خسارتنا چبيرة من فگدناك

وعمينة عيونه گد ما بچيناك

يهل رايح صعب مو هين الوداع

أمر الله وقدر چا ما تركناك ...

°كوكبة°

عيوني حسيت بيهن تحچرن ،نسيت حتى شلون ارمش ،ليا مرحلة واصل ،لهنا صار يجيب افعاله الدنيئه ،اندار علي يأشر ما مستوعب

اسماعيل : هاي شصاير ؟

رفعت اچتافي

_ شوفة عينك

اسماعيل : هذا من شوكت يجيب جماعته هنا ؟

_ وهذا الهامك

ما رد علي ومشى بيناتهم صايرين جثث، البطاله بيناتهم وحال الصاله بالظيم كل واحد شامر روحه بالگاع رايحين بغير عالم، وصل عد مرتضى دنگ ندهه وكل ضنه راح يگعد

اسماعيل : مرتضى ،اگعد مرتضى

ولا چن احد يحاجيه منتهي ما بدرا منه أي حركة رفع روحه واندار علي

اسماعيل : جيبلي دولكة ماي

ترستله دولكة الماي ورديت شايلتها بأيد والايد الثانية بيها بالگوة مسيطرة على كرار نايم، اخذها مني ورشگها على مرتضى خلاه بفز فزه يستاهلها

طفر من مكانه يكفر ويمسح بوجهه من الماي ويباوعلنه بحقد چن گطعنه عليه احلى نومه بحياته انا دنگت ما الي نفس الاوعله واسماعيل نتر بيه

اسماعيل : كافي تاكل خرااا

نشغت من ركض جر اسماعيل من فالينته

مرتضى : احترم روحك

اسماعيل : واذا ما احترمت روحي شتسوي؟

أبتسم وقرب وجهه اكثر يحذره

مرتضى : تعرف منو مرتضى ما داعي اگلك شيسوي

دفعه ورد ليوره

اسماعيل : تهديدك ما يمشي وياي ،انا غير مرتضى ما اخافن بس من الله

مرتضى : وداليا ما تخاف عليها ؟

چم احجايه خلن أخوي ينگلب گلب ،طگ مرتضى بوكس بنص وجهه وصاح

اسماعيل : امحيك من الوجود لو توصلهاا ،مرتضى اموتك بأيدييي اياك تندگ بيهاا

يضحك ويمسح الدم من حلگه

مرتضى : عبالك ما اعارف شعدك، تدري بس خوش صيده صااايد

اسماعيل : خررررب اهلك ،لك لا تحجييي هيج تريدد اموتك

مرتضى : جا دير ضهرك ورد منين ما أجيت لا اعارف شأتصرف وياك

خزره وجرني چنت واگفه بنصهم ،صاح ورانه

مرتضى : ويين ماخذها

اسماعيل : ما الها ضله عدك

مرتضى : هدها

اسماعيل : من توعى على روحك تعال اخذها ،هاي اذا وعيت

سرع خطواته يسحول بي يغلط على مرتضى روحه صايرة بخشمه ،صعدني بالسيارة ورد صعد رگع الباب حيل

وبأيده الموبايل ،عيوني درتهن لباب البيت اباوع متعجبه شعجب ما طلع وراي هو ما يخليني حتى اباتن عد اهلي ..! !

حرك السيارة وبلهفه حط الموبايل على اذنه يحجي بساع

اسماعيل : وين صرتي ،چم مرة دگيت عليج ،ليش هيج تشلين حالي

الموبايل چان عالي وگدرت اسمع ردها بصوتها الخافت

_ نايمة والله ،شبيك

اسماعيل : شعدج هسة نايمة ؟

_ تعبانة غير من الدوام

اسماعيل : اهاا، حگج .

_ بيك شي ؟

اسماعيل : لا ماكو شي ،من ارد للبيت احاجيج طالع هسة

_ خوش وانا راح اگوم اكل

اسماعيل : الف عوافي على معدتج

ضحكت وسدته ،مسح وجهه ورد يسوق فلا چن گبل چم دقيقة صاير اعصاب ولان علاقتي بيه

مو قوية ما تدخلت ولا سألته وحتى هو حجه وياها ما معتبرني موجودة ...

بس طبيت لبيت اهلي كل الگاعدين بهتوا ،وراي طب اسماعيل وهو رد على أبوي من گال

ضاري : شني ليش رديتوا ؟

اسماعيل : نسيبك وجماعته مسوين بيت بتك مگوده

گامت على حيلها مبين ما تريده يحجي اكثر بعد

نادية : شبيك اسماعيل

تخزر بيه وهو ما اهتم وكمل

اسماعيل : بعيوني شفت ،كل واحد بيهم متوث شرب منتهين وهو بنصهم

اندار أبوي على امي وهي عيونه على اسماعيل

ضاري : شني هل حجي هذا، جا مو گلتي مبطل شرب ؟

نادية : هو گالي بطلت

ضاري : والجاي يحجيه مرتضى ؟

نادية : ما اعارف ،شبيك درت علي

ما حتجاها وسألني

ضاري : من شوكت يشرب رچلج ؟

_ من يوم العرس چان شارب

صفگ ايد بأيد وامي وجها صار يطي الوان ،تأملت خير وگلت بلكت يوگفون وياي اذا فرغت البگلبي بعد ما شاف واحد بيهم بعينه

_ گضت اكثر ايامي وياه هو مو بوعيه ،ايده والضرب يحير شلون يأذني ،أخير شي صار يكضني من ايدي التوجعني ويلوع گلبي على ابني

ضاري : كل زلمه يطگ مرته

سدها بوجهي چن بحجاياته ،بلعت ريگي واحس بلعومي احتقن ما گدرت بعد حتى ارمش اخافن لا تطيح دمعتي گدامهم واختاريت امشي

لغرفتي احسن ما يحترگ گلبي اكثر بعد وانا صايرة على كلشي ابجي ،حطيت كرار بالگاع وگعدت يمه بالي شارد مو يمه وهو يريدني العب وياه، تنهدت تنهيده وراها هواي حجي ضال بخاطري مثل كل مره ما احجيه وابلع جمر واسكت ...

كرار : اماا، امم

أبتسمت وانا اباوع عليه حاط ثنين من اصابعه بحلگه ومبين جوعان ،شلته وطلعت بوجهي صارت سكينة نازلة من فوگ ،من شافتني عگدت حاجبها مستغربة واجتني

سكينة : جا مو مشيتي ؟

_ أي ورديت

سكينة : ياا ليش ؟

_ سالفة طويلة هسة اسولفها الج ،بس حطي

كرار يمج بين ما اصعد اصيحهن اسماعيل يجيبلي جنطتي من سيارته كرار كتله الجوع

سكينة : اطينياه

فتحتله ايدها وهو بساع شمر روحه عليها ولا چن أول مرة شافها اليوم ،أبتسمت من حضنته تگله

سكينة : تعرف انا صاحبة امك وخالتك هم ،هااا أنت تعرف

تكركره وهو صوت ضحكته ملى البيت وعلى صوتها طلعت امي تصيح

نادية : ناااس نايمييين ما تفتهمن

عدلت وگفتها

سكينة : اعذرينه عمة ،كوكبة انا راح امشي بالحوش

اخذت كرار وطلعت وامي طبت ورگعت باب الغرفة حيل متنرفزة ،دعيت الله يصبرني على الانا بيه گبل وحدي وما گدرت اعيشن هنا شلون هسة انا وابني! !

