عمة عطاء ،گعدت ويانه ومدري شلون اجه براسي اسألها
_ عمة عود صدگ رايده تشردين وي چسار ؟
چانت تحجي وي سيوف بس من سألت سكتت واخذت صفنه بوجهي وراها ردت متحسره
عطاء : ريتهم ما كاضينه ومن صدگ شارده وياه ولا هل عيشة هاي
_ شلون گدرتي تخطين هيج خطوة اشو انا اخافن من خيالي
عطاء : انا من يوم يومي هيج ،لسان وما انگدر
أبتسمت تكمل
عطاء : چنت من اشوفنه دوم يگلي گصري حسج تغزينه وراح تنحجي حجايتنه
تنهدت بنفس ابتسامتها
عطاء : وراها من صدگ انحجت وصرنا سيرة على كل لسان
غمد : عمة احجيلنه، عدي فضول اعارف عن الحب المخرب
عطاء : حب مخرب ومفرگ اصحابه گبل وادمهم
جرت نفس طويل
عطاء : الحجي هواي
غمد : احجي عمة انا احب السوالف
"فلاش باك"
دنيا بارده والجو يگص گص من برودته بس انا ما انكض وحلفت الا اطلع ورا اخواني غدروا بي وما اخذوني وياهم احوشن الخضره
حطيت العباة على راسي وبالبوگه من عيون امي طالعت ،ضحكت وغطيت وجهي لا يلجحني احد عودن هناك اتفهام وياهم ،وبس وصلت كشفت وجهي ومن بعيد شافني محمد ،خزرني وانا أبتسمت بوجهه اضيع ضوجته اريدن لان ماكو غيره يوگف وياي من يصيرون الباقين ضدي ،نزل الگونيه من ايده واجاني بساع
محمد : شجااابج ولج ؟
_ جا مو وعدتني تجيبني وياك ،ليش خليتني انامن وأجيت ؟
محمد : شعدج جاية لشلاع الگلب
_ ماكو شلاع گلب وأنت موجود ،بس ردت اتونس شوي اختنگت من البيت
محمد : امشي اگعدي غاد يم الساگيه
_ جا مو احوشن
محمد : مو اليوم باجر
_ جا شتسوي جاي أنت ؟
محمد : شگد تسألين ،امشي اگعدي شوي ونرد
هزيت رأسي ب أي ،وثاني يوم لزگت وياهم والا تاخذوني ،يوسف ما رضى بس محمد قنعهم وابوي ما يرفضلي طلب عمن انا بزر الگعده والمدلله عده
اندار علي
محمد : ضمي ضفيرتج كلساع وتبين من العباة
چنت حاطتها على چتافي ،وخرتها حتى لا تبين بعد من اتحرك والعباة تفتح ،كاضه فالينته وأمشي وراه اخافن لا يلوح رچلي الشوك وبس وصلنا عد المكان گال
محمد : ما اريدن اسمع حسج ،اولاد غازي قريبين علينا
_ شعدهم ؟
محمد : جا غير اراضيهم وعدهم شغل بيها
_ حضي هذا عودن اريد انزع العباة
محمد : دسكتي سكتي
جراني ورا ضهره ورفع ايده من يرد على الحاجاه
محمد : شعدكم اليووم ؟
_ المكاين خربانات متشوف حال الظيم حالي
محمد : گوول الابوك يحرك جيبه ويجيبلكم جديدات
_ يمعود شتحجي أنت
محمد : يلا اطيني ضهرك ورد لگيعانكم
_ هاي من شوكت لك
محمد : من اليوم
ضحكة عاليه صارت واجه واحد ثاني يسأل
_ شصاير
رد عليه الاول
_ ماكو شي بس خانسله على وحده مبين
محمد : زحمة اغلط، عمت الجهال هاي .
_ اهااا ،جا ليش ضامها ورا ضهرك ؟
محمد : من العاريه العيونهم بيها ملح
_ شقصدددك ؟
محمد : مو عليك ،صاحبي أبو غريب ،بس وياك الموجودين وعرضي عزيز
_ جا اخذوا راحتكم واسف على الازعاج
تسالموا من بعيد وانا جريت فالينته اردين احاجيه گبالي هو كلش طويل وانا چن فصمه
محمد : هااا شكو ؟
_ هذا مو ابو غريب الماتت حرمته ؟
محمد : أي ،يلا حوشي خضراتج حتى نرد لا يجينه يوسف
_ الحقنه
خزرني
محمد : لج
_ يضوجني هواااي
محمد : وأنت لسان وهم ما تسكتين
_ جا هو يغثني
محمد : عوفج منه يلا بساع گبل لا تصير الغروب
بساع حشتهن وردينا، تلگتني
ميمنة : عمة ليش ما اخذتيني وياج ؟
_ مرة الجاية اخذج
ميمنة : نشوف
_ والله اخذج ،حلفت بعد
ميمنة : خوش
أبتسمت بوجها وطبيت ،بس شافتني امي گالت
غضة : جيبي الخضره اشوفنها
اخذت الگونيه مني ،نزعت عباتي وطبيت سبحت وصوته ببالي ضل يتردد ،تمنيت اشوف شكله هم هيج هيبة مثل صوته وخشونته
زهرة : وين صافنه ولج ؟
_ ما صافنه .
زهرة : صار شگد احجي وياج ،وين بالج عطر ؟
أبتسمت
_ باعي
زهرة : اخافن من الباعي مالتج
_ جا بطلت ما احجيلج
گمت وخليتها تريد بس تعارف شني ببالي ،اسبوع وانا صوته من بالي ما رايح ،وبيوم طلعت شلون ما اعارف بس چان القدر كاتب اطلع بهل يوم واشوفنه
عبرت الساگيه اتلفت وبعيوني ادور على محمد اريدن اشوفنه اليوم گال عدهم لمه بالگيعان ،درت على صوت شي طاح وراي ومن باوعت للسايگه جان بنصها طايح زلمه، من ضخامته خفت
بس ما گدرت اديرن ضهري وانا اشوفن حاله، مطين من ساسه لراسه، راد يگوم حط ايده يستند عليه وزلگ كضتني الضحكه بس حسيت لا هذا مو مال ينضحك بوجهه ...