صعدت بساع من سمعت صوت كرار برا يبچي ،دگيت الباب على اسماعيل طلعلي بأيده موبايله

اسماعيل : هاا شرايده ؟

_ چنطتي بسيارتك بعدها

اسماعيل : يا جنطة ؟

_ بسلا نزلتها ؟

اسماعيل : أي

_ صخام الصخمني ،بيها الحليب والممه مال كرار

اسماعيل : جا مو گدامج طببتها من ردنه المفاتيح

_ شلون هسة ؟

اسماعيل : اندري دبري روحج

_ شلون أدبر روحي

اسماعيل : اعذريني ما صاير أم گبل

حرت اضحك لو اكمل ضوجتي ،نزلت من شفته رد يحجي بالموبايل

سكينة : هاا شبيج

گعدت بصفها

_ ناسين الچنطة وبيها الحليب والممه

سكينة : يا جا شلون ؟

_ ما اعرف والله ،نوبه صار هواي ما راضع

اطتني كرار وگامت

سكنية : راح اگولن لسعد يطلع يشتريله

_ أي فدوة

شوي وردت وراها سعد يمشي بأيده سويج السيارة وگف گبالي النعاس مبين عليه اخذ كرار مني

سعد : جوعان بعد خالك ،يفداك الحليب هسة اجيبلك واجي بس لا تبچي

وهو يبرطم يكسر الخاطر، ردلياه وطلع اكثر من ساعة ورد اطاني العلاگه أبتسمت وتشكرت منه

سعد : تدللين، گعديه خل يشرب

_ أي هسة

طب جوا وصاح سكينة مشت وراه ،وانا گمت رچليه ميته بالگوات امشي لان نومته وضليت گاعدة بمكاني اخافن لا يگعد ويخبصني ،وانا شايلته فتحت الممه من الكارتون غسلتها وحميتله ماي

وضليت واگفه اسكت بيه بين ما دفه شوي سويتله وگعدت وبمكاني گعدت بين ما خلصها رديت گمت خذيت الغراض وطبيت جوا فرشتله وحطيته على الفراش وانا ضليت گاعده اباوع عليه

شگد اخافن عليه من الدنيا ،ابد ما چان يهمني شي وما عندي شي اخافن عليه ،كرار هسة حسيته صار نقطة ضعفي واخافن

لا تلوي الدنيا ايدي بأبني وانا هاي روحي احسنها صارت معلگه بيه ..؟؟

رديت ضهري على الحايط وعلى هل حاله غفيت وفززني صوت بجييه ،شلته بساع حضنته وهو كاض هدومي بقوه

_ هاا ياروحي ،كرار ماما هنا انا والله ،اشش لا تبجي حبيبي

يشهگ ويردد

_ اما

_ عيون امك ،اشش كافي لا تبجي

انشلع گلبي وحيلي راح وي كل شهكة يشهكه ،منا لمن غفى نزلته على الفراش وهو بعده كاض هدومي اباوع عليه وبگلبي اتحسب

على الخلاه يعيش الخوف وهو بهذا العمر ،تمددت بصفه وجريت الغطا علينه ونمت

والصبح گعدت على صوتهوايده تجر بشعري ،جريته ابوسنه وهو يرفس برچليه يريد اعوفنه وانا اذا اجعصه جعص ما ارتاح وما

هديته الا من برطم يريد يبجي ،شلته وگمت طلعت بساع لان اذا بجه جيب اليسكته بعد

ابتسمت وانا اباوع عليها مخبوصه تنضف،صحتها

_ سكينة

اندارت علي بايدها المكناسة هدتها من ايدها واجتني

سكينة : صباح الخير

_ صباح النور

باست كرار وردت تريد تنضف بس گلبلها گالت

سكينة : ضميتلج من الريوگ بالمطبخ بس حمي الجاي واتريگي

_ خوش

لگيتها عازلتلي بيض وطماطه ومغطية الطاوا حميتها وحميت الجاي وگعدت اكل وكرار گبالي

يلعب يمي رفعت راسي اباوعله من وگف گبالي جاي من برا يسأل

حسن : شو بعدج هنا ؟

_ شسوي مجبوره اضلن

حسن : يعني تردين تردين ؟

حطيت لگميه بحلگي اكلتها وهو متانيني احجي

_ ضاله على گلبك يعني اعذرني

حسن : شعجب خلاج تجين ؟

_ جابني اسماعيل

حسن : اها ومن شوكت اسماعيل صاير حنين

_ مو حنيه ،لان شاف بعينه

حسن : أي مو اگول

رديت اكل من مشى واوصي روحي ما انقهر بالاخير هذا حسن شنو الاتوقعه منه ،يومين مشن بلايه أي تغيير هدوء خوفني گبل لا خلاني احسن بالامان وباليوم الثالث چنه گاعدين على الغدا وطب اسماعيل من برا ،غسل وگعد ياكل ويانه ومن جاب طاريهم نزلت الخاشوگه من ايدي وضليت مركزة وياه

اسماعيل : اليوم صايرة مصايبة بقرية خنسة

نادية : عساهم بمصايب مو بس مصيبة وحدة

ما انصدمت من ردها لان هاي امي تشوف دم سنونها ولا تشوفهم وطول عمرها چانت تمنعني من غاية حتى هي الخلت أبوي يبطلني من المدرسة وما اضلن اداوم وياها

سعد : شصاير ؟

اسماعيل : وحدة من نسوانهم محترگة وهي تخبز

نشغت ولطمت على وجهي

_ ياهي

اسماعيل : مرة صخر

طفرت من السفرة مفجوعة وبين عيوني صارت شكلها سوالفها وحنيتها على البنات حتى انا من امشيلهم تضل قلقة علي لا اهلي يشوفوني وتصيرلي طلابة ،روحي احسنها صارت تنسحب مني ما اريدن اصدگ اليحجيه

اسماعيل : يگلك هسة بالمستشفى بين الحياة والموت

_ يعني ما ماتت موو، عايشة

رفع رأسه يباوعلي وكل الگاعدين عيونهم علي ما نزلت يضنون من وانا جاهل بعد ما شفتهن

اسماعيل : لا بعدها عايشة ،بس مبين ما تطول لان مطلعيها ملفوفه ببطانية

من كل گلبي رفعت ايدي ادعيلها، وكل ما يطب اسماعيل للبيت اسأله عليها ،تلگيته ثاني يوم بس شافني اتأفأف يعارف ليش متانيته

اسماعيل : هاا شعدج هنا ؟

_ عليك الله ما سمعت شي عليها ؟

اسماعيل : لا والله بس لو ميته چان عرفت

نشغت

_ اسم الله

اسماعيل : انا گلت لو ،وخري خل اطب

وخرت من دربه وانداريت اباوعله صعد فوگ ،ما بخلت بدعائي الها بس چان القدر اله رأي ثاني

وفجعني برده من سألته مثل كل مره

اسماعيل : ماتت

_ يمةةة

بأثنين اديه لطمت من صحت

_ شابه بعدهااا مو مال مووت ما شافت شي من عمرهاا

دموعي يطيحن بلايه ما ارمش ،هضيمة على شبابها تموت هل موته هاي ،سكينة شالت كرار الصار يبچي من الخوف وهو يشوف الحزن تملكني، صرت افتر بالمكان واردد

_ ليش ماتت ،بعدهااا زغيرة ،يمةةة شحالهم هسسة

كضت ايدي تحاجيني وانا الشهگة لازگه بصوتي

سكينة : الله يحرمها ،ادعيلها بالرحمة البچي على الميت يأذيه

_ مو بيدي سكينة لو شايفتها شني ،ولج تنحط على الجرح يطيب ،ما يوم باوعت بوجها اذا ما أبتسمت

سكينة : هذا يومها

اجرن النفس اريدن اهدي روحي واصدگ هذا يومها بس ما جاي اگدر ،انا الشايفتها چم مره بالسنه هذا حالي، شحال اختها الضلت وحدها

سكينة : هاا هديتي؟

_ بركة خسرت خواتها ثنينهن

بجيت بصوت عالي وهي ردت تقنع بي

سكينة : عدها بنات عم مو وحدها ضلت ،شبيج كوكبة مايصير هيج ابنج نط من البجي

ادگ على روحي وابجي وهو فرفح ،كتمت صوتي بالگوات وشلته وهو بايده الزغار حضني وحط رأسه على چتفي ،هاي حركته دوم تكسر خاطري واحسن بيها يدور الامان

سكينة : اسويله ممه ؟

هزيت رأسي ب أي ،مشت سوتله ممه وردت،گعدت وهي بصفي ما خلتني وعلى گعدتنه وطبت امي

نادية : خلصتي من درامتج ؟

_ درامة ؟

نادية : أي جا شني ،اختج بت عمج وهيج ذبحتي روحج عليها

_ شحاليلي لو عدي اخت مثلها ،بس كل عمره الزين ما يضل

نادية : اهاا

_ أي والله

نادية : ديله بدون حجي ماصخ ،خالتج خابرتني تسأل شني الصاير بينج وبين مرتضى

بأستهزاء گتلها

_ كلشي ما صاير

نادية : جا شعدج هنا ؟

_ هيج ثگيله عليج انا ؟

نادية : فوگ ما تتصورين

_ اهاا

نادية : ما ردت تجين بنيه، ردت ولد

_ بس عدج ولد

نادية : انا ما احب البنات

جريت نفس طويل بيه اهون على روحي حجيها وما اريدن احط بالي يم صراحتها وانقهر، ما شافتني بلعت جمر حجاياتها وسكتت گالت

نادية : خالتج راح تجي وتريد تحل سالفتج أنت وابنها

_ ما تنحل غير بطلاگي منه

خزرتني مغتاضه من حجاياتي اليسببن عقده عد كل فرد بهاي العائلة

نادية : شني تطلگين ،اسد حلگج بالنعال اذا حجيتها بعد

_ ما اريدن ابن اختج ،مو بشر وما ينعاش وياه

نادية : عشتوا ،ليش أنت ينعاش وياج ،زين منه وحاملج

_ مشكلته لانكم فرضتوه علي

نادية : انجبي

بنترتها خلتني اسكت وطلعت من المطبخ تتحلف بي

سكينة : امداه لحضج على هل أم هاي

_ لا تهيجين جروحي علي ،حتى خواتها المثل طينتها يحبن بناتهن الا هي

بايدها طبطبت على چتافي ،وثنيناتنه باوعناله من طب

سعد : سلام عليكم

_ عليكم السلام

سكينة : الله يساعدك ،شعجب متأخر ؟

سعد : بالفاتحة

سكينة : مشيت لقرية خنسة ؟

سعد : أي

سكينة : يعني صدگ ماتت

سعد : أي الله يرحمها ،اهلها كسرتهم چبيرة عليها ،زلم ونسوان لطموا عليها

_ تستاهل

سعد : تتذكريها ؟

_ جا شلون ،سنين هواي ضليت امشيلهم، بس امك الله يهديها حرمتني منهم

سعد : هي هاي امج ،لو بيدها تحرمنه حتى شمة الهوا

سكينة : لا عاد مو هيج ،تضل أم

_ امنه مو مثل كل أم ،يرادلها تسمية وحدها

سعد : صدگتي

بس صعد فوگ لحگته سكينة ،ثاني يوم صدگ اجت خالتي ،دگيت عناد ما اطلع

اريدن صعد اخرب وياهم وهاي تصير نقطة النهاية

لكل شي غلط صار بحياتي بأخر فترة ،بس امي دوم تتدخل وتخرب كلشي علي ...

فتحت الباب ونترت من شافتني گاعدة وكرار ب حضني نايم

نادية : مو خالتج برا ما تطلعين ؟

_ كرار نايم بحضني

نادية : نزليه بالگاع وگومي

_ ما اريد اطلع

نادية : شنوو ما تطلعين ؟

_ برا واشوف اختج ما اريد ،افهميني ما اريدد .

نادية : ليش ؟

_ تغشمين روحج يمة ،انا الابنها ما اردن

نادية : ما صايرة عدنه بنيه تتطلگ ،تردين تخزينه أنت ؟

_ ليش اخزيكم، انا وابنهااا ما اتفاهمنه، ما يتعاااشر حيوااان مو بشررر افتهميني عاد

طبگت الباب واجتي متحلفه بي لان عله صوتي طگتني على راسي بأيدها وتحذر بي بصوت ناصي

نادية : أنت بس جيبي سيرة الطلاگ گدام خالتج وانا اعرف دواج شني وشتصرف وياج

_ ما يهمني

نادية : واذا ابوج شاف وعرف بوگفتج وي حفيد رأجس

_ شتحجين جاي ؟

نادية : هل مرة أنت الغشمتي روحج ،حسن عده تصوير يوديج للگبر مو لوره الشمس

_ ما بيناتنة شي

نادية : بس ابوج لو شافه ما يصدگ ،وچماله چان حاصرج على الحايط وأنت على ذمة مرتضى

روحي صارت تفور من القهر

_ شنييي من أم أنت ،وين اكووو أم تهدد بتهااا ويين

نادية : من ايدج ما تجين بالعيني واغاتي ،وهسة صيري عاقلة وگومي

طلعت وخلتني مكسورة ومخذولة مثل كل مرة وأكثر بعد ،نزلت كرار وگمت دمعتي تفتر بعيني،بس لا ما لازم ابجي ،حرامات تطيح دمعة من عيني بسببهم