ومن دافع الانسانيه مديتله ايدي ،باوعلي وباوع الايدي، كضها حيل وگام ،تلفت يسأل
_ مني أنت ،وشعدج بالاراضي ؟
_ انا بت اصحاب هاي الاراضي
_ اهاا، مني منهن ؟
_ انا الزغيرة
صفن بوجهي وعلت شواربه السود بأبتسامه
_ أم حجاية الوحده عد محمد مو ؟
أبتسمت
_ أي انا ،أنت منو ؟
_ انا چسار أبو غريب ،صاحب اخوج .
_ هاا ،أنت الچسار
_ گدامج الچسار مطين
غطيت حلگي وضحكت على حجاياته ،دار وجهه ورد باوعلي
_ هناك گاعدين اخوانج، ردي لا تصيرلج طلابه .
_ وأنت ؟
_ ماشي يمهم
هزيت رأسي ومشيت ،ما چنت متوقعه راح اشوفنه وحضي صرت كل ما اطلع يصير بدربي، منا لمن لگيت روحي ميته على طاري اسمه، وهو هم ،صرت كل الدنيا بعينه
"الحاظر"
غمد : والله وطلعتي يا عمة مو هينة على گولة امي
سيوف : اخذت ميانه بعد
عطاء : من اول ساعة طبت اخذت ميانة
غمد : جا عمة لازم اقوي علاقتي بيكم غير أنتم اهلي
عطاء : قوي عمة منو كاضج
_ اكلج عمة
عطاء : گولي .
_ جا ليش جدي ما اطاج اله ؟
عطاء : عمن متزوج وعده جهال
_ اهاا، يعني ماكو سبب ثاني ؟
عطاء : ونهى علي ابن الرباح .
_ أي هنا مربط الفرس ،جدي كلشي ولا الرباح واولاده
تمددت بفراشها ساكته چن ردت الف خطوة ليوره من تذكرت بدايتهم، تمنيت تحجي اكثر بعد بس ما صارت عندي الجرئه اسألها وانا اشوفن حالها شلون انگلب من تذكرته
ريحانة : گومي غاية جيبلنه ماي عفية
_ صار
گمت طلعت من الغرفة ،وبس طبيت للمطبخ لاگاظي صخر طاب من برا ،بس شافني گال
صخر : چاي الله ينجحج
_ خوش دعوة
صخر : جا سويلي جاي
_ تدلل ،اصعد وانا اجيبنه الك
صخر : خوش
حطيت القوري على النار واخذت ماي لريحانة ورديت صبيتله وصعدت، دگث الباب فتحه الي اخذ الگلاص وطب خله الباب مفتوح
صخر : تعاي
أنا صخر ويگلي تعاي لا اموتن احسلي، ضليت جامده بمكاني اريدن اتحرك ما اگدر ،ميمنة گاعدة تباوعلي ملامحها الهادئه شوي خلتني اتشجع وانا اطبن جوا
صخر : تعاي گعدي
طگطگت اصابعي وگعدت گباله ،يخوط الجاي ساكت چن خاط گلبي وياه، شرب منه ونزل الگلاص وكل هذا وانا بعدني گاعده بس اريدنه يحجي
وهيجي بدون مقدمات گال
صخر : سادس وگضيتي ،عزيز حاجاني عليج وهم محاجي أبوي ،شتگولين ؟
تلفتت اريدن اشرد، بس وين! !
اشرت على روحي
_ انااا ؟
صخر : جا مني ،شبيج غاية ؟
حطيت ايدي على گلبي
ميمنة : شوف روحك شمسوي بالبنية
صخر : اناا ؟
ميمنة : جا منو ،راح يوگف گلبها افرد وجهك شوي ترا يريدها بالحلال
صخر : سالمين شمسوي انا؟
ميمنة : تخوزر بيها، احجي وياها بهدوء
صخر : وين اكو اكثر من هذا الهدوء بعد ؟
ميمنة : أبتسم
نتر
صخر : اسكتي
ميمنة : ترا عادي واذا خطبها
صخر : حاط عينه عليها
ميمنة : جا واذا ،حط عينه عليها واجه حجه وياكم
صخر : ما اعارف شلون كضيت روحي وما فگست عيونه الباوعلها
ميمنة : هاي عود شگد وصيتك
اسمعلهم واحسن بروحي شوي وابجي ،شجاه وحجه
صخر : شو غاية باعيلي
باوعتله واحس شوي وابجي
صخر : گليلي ترضين لو لا ؟
_ على شني ؟
صخر : على صخام ،يريد يعقد عليج ويسوي العرس ورا سنة بصائر
بالگوات گدرت انطق
_ بكيفكم
صخر : اهاا، يعني ما تردين
ميمنة : تريد بس مايصير تگلك أي
خرزها وانا گمت
_ عادي امشي؟
اشرلي ب أي وانا ما صدگت اطفر ،غسلت وطبيت للغرفة اهفي على وجهي بس شافني طبيت وهذا حالي گامن ملتمات علي ،يسألن شبيج وشكو! !