حطيت الحجاب على راسي وطلعت اجر بذيال القهر والذل، بس شافتني گالت

بشرى : جا وين كرار ؟

_ نام

دنگت سلمت عليها وسحبت روحي مشيت يم سكينة الخانسة بالمطبخ

_ سكينة

اندارت علي تحظر بالضيافة

سكينة : هاا ؟

مشيت وگفت گبالها مستغربة حالها المگلوب وتوقعت احد مضوجها

_ شبيج ؟

سكينة : خالتج گبل الشلونج گالتلي ،الفلوس الصرفهن عليج چان تزوج بيهن

فتحت عيوني على بشاعة حجايتها

_ يااا

سكينة : مو جديدات خالاتج من يوم يومهن هيج بس هل مرة حيل قهرتني

غطت وجها وبجت ،حسيت سجين ونبتت بنص گلبي من شفت هضيمتها، حضنتها

_ يرحن الج فدوة ،لا تبچين والله روحي تنمرد

جاي

وخرت تمسح عيونها وانا عيوني متعلگه وياها،مثل كل مرة ترسم ابتسامه على وجها

سكينة : جيبي الكيكه من الثلاجه

مشيت فتحت الثلاجة وانداريت عليها

_ شوكت سويتيها

سكينة : گبل شوي

اطيتهياه

_ مبينه طيبة

مدتلي قطعة

سكينة : هاج

اخذتها اكل منها واحجي

_ شوكت تردون لايرأن ؟

سكينة : بس نتحول بالبيت ونستقر

_ خير أن شاء الله

سكينة : أن شاء الله، امشي گبلي بس اصبن الجاي والحگج

_ خوش

گعدت گبالهن واجت سكينة حطت الصنينة وصعدت

بشرى : هاي شبيها چنتج ؟

نادية : طاگتها شرچيه ما تعارفيها

بشرى : خايبة ما تحطين وحده فوگ راسها وتكسرين هذا الخشم

نادية : يعني اسوي مثل سوايتج بأستبرق ؟

ضحكت وشربت من الجاي وانا بكل حيلي ركزت وياهن ،ردت الاستكان للصينية

بشرى : اخذيلج وحده من بنات سامية ،تفرجلياها فر هي وابنج

نادية : بنات سامية ،لا خية وكحات

بشرى : وهذا المطلوب حتى تصگرلجياها

نادية : افكر

_ مو حرام عليچن

ثنيناتهن باوعلي

نادية : حرام على شني ؟

باوعت لخالتي

_ يعني صدگ خليتي منتظر ياخذ عذراء

بشرى : أي

_ واستبرق

بشرى : ما تعرف

_ واذا عرفت شلون

بشرى : هي والنعال ،عاد شلون تهمني

_ بس ابنج مرتاح وياها

نادية : اسكتي كافي

بشرى : ديري بالج مني لا اخلي مرتضى ياخذ عليج

هي تحجيها بضحك بس بهتت بجوابي

_ الله وايدج تسوين فضل

بشرى : ياا يااا ولج

نادية : تخوط خية

خزرتني وانا گمت ما طايقة گعدتي وياهن بس ردت صاحتني

بشرى : تعاي تعاي

انداريت

_ هاا خالة ؟

بشرى : گابليني واحجي شبيج أنت ومرتضى

_ سلامتج خالة بس ابنج مسوي بيتي خان مال شرب

بشرى : يگول منوراج مقهور

_ هذا مو مبرر

بشرى : ردي وتفاهمي أنت وياه

_ الله كريم بس خلوني هل اسبوع هنا ارتاح واردن

بشرى : تطيني حجاية ؟

هزيت رأسي ب أي ما راضيه روحي اردن لنفس العيشة بس دوم انا مجبورة، ما يوم قررت قرار بدون ضغط وتهديد ،خليتهن ورديت للغرفة لگيت

كرار گاعد بس ما طلعته ابد وضليت انا وياه منا لمن مشت الا طلعنه ،بس فتحت باب الغرفة وشاف سكينه زحف ناحيتها بساع وهي ضحكتها ملت البيت ودنگت شالته

سكينة : تعرفني كروري ،حبيب خالته يعرفني

تبوس بيه وهو يضحكلها ،مبتسمة اباوعلهم وطب اسماعيل من برا مخبوص ،صحت وراه

_ شكوو ،اسماعيل شبيك

اندار علي بعده ما حاجي ودگ موبايله، فتح خط متلهف يحجي

اسماعيل : وينهااا، گلي طلعت من الجامعة ،باووع ضل وراها منا لمن توصل للبيت ،خوش خوش انتبه

هذا الاتصال چن ردله روحه ،تنهد ومسح وجهه واجه وگف گبالي

اسماعيل : ماكو شي لا تخافين

_ جا منو اليضل وراها ؟

اسماعيل : بعدين

بس حجه هيج سكينة اخذت كرار ومشت للمطبخ

_ تحجيلي ؟

حتى من اريدن واحد بيهم يحجي استأذن منه ،خلوا بي خوفه عمن گضيت عمري مو

قريبة على واحد بيهم غير بس سعد وهم مو كلش

اسماعيل : رجلج يفتر ورا داليا

طبگت حواجبي ما مفتهمة قصده وهو كمل

اسماعيل : بيوم الحجه اسمها گبالج چان يقصد يهددني بيها وانا صارلي چم يوم قلق عليها

امس حطيت واحد يضل عينه عليها وصدگ اليوم شايفه جاي محاجيها وخابرني

_ بس شلون طب للجامعة ؟

اسماعيل : ما يصعب عليه شي

_ وهسة وينها ؟

اسماعيل : طالعة للبيت

_ عدي اقتراح

اسماعيل : شني ؟

_ ليش ما تتزوجها حتى تأمن عليها يمك

صفن لثواني ورد گال

اسماعيل : ما ترضى الا تتخرج

_ جا شلون ؟

اسماعيل : راح احجي وياها

_ احسن

هز رأسه ب أي ومشى وثاني يوم ردت اسأله حجاها لو لا بس چان يدير وجهه كل

ما شافني وچن اكو شي مسويته مضوجه وانا ما صدگت علاقتي بواحد بيهم تصير زينة شبساع رد مثل گبل

سكينة : شبيج ضايجة ؟

_ اسماعيل احجي وياه ما چن يشوفني

سكينة : وشني الجديد ،هم اخوتج من يوم يومهم هيج

_ اعارف ،بس صار زين

سكينة : حاجيه وشوفي شكو

وبالليل تانيته هو أخر واحد يجي يضل يم جماعته بس شافني متانيته عبرني ،ركضت وراه، وگفت گباله معترضه دربه

_ شبيك اسماعيل احجي وياك ما تحاجيني ،ضايج مني ؟

اسماعيل : لا

_ شلون لا ،جا ليش هيج رديت ما تحجي وياي

تلفت يدير عيونه وطلع باكيت الچگاير من جيبه شغل وحده جر منها نفس طويل وحط عينه بعيني

اسماعيل : أول مرة اوگف وياج وما ارضى الاذيه عليج ،احاربهم ما اخليج ترديله تالي امي تگلي هي تگول سكتوا اسماعيل اريدن ارد لرجلي

اشرت على روحي مصدومه

_ انا گايله هيج ؟

اسماعيل : جا منو ،وگايله السبوع الجاي تردين لبيتج

وهو يحجي تذكرت تهديد امي وما گدرت انكر بعد ولازم استسلم وارضى بحجي انا ما حاجيته

_ خاله اجت وگالت بس هل مرة وبعد ما يعيدها .