تثلمت مستحيه وانا اگول
_ عزيز محاجي صخر علي
سيوف : يعني شنو ؟
أبتسمت ترد عليها
ريحانة : اخوي يريد يخطبها
غمد : ياا صدگ
ريحانة : والله
سيوف : ياهو منهم؟
ريحانة : عزيز ،بعدج مشايفته
سيوف : اتذكغه كلش زين من چنه جهال ونطلع انا وياج ما يغضى ويضل يزمخ يخلينا نطب وعود هو مو أكبر منه بهواي
ضلن يسولفن وانا تمددت صافنه بالي بحجايات صخر ،من گعدت الصبح لگيت البنات گاعدات عد راسي ،تحركت امط جسمي
_ صباح الخير
ردن علي ،وانا گمت الم بشعري المفتوح وانداريت مبتسمة من گالت
سيوف : شعغج كلش حلو
مغطيه وجها بالبطانية ،وخرتها وردت
ريحانة : جايب راس اخوي
سيوف : شنو ؟
ريحانة : شعرها
گامت حطت حجابها على رأسها وطلعت ومن ردت گالت
ريحانة : جدة تريدچن
طلعن وي ريحانة ولحگتهن انا و وي طلعتي طب علي من برا، صفن وضل واگف بمكانه ،أشرلي على البنات الگاعدات يم جدة ،مشيت وگفت گباله وهو بعده عيونه عليهن گلت
_ بنات عمي كاظم ذني
علي : شجابهن ؟
_ امس اجه عمي كاظم حتى يصالح جدي ،وجدي ما رضى يصحاله بس البنات خلاهن يطبن ورد عمي ومرته
علي : فلا يتغير جدج، وخري خل اشوفن الوجوه الجديده
رفعتله حاجبي
_ ترا أنت صحتني
علي : صح وهسة وخري
وخرت من دربه اهزن ايدي وهو مشى دنگ على جده
علي : كل عام وأنت بخير غضة ،عمر النسر أن شاء الله
غضة : وأنت بخير ،يوم الاشوفنك عريس وافرح بيك
علي : دخيلج جدة انا النسوان ما ابلعهن، امي مرات واضوچن منها
غضة : والله هي امك ما تنيلع
علي : خوب كيفتي حجيت عليها، تراها حبابة بس أنتم ما تعارفون طينتها
غضة : أي لا ما نعارف ،اسكت اسكت وخليها بگلبي
ما جاوب جدة واندار على سيوف الضلت بس هي گاعده لان غمد صاحتها جفون من چنه نحجي انا وياه
علي : شلونچ خوية
سيوف : الحمدلله ،أنت ابن عمو سميغ مو
علي : أي
سيوف : كبغان صلاوات وصاير شاب
علي : جا خوما نضل زغار، ولو أنت ما شاء الله
اندار على جدة
علي : الخوينس خوش منيشن على وحده، جدة اريدن هيج وحده حلوة
غضة : صير مثله وصيدلك صيده معدله
راد يجاوبها وطبت جفون تركض
جفون : علي الحگ غمد راح تطييح
طفر من مكانه ما مفتهم شي بس طلع يركض وراها وانا والبنات لحگناهم ،اندار علي من شافها
حطيت ايدي على خدي اباوعلها گاعدة على شجره النبگ وعيونها مغورگه تريد تبجي
غمد : نزلوني والله راح يوگف گلبي
عضت اصبعها تنتر
سيوف : شصعدج ولج ،وين اكو عاقله تصعد الاخغ الشجغه
غمد : ردت نبگ
اباوعله بلع ريگه ومشى جاب درج سنده على الشجره
علي : انزلي
غمد : اخاف
علي : ما مبين عليج تخافين
غمد : لا والله خفت ،اذا اوگع اصير رماد
علي : اطيني ايدج
واگف على بداية الدرج، حطت ايدها بأيده اندار علينا
علي : كضن الدرج زين
كضيته انا وريحانة وهو بس نزلها طبگ الدرج ومشى يرده المكانه
سيوف : ليش هيج غمد ،وين اكو بنيه مثلج تسوي سوايتج
غمد : النبگ فوگ مستوي هواي
علي : لا تعيديها ،اذا تردين گلي الاحد بينه يجيبلج احسن ما تطيحين وتصيرين رماد على گولتج
حاجاها وطب
غمد : هذا منو ؟
ريحانة : لا زين من تذكرتي تسألين منو
غمد : انا بيا حال
جفون : والدفان يغمزلي
ضحكن واحنا نباوع عليهن
ميمنة : شعدچن برا ما تطبن
ريحانة : اجينه
طبيت گبلهن و وگفت يم امي
_ جا يمة مو بعد وكت تسوين الغدا ؟
زهرة : احسن يما حتى بعد ما يضل عدي شي
ميمنة : اسويلچن ريوگ ؟
_ انا راح اسوي
ميمنة : اكو گيمر عرب بالثلاجه هم طلعي
_ خوش
حضرت الريوگ ورتبت الصينيه واخذتها ،تگابلنه ناكل ونسولف، وبالليل ردن بنات عمي كاظم لبيتهم وداهن برهان، شگد رداتهن جده يضلن بس حلفن الهن بعد جيه ...
چم يوم گضن ورا العيد وگالوا راح ينشرون النتائج من الصبح گعدت احوسن الكل نايمن وانا اضن نمتلي ساعة لو ساعتين ،باوعت على الدرج نزلت شايله عون رأسه على چتافها
ميمنة : صباح الخير
_ صباح النور
ميمنة : شو گاعدة من وكت ؟
_ غير اليوم راح ينشرون النتائج
ميمنة : شمدريج ؟
_ ليث گالي وحتى جاب حاسبة عزيز يطلع النتيجة بيها
ميمنة : خير أن شاء الله، لا تخافين اكيد الله ما يضيلعج تعب
_ ونعم بالله ،شبي عون سمعت صوته يبجي ؟
ميمنة : مصخن ،سنونه دمرنه ،حتى رأسه صاير نار
_ سودة علي
ميمنة : اسم الله
شگد مبين عليها النعاس والتعب بس ما گدرت تعوفني وانا بهذا القلق وبس صارت الساعة ب السبعة صعدت گعدت ليث نزل الحاسبة وياه وضلينا مگابلين الموقع
ليث : نزلن
فزيت فزة وبساع دمعت اريدن ابجي من الخوف غواشه صارت على عيوني ما اگدر اشوف الدرجات من لگه اسمي ،ضحكته العالية خلت الامل بروحي چبير گبل لا يگول
ليث : ناجحه ولج ،ناااجحه معدلج يرفع الراااس
بجيت بشهگه من گال
ليث : سبعة وتسعين، منو گدج يابة
ضحك وگام حضني ،وشوي وكلهم گعدوا وبهل يوم فرحتي ابد ما اطيها الأحد كل ما اصفن ابجي ،والعصرية امي ودت ليث يتسوگ حتى تسوي عشه الام البنين (ع)
غضة : نوح حبوبة تعال ليه احاجيك
وگف گبالها
نوح : هاا جده
غضة : امشي گول لبرهان يجيب بنات كاظم
نوح : ليش الا برهان جدة ؟
غضة : ما عليك أنت ،يلا امشي بساع
نوح : صار عيني ،صار
ميمنة : غاية اصعدي شوفي عون
_ صار
فتحت باب الغرفة وصعدت ،أبتسمت من شفته نايم على الجرباية نايم وايده بحلگه مبين متأذي ،سديت الباب ورديت نزلت
ميمنة : هاا نايم ؟
_ أي
ميمنة : الحمدلله
ردت تكنس وانا طلعت اريدن انضف الديوانيه هستوني طبيت وحسيت احد وراي ،انداريت شفته مبتسم يباوعلي، بلعت ريگي وهمست
_ عزيز
عزيز : هاا
مشى ببطئ وگف گبالي
عزيز : بالعافية معدلج غاية گلبي
أبتسمت
_ الله يعافيك
عزيز : تردين تنضفين ؟
هزيت رأسي ب أي
عزيز : جا راح اطلع انا
دار وجهه ومشى ،بساع كفيت الديوان والحوش وبس سبحت وطلعت لگيت بنات عمي كاظم جايات سلمت عليهن وكملت دربي للغرفة ،ورا الغدا عمامي وجدي اطوني هدية نجاحي فلوس ،كاضتهن بايدي اجه وگف بصفي
نوح : مو اخوج انا ،اطيني خمسين
_ شتسوي بيهن ؟
نوح : اصلح الدراجه
_ يا طلابة الدراجه ،يوميا عطلانه
نوح : هسة تطيني لو لا
وگف بصفي واخذ الفلوس من ايدي
ليث : ربع ما اخليها تطيك، فلوسها ذن مال نجاحها شلون تاخذ منهن
نوح : انا اخوها فلوسها فلوسي
ليث : انجب ،تريد اخذ من أبوي
نوح : ما يطيني
ليث : جا حير بروحك
حط الفلوس بجيبه ومشى يم الولد برا ،مشيت يم البنات ،وگفت بصف ميمنة
_ شجاي تسوين
ميمنة : اخوج يريد چاي
_ بس شو بالقوري الچبير
ميمنة : خلاهم يتفطنون وكلهم وياه يصيحون جاي جاي
ضحكت وهي أبتسمت ،لمتنه ضلت لنص الليل ،گاعده اكرز حب وبحضني عون نايم
_ عليچن الله باتن والعصر باجر ردن
غضة : شحدهن يمشن
سيوف : ونضل وهم تنامين بالصاله مثل المغه الفاتت
غضة : گلت بنيات ويردن ياخذن راحتهن، سوي زين شر يجيك
اعتلت صوت ضحكاتنه، بصفي گاعده حواري بحضنها سيف وحوراء عد ريحانة ،صعدت اودي عون لميمنة فوگ ،ردت افتح الباب بس تراجعت من سمعت حجيهن
هيوفة : شبيج مهمومه ،لا تضمين علي ،انا مو صاحبتج
ميمنة : اخوج
هيوفة : شبيه وياج ؟
ميمنة : ما بيه شي
هيوفة : جا شني ؟
ميمنة : ضاله حسره بگلبي اعارف حال گلبه هسة ،اريدن اسأله بس ما اگدر
هيوفة : ليش ما تگدرين ،بالعكس احجي وياه لازم حتى توصلون لنقطة حل
ميمنة : ما اگدر ،احس لو سألته اهيج جروحه
هيوفة : تفكرين بيه گبل روحج
ميمنة : ما تعارفين شني يعنيلي هو
هيوفة : صخر ؟؟؟
ميمنة : أي
هيوفة : ليش احس بروحج تميل اله
ميمنة : مو بس روحي ،حتى گلبي
من نبره صوتها مبين انصدمت من اخر حجايات حجتهن
هيوفة : تحبي ميمونه
ميمنة : بوكت بيه چان يحب غيري
البهته البهتتها ابد ما انساها، كضيت عون حيل لا يطيح من ايدي
هيوفة : هااا! !
ميمنة : ضنيتها مشاعر مراهقه بس من عاشرته عارفت بضنوتي غلط
هيوفة : جا ليش ما ردتيه من جدي گال أنت اله
ميمنة : ما ردت اتقرب اكثر حتى لا اتأذه ،قربه البعيد هواي تعبني
هيوفة : ما حاول وياج ؟
ميمنة : حاول، بس ما جاي اگدر انا
هيوفة : اطي فرصه لازم ،لخاطر گلبج ،والله انا اشوفنه غير وياج
ميمنة : اعارف
هيوفة : على گولة نوح بس أنت تگدريله
دگيت الباب من سمعت صوتهن يضحكن
بس شافتني
شايلته گامت اخذته مني حطته بكاروكه
خليتهن يسولفن ونزلت مسطورة بحجيها، ابد فلا توقعت بيها تحبه ،ما على بالي بگلبه اله مشاعر قديمة ..! ! !
رفعت رأسي من طب
صخر : السلام عليكم
تلفت بيناتنة عارفته يدورها ومن ما لگاها خله وصعد فوگ ،الايام ردت تمشي وما بيهن اي تغيير، ضالين الولد يدورون على
مرتضى وماكو اله أثر وكل ما يطلعون متعنين لمكانه ما يلگوه وكل مرة يردون بيها عيوني ورا ليث تصير ،اباوع لحاله بكل مره ينگلب اكثر انسان ثاني صار الچگارة ما تنزل من ايده ابد ..!
صعدت وراه بأيدي گلاص الماي ،دگيت الباب وطبيت
چان گاعد على الچرباية مدنگ رأسه من طبيت باوعلي ورد دنگ ،وگفت گباله مديت ايدي
_ اشرب ماي بارد، ريگك يابس
اخذ الگلاص من ايدي شرب ورد اطانياه ،حطيته على الميز بصف الچرباية وگعدت بصفه
_ شبيك ليث ؟
ليث : گولي شني الما بيك .
_ من اشوفنك هيج والله ينمرد گلبي
ليث : سلامة گلبج
شعل چگاره ثانية بس طفت البيده
ليث : بس اريدن اشوفنها بخير .