اسماعيل : يسوي الاكثر منها، بس براحتج

ضليت واگفه بمكاني وهو دار وجهه مني وصعد ومن هل يوم انگطعت علاقتي اكثر بعد من گبل وامي مشتها

علي انا رايده اردله، گضى الأسبوع ورديت هو اجه اخذني الدرب كله ساكت سكوته

خوفني وخلاني اعيش القلق طبيت للبيت گبله بعدني بالصاله

وسمعت الباب وراي انرگع بقوة وكرار عاط خايف من الصوت الصار ...

ثواني وصار گبالي ،من وگفته وعيونه الما حركهن مني حسيت راح تصيرلي مصيبة اليوم ،بلعت ريگه اريدن خوفي ما يبين

_ شبيك ؟

مرتضى : سلامتج

شكله عكس حجايته، مشيت للغرفة احاول اسوي روحي طبيعية ،نزعت حجابي والعباة ودفيت روحي زين وطلعت لان البيت يگص گص ،وانا شايله كرار عدلت الكلاو مالته ومرتضى گبالي گاعد يباوع بلايه أي حركه

_ هسة دفييت، هاا دفه الحلوو

بسته حيل وهو يباوع لمرتضى ،شما يصير يضل خوفه من ابوه يقهرني جاي يعيش الچنت اعيشه انا

دنگت احطه عد ابوه وهو عاط، حرت شلون اخليه يسكت ومرتضى يباوعله فلا متهم أصلا ،گلبه صرت احسن بدگاته على گد ما فحط ،مشيت بيه للمطبخ غسلت وجهه وهو يناشغ ،مسحته بردن ثوبي من الماي

_ كافي ياروحي ،كافي ماما انا يمك والله ،كروري حبيبي

احجي وياه بهدوء وانا روحي مخبوصة وي روحه منا لمن سكت گضه حيلي ،ضليت شايلته

ومشيت فتحت الثلاجة مثل كل مرة ما اشوفن بيها شي فارغة

والله هداه من گلتله ومشى تسوگ وكل هذا الوكت وانا كرار ما نزل من ايدي ،اسوي العشا وشايلته بوخه الطباخ متحملها بس اهم شي مو بعيد علي

گملت كلشي وصحته شال الصنينة واحنه ناكل گال

مرتضى : اكلي زين

صفنت بوجهه ما مفتهمة المقصد من الگاله ورديت اكل ،لگمه بحلگي وايد اهرس البتيته لكرار واوكلها اله يحبها وبس غسلت المواعين طبيت للغرفة انا وياه وتمددت وحطيته على ايدي الوليله لحد ما غفى

وهستوني انا غفيت وحسيت برچليه انعتت، فزيت وبس فتحت عيوني صار مرتضى بوجهي ،جريت روحي اريدن اگعد على حيلي بس ما خلاني واشر على حلگه

مرتضى : اششش

وبعدني ما مستوعبة شي وحسيت بشي مثل الجمرة انلزگت على رچلي ،شاغت روحي لسابع

سما

_ يمةةةة

وعلى عيطتي فز كرار من شافني ابچي وابوه گباله تسودن، وگبل لا يطلع تقرب مني

مرتضى : حلفت احرگ رچليج العتبت باب البيت وي اخوج

طلع وخلاني اللوب ،اباوع لمكان الحرگ ويزيد وجعي اكثر ،مدري بشني حرگني حيث اللحم الاحمر مبين

مسحت عيوني ادوسن على وجعي من شمر روحه بحضني، حضنته شوي ورد نام وانا ما عولت اطلع واتعارك وياه ...

بس شافني أبتسم وچن متانيني، وگفت گباله اصيح

_ شبيييك ،هاي سواية تسويهاا، عقل أنت احجيليي وين اكو عاقل يسويي سوايتك

گام وگف گبالي

مرتضى : لا يگعد ابنج

_ ابنيي، ليش مو ابنك هو ؟

مرتضى : ما معترف بيه

_ اهاا

مرتضى : والله

_ شالك الله وسطرك سطر كون وحرگك بنار جهنم

ضحك ما مهتم لكلشي جاي احجيه ،استغفرت اكثر من مرة ومشيت ادولي شي اخليه عليها حتى تبرد احسن روحي جاي اموت وهم

زين لگيت عصارة كرار مال مشگ حطيت منها تالي صارت تاكل بي اكثر

مشيت غسلتها ابجي وايام ضل الوجع ينهش بي عمن هذا أول حرگ احترگه بهاي الاذيه بس ما چنت اعارف هاي البداية ..! ! !

وبيوم چنت اغسل بالبيت وطب يركض ويصيح علي نطلع من البيت ،دگيت عناد ما اطلع

_ شني ضالين يوميا من بيت البيت ترا ما صايرة هاي والله

مرتضى : بلا حجيي لا اكسر سنونج بحلگج ،بساااع

شمرت الماسحه وطبيت طلعتلي جنطه بساع حطيت هدوم كرار وملاعيبه وچم حاجه الي اجيب واكوم بالجنطة سديتها ولبست الحجاب والعباة وطلعت مشدوهه من صياحه خبص الدنيا خبص

مرتضى : مووو أصيح يله ،طرششه ما تسمعين

_ غير اخذ هدوم خوما نطلع بلياهن

اجه جر الجنطة مني

مرتضى : شيلي ابنج بساع

مشيت شلته من الگاع وطلعت وراه اتعثر بخطواتي من سرعتة ،وبس صعدت حرك السيارة طاير وبايده الموبايل يحجي

مرتضى : لووو الزمك حظ حظك اطيحه ،كلب شلون تطييي عنوانيي

يصيح روحه بخشمه ولو هو من يوم يومه هيج

مرتضى : لا تبررر حتى لو کلتلي ،خررب شني حط المسدس برااااسك انعل ساسك وساسه هم

حطيت رأسي على الجامه وحضنت كرار لصدري ما اعارف وين ماشية ولا شني المنتظرني .؟؟

°ليث°

كضيت ايده

_ نزل السلاح ونتفاهم وياه

صيح

_ على شنييي تتفاهمون وياي

أبو درع : اطيني عنوان صاحبك وخلص روحك مني لان انا هنا بمثابة ملك الموت الك

_ ما اعرفه

سحب اقسام ورد وجهه السلاح عليه

أبو درع : وهسة ؟

تلفت بيناتنة

_ اطيكياه بس بشرط

أبو درع : گبل لا تشرط اكتلك، فضهااا

باوع علي

_ أنت من بيت رأجس

مسحت على لحيتي ورديت

_ أي

_ ليث

_ زين طلعت تعارفني

_ انا الاعرف

أبو درع : فضهاا عاااد

_ بمنطقة ال*** بشارع *** ثاني بيت

طبطب على چتفه

أبو درع : عفييية عاشت ايدك

گبل لا اطلع حذرته

_ اذا ما لگيته اردلك

طلعت ورا أبو درع وحركت طاير ،وبس وصلت گبله نزلت ،طفرت من فوگ الباب وفتحه طب يهز بأيده