گام وگف على حيله ،فتح الشباج ونسمات الهوا صارت تتلاعب بالغرفة، جر نفس وهو ساند ايده على الشباچ
_ ليث
اندار علي
ليث : هاا ؟
_ اطلب منك طلب ؟
ليث : عيوني الج
گمت وگفت گباله
_ سالمات هن وراعيهن ،ليش ما تداوم وياي هم انا يصيرلي واهس وما استاحش وحدي
هز رأسه ب لا
_ لخاطري شبيك
ليث : ماعدي قابليه غاية
_ جا ما اداوم وحدي انا
تأفأف
ليث : شلون بيج انا
_ لخاطري بداعة الحنطة والشط
ضحك بصوت عالي وانا أبتسمت فرحانة لان ضحكته، مسح بچف ايده على لحيته
ليث : هاي هي يجرالج، اداوم وياج .
ومن انفتح التقديم قدم الي انا وياه بنفس الجامعة ،وضلينا ننتظر القبولات
ليث : غاااية
مديت رأسي من الغرفة
_ هاا
ليث : امشي اشتريلج هدوم
_ المن
ليث : غير لدوامج، بساع يلا
كضت ايدي
جفون : اروحن وياج عليج الله
_ گولي ل ليث
طلعت تگله وانا طلعتلي فستان لبسته وهي طبت
جفون : رضى راح احضر روحي
_ خوش
كملت وطلعت گبلها ،گعدت على الدرج بايدي عباتي
زهرة : هاا جا وين جفون؟
_ جاي تتحضر
گمت من سمعت صوته نزل، باوعتله يعدل بردن قميصه الأسود ،رفع شعره بأيده و وگف گبالي
ليث : يله ما ضل وكت
_ بس اصيحن جفون
مشيت بساع للغرفة، فتحت الباب احجي وياها
_ يله جفون
جفون : اوگفي بس اللبس عباتي
لبست عباتها ومشت وراي وانا عباتي بايدي حطيتها على راسي وكبلنه طلع ليث ،وبنفس الوكت طب نوح
نوح : وين ؟
زهرة : اخوك راح ياخذهن للسوگ
_ اشتري هدوم للجامعة ما عدي
أشر على جفون
نوح : وهاي شعدها ماشية وياج ؟
جفون : اسمي جفون مو هاي
خزرها وصعد فوگ
جفون : شگد غثه
تحجي وي روحها متنرفزه منه، كضيتها من ايدها وطلعنا ،ليث صاعد بالسيارة ومن الجامه يحجي وياه عزيز دنگت راسي وفتحت الباب
وصعدت
من طشت بالقرية هو يردني ما گدرت بعد احطن عيني بعينه راد نعقد هسة بس أبوي ما رضى وگاله ورا دورة سنة بصائر وهم ما ضل الها شي ...
°حواري°
نزلت بأيدي هدومه ،اخذهن من ايدي وطب يسبح درت احجي وي امي
_ سنة صار ،چن هذاك اليوم
تنهدت
نجوى : شايله هم أخوج اليوم شلون بيه
دنگت شلت سيف من الگاع ،بطني توجعني وهو ما يهدني لازگ بي نهار كله
نجوى : مايصير تحطي على بطنج هيج
_ شسوي يا يمة اذا هو بس انزله يعيط
نجوى : اطينياه وأمشي مددي گبل لا نطلع
ما گلت لا لان احس ضهري راح يصير نصين اطيته الامي ومشيت للغرفة
بس فتحت الباب شفتها گاعده بحضنها الوكحه بتي
_ هاا ما نامت ؟
ريحانة : لا والله شلعت گلبي
_ أنت تحبيها، اكليها
دنگت بأستها
ريحانة : تنحط بالگلب ولج
_ محبوبة بتي بس وكحه
ريحانة : طالعة عليج
_ خوبين عليج عاد أنت خالتها
ريحانة : من زغيرة كلها تشهدلي انا فقيرة وحس ما الي
_ والله حتى انا امي تگول فقيرة بس بعدين تغيرت
ريحانة : هي طلعت عليج هسة مو گبل
تمددت گبالها
_ بطني ثگيله من هسة
ريحانة : جا راح يصير عليج اربعة اشهر
_ هسة هم يطلع بي توم حتى اموتن والله
ضحكت
ريحانة : بعد رزق رب العالمين
_ ونعم بالله، بس سيف وحوراء بعدهم زغار انا واحد واگولن غلط تورطت مو نوبه ثنين
بوگت العشا مشينا لبيت جدي ،طبيت شايله سيف اجه اخذه من ايدي حق وكملت دربي
جوا الكل ملتمين بس انا منوره جهالي اخافن لا يستغربون ويخافون، امي مشت گبلنه بس خطية ريحانة ضلت وياي
نزعت عباتي
_ شوكت نطلع ؟
زهرة : ورا العشا
العشا صار ركض ركض حتى بنات أل خبير گامن ويانه ،وگفت بصف زينه اسألها
_ جا نسمات وين ليش ما أجت ؟
زينة : ما گدرت لان گبل يومين سوت عمليه الايدها
_ اسم الله ليش
زينة : على الاساس مكسورة جبرها وشلنه الجبره بس ضلت تصل عليها، ومن اخذناها لدكتور ثاني طلعت تحتاج عملية يردون العظم لمكانه الصحيح
_ سودة عليه، والله ما تستاهل
زينة : ما ردت اعوفنها بس ما رضت وگالت امشي
_ سلميلي عليها عليج الله
زينة : من عيوني
وگبل لا نطلع اختلفت علي جده وحلفت ما تخليني امشي ،دگيت ولطمت وما رضت
غضة : وين ماشية ،منا بطنج وجهالج
_ مايصير هيج جدة والله مايصير لا بالدفنه ولا الاربعين مشيت لهسه انا ابد ما زايرتها
غضة : من تجيبين خلي حق ياخذج
نجوى : والله گتلها موزين وما يصير بس تعارفين عنادها شني
غضة : انا حجيت وشوف يا بت ابوها التطلع
مشيت دگيت باب المطبخ اريدن احد يجي يصحيلي حق لان اموتن اذا أضل، فتح الباب
نوح : هاا؟
_ صيحلي حق بساع
نوح : طبي