أبو درع : طلعت بيت رأجس كلهم كسر

_ اسوي روحي عاقل

أبو درع : عاشت ايدك صريح

_ اتعلم مني

ضحك ومشى گبلي وانا گلبي هذا احسن جاي ادوس عليه ،البيت مبلل بالماي وذاك هو مبين احد عايش بيه وصدگ العنوان مطيناه

أبو درع : چن ماكو احد بالبيت ؟

_ لا شوف الگاع مبلله

وگف بنص الصاله

أبو درع : انا اگولن منهزمين

تلفتت

_ خاتلين خاف

أبو درع : شوف

گعد على باية الدرج يدخن

_ شو گعدت

أبو درع : عليش اتعب روحي ،مبينه السالفة بيها علسه

ما رديت عليه ومكان مكان دورتهن ،اخر شي صعدت للبيتونه وبس شافني نزلت كام

أبو درع : امشينه نزوعه حليب امه

_ اطيني جگاره

أبو درع : اعذرني

_ اطينيي

شمر علي الباكيت والجداحه

أبو درع : اذا ما احجي لصخر عليك شوف ،بعينيي

_ وسم

اجه جراني من فالينتي

أبو درع : صاير ما تحترم

_ اديك بماي بارده أنت

أبو درع : بابا افتهم، مره متزوجه جاي تركض وراها

_ مو عليها

أبو درع : لا تچذب ،ثاركم ونار العشگ مخبلاتك

_ اطلگها واتزوجها

أبو درع : انصحك لا تاخذ غيرها مبينه نضيفه

_ وأنت هذا الهامك

أبو درع : اهم شي النضافه

ضحكت وانا چان كل خلگ للضحك ما عدي رديت لبيت صاحب الخيسة طاير وابو درع الدرب كله يصيح

أبو درع : يااابوية راح اموووت وانا بعدني ما لاگيهااا

طبگت ونزلت وگفت گباله مبتسم من شفته مخبوص مبين يريد ينهزم من بيته

_ شني وين ماشي ،بيتك حلوو ومرتب حرامات تعيش رحال

بس خلصت حجيي برچليه دفرته على بطنه طيحته على الگاع ودنگت گباله كاض وجهه بين ايدي والولدم التموا علينه

_ ما عااارغت ويامن تلعببب، مو أنا الينغدر بي

طگيته كله خليت خشمه يصب دم ،كفيت قميصي من گاملي

_ تعال تعال

تلاويت انا وياه وكلساع احد حاط روحه بيناتنه رديت ليورة احذر

_ والله اليتدخل اطبگه وياااه

_ استهدي بالرحمن خوية راح يموت بايدك

باوعت لهذا الخيسة اريدن بسنوني اكله

_ مستهدي خوووية بس وخروا عنييي .

ما خليته الا بعد ما صار جثه وهستوني اريد اصعد السيارة وطبگت سيارة الشرطه، درت عليهم ما مهتم وگف الضابط و وراه الجنود

_شكوو شصاير ؟

وگف على حيله يشكيني

_ سيدي اتهمجوا علي وگبل شوي حتى تهديد هددوني

باوعلي

الضابط : صدگ هذا الحجي ؟

_ أي سيدي صدگ

درت عليه من اجه وگف بضهري بس شافه الضابط اخذله تحية

أبو درع : امشي مجد رد لواجبك انا احلها

الضابط : صار سيدي

_ وييين سيدي ،وييين مو حتى هذا ويااه

ياشر على أبو درع وانا اباوعله رافع حاجبي ،الضابط ما چن يسمع واخذ الدورية ومشوا ،جراني من ايدي

أبو درع : يله

هل مره صعد هو يسوق لان ايدي من طگيت هل زباله احس العظم تضرر

أبو درع : سوايه سوايتك ،خبل أنت ، لوما انا چان رحت بيها

_ مشكور

أبو درع : وغصبا ما على راسك

گبل لا نوصل للقرية گال

أبو درع : انزل سوق لك

_ لا اله الا الله

أبو درع : بساااع

نزل وانا نزلت صعدت بمكانه بس صعد بتكسي انا حركت ورديت للقرية، سلمت بلايه حتى ما اباوعلهم واخليهم ينتبهون الحالي ،سبحت ونزلت ،گعدت يم جدة

_ ها غضةةة شلوونج

غضة : على الله ،وأنت

_ زوين

غضة : شو زوين ،مو زين وبخير

_ تعبان جدة

غضة : سودة علي من الگيعان ودوامك

گتلها أي بس انا متعلم على هل تعب ،تمددت على رچليها واجت امي تسأل

زهرة : ما شايف نوح وين ؟

_ تلگيه يم فقار

زهرة : لا مو يمه مشتيلهم انا

_ من شوكت طالع ؟

زهرة : بس تريگ

گعدت على حيلي خابرته ،دگ شوي وجاوبني

نوح : هاا

_ وجعا ،وين أنت ؟

نوح : مشيت وي عمي يوسف للدواچن ،ليش ؟

_ امي ضال بالها عليك ليش ما مطيها علم ؟

نوح : مشيت مستعجل

_ خوش

°جفون°

چنت واگفه اغسل المواعين والملل كاتلني وهو طب من برا ،مشى شرب ماي من الثلاجه وطلع ،كملت شغلي ما مهتمتله حتى الله يساعدك ما گلتله لان عود مبين عليه تعبان ،ثاني يوم مشن عمة زهرة وجدة وعمة عطاء لبيت عمي باقر علمود يشوفن ميمنة بت حواري يگولون داگها أبو صفار ،گتلهن الحگچن بس تذكرت لازم اقرا هذا اخر شهر امتحانات ونگعد بعد

فرشتلي بسط وحطيت كتبتي ومشيت فتحت قفص الكتاكيت جابهن الي ليث گبل چم يوم ،خليتهن يلعبن و وگعدت اقرا، انتبهت للباب انفتح

رفعت راسي ودرت وجهي من شفته طب ،وضليت گاعدة بمكاني اقرا والكتاكيت تفتر يمي رفعت راسي ارمش بعيوني من الشمس

نوح : ما متوازيه گاعده هنا

_ مو قوية الشمس

نوح : گومي

_ گاعدة اقرأ لا تلح

نوح : اها ،انا الح ؟

_ أي

نوح : خوش

دنگ جر الكتاب وسداه

نوح : حطي حجابج على راسج وطبي

صفنت بوجهه الا اشتوعب، جريت الشال من رگبتي وحطيته على راسي وهو گبالي خازرني

نوح : وتالي وياج ،لشوكت تضلين ناسيه حجابج؟

_ انساه شسوي يعني

نوح : ديررري بالج اشوفج بعد طالعة لهنا مفرعة

_ لا والله

نوح : وداعة عبدالله

_ صارت قديمة وما تضحك

نوح : ما رايدج تضحكين

عيبتله وطبيت اركض حتى الكتاب خليته بأيده وكتاكيتي ضلن طالعات برا رديت اركض اطببهن الدنيا راح تغرب وتجيهن البزون، بس شافني صاح