سد الباب وشوي ورد اندگ ،بس شفت حق گبالي بچيت ،طب مستحي من البنات
عبد الحق : شكوو شبيج ؟
_ جدة تگلي ما تمشين للنچف
عبد الحق : ليش ؟
_ عمن حبله
عبد الحق : هاا، جا صدگ مايصير
دگيت رچلي بالگاع
_ اذا ما امشي انا أنت تضل
فتح عيونه
عبد الحق : هاي شني
_ أي والله
عبد الحق : سويلي درب احاجي جده
وانا ما صدگت خبر ،سويتله درب حاجاها وهي معانده، تدنه يشاورها مدري شحجه وياها
غضة : والله يا حق اذا صار لبطنها شي شيخلصك مني
عبد الحق : انا عيني عليها والله
غضة : وجهالك ؟
عبد الحق : واحد عد ريحانة والثاني اطيه البركه وهيج فضت
خزرتني
غضة : انا اعلمج
ابتسمت وضميت روحي وراه من وگف ،يحجي
عبد الحق : نص ساعة ونطلع
بهاي النص ساعة صار الركض ماله والي ،انا يجوز أول وحده لبست عباتي اخافن لا جده ترد تختلف علي ،اجت اخذت سيف من حضني
بركة : تورطت صرت عمة
_ جا شسوي انا هم ببطني واحد
مدتلي ايدها گمت من صاحوا يله ،صعدت بالكوستار وبصفي گعدت ريحانة ،انداريت وراي گاعدات غاية وجفون وبنات عمي كاظم
_ شو مكانچن مبين مريح
جفون : ما اگومن لو تموتين
_ شگد نحسه
الدرب طويل ،وكل ما نگرب من النچف الخنگه تزيد أول ما وصلنا زرنا الأمام علي وراها طلعنا للمگبره گبلنه چان واصل فقار ،درت وجهي وشهگت ابجي من شفته حاضن گبرها ،درت على أثر ايد
انحطن على چتافي ،غمضت عيوني وبجيت بصوت عالي وانا راسي على چتاف حق وهو احسن بجسمه يهتز يبچي ،وخرني يعدل حجابي عيونه حمر دم
عبد الحق : امشينا نزورها
هزيت رأسي ب أي ،و مشيت وگفت ورا ميمنة الگاعدة گبال فقار وعون بحضنها
ميمنة : تدرين شيصير بي من يگلي ماما والله چن چمره ويحطها بنص گلبي ،كبر ابنج سنة صار عمره ما شفتي من گعد ولا هسة من مشى وخطه أول خطواته
تحجي وتبچي وكلنه وي حجايتها نبچي الا هو ما رفع رأسه ابد وكر چرهة نفس يجرها تگل للثانية هو مختنگ اكثر ...
وبس ردينا كلمن مشى لبيته، انا ضليت عد اهلي حتى ارتاح ،طلعت من الغرفة العصر لان ردتنا صارت الصبح ،باوعتلها نزلت من فوگ تسحل بروحها
ما انتبهت علي ومشت للمطبخ، مشيت وراها چانت تغسل وجهه
_ شبيج ؟
اندارت علي
هيوفة : ما اعارف شو مسحونه روحي
_ الجو بارد ليش ؟
گعدن تهفي لروحها بشالها
_ شاكه بيج شي مو طبيعي .
هيوفة : مثل شني ؟
_ حامل احسنج
صفنت بوجهي
هيوفة : هاا
_ أي والله ،صار فترة منتبهه عليج دوم وجهج شاحب
هيوفة : لا شسالفه
ريحانة : شكو شبيچن ؟
_ قنيعها تحلل
ريحانة : تحليليش؟
_ مال حمل
ريحانة : يااا، صلاوات
هيوفة : ولچن والله لان تعبت امس وأليوم ،هسة بس ارتاح اصيرن زينة
ريحانة : خابري ضيرم يجبلج تحليل ما خسرانه شي
هيوفة : لا ما اريدنه يتأمل على الخالي بلاش
_ گليله الي
هيوفة : شني الج ما تسكتين وبطنج قالون
ضحكت وبس طب عزيز صحته
عزيز : هاا ؟
_ امشي للصديلية جيبلنه تحليل مال حمل
عزيز : ودي غيري
كضيت ايده من راد يمشي
_ جا صيحلي نوح لو علي
عزيز : خوش بس هديني
وصدگ طلع صاح علي، اجه من الباب يضحك وانا واگفه عد باب المطبخ
علي : اطي مجال بزونه
_ خليني محترمتك أكبر مني
علي : غصبا ما على راسج تحترميني
_ شلون راح يطلعني من طوري
علي : ديله احجي شتردين
_ اخذ دراجه فقار وأمشي للصيدلية جيب تحليل مال حمل وتعال
علي : هم تحليل ،شهل لعبان نفس حتى ابو الصيدلية عارفني من گد ما اشتري منه
_ لا تضل تسولف بساع
علي : جيبي فلوس
_ مو عيب على شواربك تاخذ فلوس من بت عمك
علي : راح ازينهن
ضحكت وگلتله
_ ماعدي ،جيب وانا اطيك
علي : اشاقيج، شگد تردين
_ ما شاء الله خبرة
علي : مو لازم تتأكدن
ضحكت وهو مشى يدردم
علي : ربي لو خالقني سنابل شلب حنطة ولا هل عيشه هاي
طبيت جوا وهو شوي واجه ،توسلنه تواسيل الا رضت تطب تحلل وعد باب الحمام ضلينا متانيها ،طلعت جامده جريت التحليل من ايدها
وشهگت من شفت خطين
گمزت ناسيه روحي
_ حااامل والله حامل
ريحانة : يا يمةةة ،ولج حااامل هيفاء بالعاافية
حضنتها ريحانة وهي صافنه ما مصدگه
_ شبيج ولج
هيوفة : يعني عود صدگ راح اصيرن أم
_ أي والله أي
ضحكت مدمعة عيونها طلعت امي من الغرفة على اصواتنة العالية ومن افتهمت سبب خبصتنا حطت حجابها على وجهه وگعدت تبجي ومن
اجه ضيرم وبشرناه گاعه ما وسعت فرحته گدامنه حضنها ويردد
ضيرم : الحمدلله ،الف الحمدلله
شگد ما چان الحزن مغيم علينه تغلب عليه خبر رد الروح بالبيت ...