نوح : هااا وين

انداريت عليه عيوني على الكتاكيت وهو يم باب الديوان يحجي وياي بأيده الموبايل

_ كتاكيتي اطببهن

نوح : خوش ،كتابج بالمطبخ

دار وجهه وطب، استغربت هذا شبيه هيج عيونه لازگهن بالموبايل ،لميت كتاكيتي وطببتهن للقفص وشلت الدفتر ضال على البسط وطبيت ،اخذت الكتاب من المطبخ ومشيت للغرفة ،بس فتحت الباب صحت عليها

_ المنعزله عيني شوكت الله يهديج تعاشرين الوادم

غاية : اهووو

غطت راسها بالبطانية، جريتها منها

_ شني ما نااايمة، گوميي ترا والله مليت وحدي

غاية : امشي مني جفون

_ والحمزة ما امشي يله تحركيي ،شني هاي صايرة كلج كسل

گعدت على حيلها بزعانه روحها من ملحتي بس انا علمودها حالها ما جاي يتغير من ذاك اليوم لهذا اليوم

غاية : شكو خبصتيني ؟

گعدت گبالها

_ ما احسج ويانه ،حتى ما چنج موجودة

غاية : مو بيدي

_ هسة احنه ميخالف بس عزيز خطية والله صرت احسنه يتمنى الحجاية منج

غاية : انا تعبانة جفون ،شگد ما احاول اردن مثل گبل افشل

_ وين جاي تحاولين ،بالغرفة هنا وحدج ،اطلعي ويانه شوي شوي تردين غاية القديمة

غاية : احاول

_ فدوة لخاطري والله مليت وحدي

هزت رأسها ب أي

غاية : گومي

طفرت من مكاني ويمكن چانت أول مرة أبتسم بيها ابتسامه من كل گلبي بعد كلشي صار ،وي طلعتنه طبن، عمة ما ساعتها الگاع من شافتها طالعة وبلهفه اجت حضنتها

زهرة : يايمة ردتلي روحي والله

ابتسمت وسحبت روحها

غاية : شلونها ميمنة ؟

زهرة : باجر ياخذوها للدكتور

غاية : احسن

عطاء : رموش ما تمشين لصاحبتج تسأل عنج

_ عدي امتحان من امتحن واگضي امشيلها

عطاء : أي عفية

غاية : يمة عون شلونه ؟

زهرة : الحمدلله بخير

غاية : تعلم على ريحانة مو ؟

زهرة : أي

غضة : جفون امشي جيبلي دوة الضغط ناسيته

_ صار

مشيت جبتلها حباية الضغط وگلاص ماي وگعدت يمهن لگيتهن گاعدات

غضة : عفية بعد حبوبتج

ابتسمت

_ بالعافية

عطاء : يمة شوكت تتصالحون أنت وابوي مو چن طولتوها

غضة : من تتصالحون أنت وزلمتج

عطاء : هسة انا شحطني بالنص

غضة : جا عليش تسألين وتعارفين انا ليش معانده وياه

عطاء : والله يا يم دة اتعبين روحج على الخالي بلاش

غضة : ماكو على الخالي بلاش ،ابوج انا الاعرف دواه شني

زهرة : جفون

_ هاا يمة

زهرة : اصعدي شوفي الولد عدهم هدوم وصخة فوگ راح اشغل الغساله

_ خوش

گمت اول شي طبيت لغرفة ليث جانن الهدوم الوصخة على الجرباية حطيتهن بالسله الحاطتها عمة على جهه لكل واحد بيهم بس بيهم سوله يشمروهن على الچرباية ،غرفة صخر ما وصلتها

لان امس نضفتها وهو مو هنا ،والبلاء الاسود غرفة نوح ،الخربطة على اصولها، كل شي بيها مو بمكانه حتى چرچف الچرباية بالگاع مشمور

لملتها بساع بساع واخذت الهدوم ودرت اريدن اطلع وصار بوجهي، طب اخذ هدوم من الكنتور وطلع ،هزيت ايدي هذا منين جايب هاي شخصيته الجديدة ..؟؟

نزلت السله متروسة ،عمة من شافتها صفنت علي

زهرة : هاي وين چانن الهدوم

_ فوگ

زهرة : جا مو امس غسلنه

_ ولدج هواي يستهلكون هدوم

زهرة : حطيهن بالحمام وردي أقري

_ طبعا اقرأ غير عدي امتحان

زهرة : خلي غاية تشرحلج

غاية : شأشرح الها يمة

زهرة : خطية يمة ساعديها مو ماعدج شي

تأفأفت وما حجت شي ،وانا عارفت عمة تريدها بس ترد تحجي وما تعتزل بالغرفة، فتحت كتابي وحطيته گبالها

گضه اقره وحدي بس سويت روحي كلش ما ضابطه الموضوع

_ باعي هذا كلش مو زينة بيه واحسن ما راح اجاوب

بدت تشرحه الي اول شي ما اندمجت بس بعدين حسيت بشرحها صار بيه روح وصرت اتفاعل وياها

غاية : اطيج سأله تحلين ؟

هزيت رأسي ب أي

_ احسن حتى اتأكد من روحي

كتبتلي اسأله احلهن وهي وياي مركزة

عطاء : غاااية

رفعت رأسها

غاية : ها عمة

عطاء : عزيز بالديوانية امشيله

گامت تريد تطلع بس وگفت بدربها

عطاء : رتبي روحج وتعاي واضفري شعررج لا تلبسين حجاب

غاية : شني السالفة عمة

عطاء : ترا لوما ميمنة والصار چان عرسج هل شهرين

تنهدت تنهدية طويلة ومشت للغرفة شوي وردت طلعت ،ابتسمت فرحانة من شفتها لابسه ثوبها الخيطته عمة وضافره شعرها، صح وجها شاحب بس هو يعارف حالها شني

غضة : فدوة لضفيرتج حبوبة

اندارت على جدة وابتسامتها خفيفة چانت بس خلت حتى عيوني تفرح وانا اشوفنها تنرسم على وجها ..