°غاية°
نزلت من فوگ بساع اركض
_ ميمنة ويينج، راح يجن النسوان
طلعتلي من غرفة جدة
ميمنة : جاي اطلع الصواني
_ جا جفون وين
ميمنة : برا گتلها تغسل الحوش
_ عاشت ايدج خليتيها تتحرك
مشدوهين نحظر للمجلس، ركض ركضنا وي طبه النسوان انا ركضت للحمام سبحت وبساع طلعت لاگتني نازله من فوگ
ميمنة : هاج عون وانا اطلع وي عمة استقبلهن
اخذته من ايدها وطبيت للغرفة، گعدته واطيته مصاصه من حلويات جفون التهه بيها بين ما مشطت وبس خلصت شلته وطلعت ثلاث ايام قرينا وراها بدوا خدمه بالمواكب وفتحنا بيتنا مضيف مثل كل سنة
ليث : حظ حظكم راح اطيحه ،اصعد جيب دبة الغاز بالبيتونه
علي : طاح حضي انا ،ودي نوح
نوح : خرا بنوح، نوم ما نايم ترا مايصير هيج
علي : اذا تضل هيج تحجي حتى اجر ما ينحسبلك
تناگروا بيناتهم مل منهم ليث وصعد جاب الدبه هو وبس بدا الدوام مال جامعات داومنا انا وهو ،ثنيناتنه انقبلنه تحليلات ،أول يوم حتى نوم ما كدرت انام من التوتر عكس ليث نزل بمكامل نشاطه واناقته هم
وگف گبالي
ليث : شلوني ؟
_ باهو اجه ولبس اسود
ليث : املح ولابس اسود
_ مو كل املح حلو مثلك
غضة : جا غير ملح الجنوب ليوثي
أبتسم ومشى صبح عليها توها گاعده وطلعت من غرفتها
ليث : نمشي ؟
_ يله
طلع گبلي وانا وراه ،طبگت طباگات العباة وباوعت على روحي نضره اخيره گبل لا اطلع ما مصدگه وصلت لهاي المرحله وتخصصت بتخصص يمكن ما جان على بالي ...
الضياع والارتباك باول يوم ما يتسولف ،گاعدة بصفه وهو كلساع يگلي
ليث : امشي صاحبيلج وحده ،چنج بومه لازگه بي
_ ما اريدن شني
گرصني
ليث : مو صوجج صوجي انا اخو سبورتي وانقهر عليج
ضلينا انا وياه نتلاشه شوي وشوي نسولف مر اسبوع على داومنا وبدا الأسبوع الثاني وچنت گاعده اقرأ ليث ما گدر يداوم بس جابني ورد، رفعت راسي من حسيت احد وگف گبالي ،أبتسمت من شفتها بت هم لابسه عباة وجهه تارس يضوي، ومن أبتسمت بينت غمازاتها
_ هلوو، انا داليا
_ هلا حبيبتي
_ عادي اگعد يمج ؟
تدنيت اسويلها مكان
_ اكيد عادي
گعدت بصفي
داليا : شنو اسمج ؟
_ غاية
داليا : حلو اسمج
_ عيونج الحلوات
ضلت گاعدة يمي ،تسولف عن السادس واهلها كلش انسجمت وياها محبوبة واجتماعية ،بايدي الموبايل جابه ليث الي امس ،دگ وبس قريت اسمه ترخصت منها وگمت رديت عليه
_ هاا خوية
ليث : اجيتج، اطلعي يلا
_ خوش ،دقايق وجايتك
سديته منه وترخصت منها
_ أخوي اجاني راح اطلع
داليا : الله وياج حبيبتي
طلعت ولوحتله بايدي بس شفته واگف يم السيارة بس شافني صعد شغلها، صعدت بصفه
_ شوكت تجيب لروحك سيارة، مايصير هيج ضال
لاف السيارة عيونه للدرب ورد علي
ليث : مقرر اشتري هل ايام
_ أي احسن
بس وصلني مشى للگيعان ،نزعت عباتي احجي الامي على داليا، وبس گضى محرم و وراه بفتره حددوا موعد خطوبتي
هيوفة : شبيج ترا راح تنخطبين مو تنعدمين
_ استحي حتى اطلع واگابل اخواني
ضحكن نصابات علي ،وگبل الخطوبة بأسبوع حاجتني جدة
غضة : لازم تنزعين الاسود جدة مايصير لهسه ضاله عليه وأنت على باب ملچه
_ شلون جدة والله گلبي ما يطيني
غضة : جا خوما تلبسين بدله سودة
وبين الرفض والقناعة نزعته گبل الخطوبة بيومين بعد ما حتى الفستان والصالون حضرناهن، التمينا كلنه گبل بيوم وحتى بنات عمي كاظم
اجني للصبح ما نايمين يردن يعيشني اجواء الفرح وما نمتلي
غير ساعة ومشيت للصالون، رديت وي الغدا وبس طبيت
تلگني بس بطش الچكليت بلايه لا هوسة ولا هلهلوله لان انا حلفتهن ما يطيني گلبي على بصائر وزحمة من عمة وفقار وخواتها
وبس گعدت التمن علي
ميمنة : صلاوات على النبي ،ولج طالعة تخبلين
ريحانة : شحال اخوي من يشوفها
وبس كفن هوسة الغدا كالوله نعقد ومن اطيت موافقتي هلهلت ميمنة وهمست يمي
ميمنة : حتى لو حزنانين لازم نفرحلكم
أبتسمت وانا مدنگة ،ومن گضى العقد وباركلنه السيد گومني ورديت لمكاني، تلفتت بيناتهن اريدن شي يسترني ،اشرت لريحانة تجيبلي شي
ريحانة : ابد والله ابددد
تنهدت مستسلمه، فستاني مستور بس شعري ورگبتي مشكفات ،شوي وطب هو مدنگ لابس قاط اسود ،لا ارادي ابتسمت من صار قريب مني وهمس
عزيز : وصارت صدگ ،وصرت اقرب الج من اخوانج
كض ايدي وگعدنا ،احس بروحي ساحت من صيحن
_ حبها ولك حبها
وهو ما جذب خبر ،طبع بوسه على راسي ويم اذني حجه
عزيز : اقدسه الخلاج تحلين بعيني
عارفت بيه يقصد شعري ،لبسني الذهب وبالاخير طلع علبه زغيره سوده من جيبه ومن فتحها صفنت عليها، چانت ماشه ذهب وعليها مثل الحجره تلمع
تدنه خلاها بشعري
عزيز : من زمان مسويها، وحالف اللبسها الج بهذا اليوم
ملت راسي مستحيه
_ شكرا
أبتسم وگام وگف ،دنگ علي
عزيز : راح اطلع انا ،بالليل اريدن اشوفج
ما جاوبته وهو طلع ،وگبل لا يطبون جدي والباقين يتباركولي گمت نزعت فستاني وغسلت المكياج وطبت جفون
_ يردونج .
مسحت شفتي الحمره طابعة بيها
_ هسة
ومثل كل وحده عدنا بيوم عقدها، باركولي واحد واحد ومن وصلت عد ليث حضني عيونه على عزيز
ليث : امانه برگبتك ،عزيزة گلبي مطيكياها
أبتسم
عزيز : بگلبي اخليها لا تخاف
ضحكوا الكل من فززه صخر وهو يطگه على رگبته
صخر : حجي ماصخ لا تحجي
عزيز : يا بلاء الله ،ضيرم راح احسن بيك منا وجاي
ضيرم : يطلعلك گلب بصف گلبك
وبس هدا البيت من أجواء خطوبتي ،نسيت هو گال يريد يشوفني، هستوني غفيت ودگ موبايلي
فزيت وعمة عطاء وياي فزت ،جرت الموبايل قبلي وبس شافت رقم غريب شمرته علي
عطاء : ردي هذا عزيز ،بدت سوالف المخطوبين
درت منها مستحيه وفتحت خط عليه ،وبس اجاني صوته چن اختفى صوتي وضاعت علومي حايرة شأحجي وياه
عزيز : غاية
صوته هادي وهو يگول اسمي ،رديت عليه ب
_ هاا
عزيز : شبيج متقيده
_ ما متقيده
عزيز : جا احجي
_ شحجي
عزيز : الأحد انا اخذج للدوام
_ ليش ؟
عزيز : اريدن احجي وياج وحدنه
_ و ليث ؟
عزيز : ما يداوم لان عده شغل
_ خوش
سولفنه شوي ومن التعب ما حسيت بروحي من غفيت وهو ضال على الخط ،من فزيت ضليت ادور على الموبايل ،لگيته طايح بصفي
جفون : خايبة شبيج تزاگطين
_ ماكو شي
والاحد چنت متحظرة واجاني ليث گال راح ياخذج عزيز ،سويت روحي ما اعارف ومقهوره من روحي شلون چذبت عليه بس هو ما تعبر عليه، كض ايدي مبتسم مايريد يحرچني
ليث : اذا راد يحجي وياج عادي اطي رقمج لان صرتي مرته
هزيت رأسي ب أي وطلعتله، صعدت بالصدر وگلت
_ صباح الخير
عزيز : صباح النور
بس عبرنا القريه كض ايدي بلايه ما يدير وجهه علي وبأيد وحده يسوق، گبل لا نوصل گال
عزيز : ردت احجي وياج بس اثاري الشوف عدي يروي الروح اكثر
دنگت العب بسحاب الچنطة ،وبس ردت انزل گال
عزيز : خابريني اجيج
_ خوش
سديت الباب وباوعتله الا شافني طبيت يلا حرك ،تلگتني داليا ،براكتلي على الخطوبة
داليا : عدي فضول اشوف الصاد غاية ،ما عدج صوره اله؟
_ لا والله ،بس من اطلع اطلعي وياي وشوفي
داليا : خوش متفقين
وبس خلصت خابرته، شوي ورد خابرني گال جاي
_ تعاي امشي وياي شوفي وردي
داليا : يلا
طلعنا نتمشى ونسولف، اشرتلها عليه واگف يم السيارة وبأيده موبايله
_ هذاك
داليا : ولج صدگ من شكله مبين محامي
_ أي صح ،يلا راح امشي
داليا : الله وياج حبيبتي
بس تقربت منه گال
عزيز : واگفه تسولفين ،صدگ تحجين غاية
_ صديقتي رادت تشوفك
زغر عيونه
عزيز : اهاا
_ أي والله
رديت للبيت وگابلي صار الخط مالتها، نزلت وسوتلي بأيدها هلو، بادلتها الابتسامه وسوية طبينا، جفون ردت تداوم وابوي ردها بأيده وحواري تدگ وتنوح شني جفون تداوم وانا انحرمت مو المدرسة ،الايام مشت بلايه تغيير بس چانت اشبه بشراره حتى تشعل نار بوسط بيتنا ..! ! !
صعدت من سمعت صوته يبچي ،فتحت باب الغرفة وطبيت
_ هاا عوون، هاا الزغيررون شبيك
دنگت شلته اضحكه مثل كل مرة
_ شبيك تبچي هااا، تريد خالتك مو ؟
وهو ابد ما سكت، طلعت من غرفة صخر لغرفة ليث فتحت شباكها إاشرله
_ هاي خالتك جاي تخبز عليش البجي
صحتها
_ ميمنة
رفعت رأسها باوعتلي
ميمنة : هاا
_ هذا عون يبچي
ميمنة : عينج عليه بين ما اكمل
_ گليله يصير حباب ويسكت
ميمنة : انزلي فرشيلكم شي وگعدوا يمي
_ يله جاين
سديت الشباك ونزلت ،اخذت بسط وطلعت فرشته قريب عليها وهو بس شافها سكت ،گعدته وطبيت جبت ملاعيبه وگعدت اللعب وياه
ميمنة : انشلع گلبييي من الهوا والله ما جاي يشتعل
وي ما رفعت رأسي چان بأيدها بطل متروس نفط هي رشت منه وهي گبت النار ،من قوتها غمضت عيوني وطفرت اردن ليوره بين ايدي عون ،ما لحگت استوعب ولا افكر وانا اشوفنها تركض بروحها العزيزة ......
0 تعليق