°غاية°

فتحت باب الديوانية چان وگف يباوع من الشباچ الجبير على الحوش ،سديت الباب وعلى صوته اندار اشرلي اجي يمه ،مشيت ناحيته بس صرت قريبه عليه كض ايدي وجرني يحضني وبهدوئه وياي مثل كل مره يحجي

عزيز : ميت گلبي من شوگه

همست

_ عزيز

عزيز : نفسه

_ لا يطب احد

عزيز : كلهم طالعين

وخرني

عزيز : تعاي

مشى ايدي بأيده خلاني اگعد واجه گعد بصفي كلش قريب بمسافه أول مره نگعد بقربها طگطگت اصابعي متوتره وباوعتله من گال بأبتسامه خفيفه

عزيز : شبيج ؟

_ شبيه ؟

كض ايدي ثنيناتهن يفكهن

عزيز : اصابعج ارحميهن

ضليت ساكته وهو هسة الا انتبه

عزيز : ضفيرتج

عيوني بعيونه وابتسم من گلتله

_ شبيها ؟

عزيز : اعشگها

ما عارفت بشني ارد ،بس اكتفيت بأبتسامه خفيفية وهو كضها من الطرف يلفها على ايده

عزيز : اموتن عليه ،كل ما اشوفه احسنه هذا ثاني اثمن شي من ممتلكاتي

_ جا ليش مو الأول ؟

عزيز : أنت الاول بعدين هو

_ اممم

عزيز : گبل لا يطيح ليث وينفل شعرج گدامي شفتج

عد شجره النبگ وچنتي فاله شعرج بس ما عارفت هاي أنت ،بوكتها گلت هاي ياهي هيج شعرها راح يطخ الگاع ،مشيتي من

بالي وما تذكرت من زغرج هذا شعرج الا بعد ما شفت القراصه طاحت منه حرت بعيوني شلون اديرنهن منه

وهو يسولفلي احس بشعور غريب، اول مره احد يمدحني ولازم استمعله لان هو حلالي ،بأيده على خدي مسح

عزيز : مستحاج اعشگه

_ أنت تعشگني كلي

ضحك

عزيز : صح والله ،أنت وشعرج

_ ليش أنت وشعرج ؟

عزيز : هذا وحد ،نعامله معامله تختلف

دنگت من رفع الضفيره لخشمه يشمها

عزيز : حاطتلها من عطرج ؟

هزيت رأسي ب أي ،رد شمها مبتسم

عزيز : طگتين على الراس توجع، شلون اصبر روحي هسة

بلعت ريگي حايرة منين اديرن عيوني من عيونه گام وگف وانا هم گمت

عزيز : انا راح امشي لان خايف على سلامتج ،ديري بالج على روحج

_ أن شاء الله

من دنگ لطولي رديت ليوره، حط وحده من اديه ورا ضهري وطبع بوسه خفيفه على خدي وهمس

عزيز : اصبر روحي

عدل وگفته وانا بعد ما گدرت احط عيوني بعيونه طلع هو وانا رديت جوا ،بس طبيت تلگتني

عطاء : هااا ؟

_ شنو هاا ؟

عطاء : صارلكم ربع ساعة وحدكم ،شسويتوا ؟

_ يااا عمةةة

عطاء : مو أخاف عليج منه

_ صدگت

عطاء : لازم تصدگين

حجت هيج ومشت للمطبخ وانا كملت دربي للصالة اشوفن جفون

_ هاا كملتي ؟

جفون : ضل بس سؤال واحد

گعدت يمها

_ خوش كملي حتى اشوف

هزت رأسها ب أي وبس كملت اطتني الدفتر ،شفت حلها

_ ماكو اغلاط عاشت ايدج ،شاطرة

جفون : من يومي

_ يا طلابة شوفة النفس

جفون : لا ترا جاي احجي الصراحه

_ الله يسلم صراحتج

جفون : امين يارب

هزيت ايدي من كل عقلها رفعت ايدها تدعي الله يديم صراحتها، گمت طبيت للغرفة وهي وراي تصيح

جفون : اهووو هم ردت للسبااات

°جفون°

شمرت الكتاب وتمددت

غضة : خايبة گومي لا يطب احد

_ ضهري يوجعني

غضة : تعاي عطاء دلكيلها ضهرها

عطاء : منيلي حيل انا

غضة : خايبة شوي ،خطية مبينه متأذيه

استسلمت واجت دلكتلي ضهري شوي فك وگدرت اگوم ،ثاني يوم امتحنت وبس طبيت للبيت صار بوجهي بس شافني حط عيونه بالموبايل وعبرني

درت اباوعله ابد ما اندار

عطاء : جفوون

درتلها

_ هاا عمة

عطاء : شبيج واگفه

مشيت اكمل دربي وارد عليها

_ ماكو شي

عطاء : اممم، جا ليش چنتي تباوعين على نوح ؟

_ متغير

عطاء : وياج ؟

_ لا وي الكل

عطاء : اهاا

_ جا ما منتبهين عليه صاير حتى ما يحجي مثل گبل وكل وكته بالموبايل

حطت ايدها على خدها

عطاء : ولججج اضن لاگيله وحده

_ هاا

عطاء : مبييين ولج جا شعددده هيج كاتل روحه على الموبايل

_ لا شسالفة عمة مو هيج الولد

عطاء : شمدريج بيهم أنت ،مبين مل منج ولگاله وحده تقدره

_ خل يلگاله لان انا ما اريدنه

عطاء : امداج غمةةة

خليتها وطبيت ،بدلت ومشيت للمطبخ صبيتلي اكل وگعدت افكر بحجي عمة، وعلى گعدتي طب هو مثل كل مرة

يعبرني حتى ما يحجي ،غميت روحي عليش ضايجة خليه يسوي اليريده ما يهمني ،گمت شلت الصينية انسدت نفسي ،وانا اغسل المواعين طب ليث

وخرني يغسل وجهه على السنك نشف وجهه بفالينته وباوعلي

ليث : شبيج مطنگره ؟

_ انا ؟

ليث : جا انا

_ ما مطنگره

ليث : خاف ممجاوبه ولج ؟

_ لا والله جاوبت وكلش زينه

ليث : جا عليش بعد ضايجة

_ الا تخليني ضايجة يعني ؟

ليث : نوح محاجيج ؟

_ لا والله

ليث : جا جدي

_ محد والله

ليث : اممم، ما جاي اصدگ

على وگفتنه واندارينه انا وياه على صوت نوح

_ شكوو ؟

ليث : جفون ضايجة وصار ساعة اريدن اعرف يا كلب مضوجها ما جاي تحجي

نوح : أنت گلتها فد واحد كلب

ليث : مثلك يعني ؟

نوح : استغفرالله

ليث : شبيك وياها ؟

نوح : ما محاجيها أصلا

ليث : احلف .

نوح : وداعتها .

دار علي

ليث : جا شبيجن يوميا وحده مطنگره وعازله روحها

_ طلع مربط الفرس يم غاية

ليث : مشتاگلها بس هي صايرة بذاته حتى الجامعة خلتني اداوم وحدي

_ شگد حاجيناها ،فاتت عليها الامتحانات حرامات

ليث : صاحبتها كل ما تشوفني تسألني عليها ،حتى گالت تجي تشوفها تريد

_ داليا ؟

ليث : أي

_ هلا بيها

محمد : شعدكم ملتمين ؟

درنه عليه يباوعلنه مبتسم، فتحلي ايده مشيت لحضنه، حضني وباسني من راسي

محمد : بوية بت العزيز

_ تروحلك فدوة

محمد : حبيبة عمها سالمه

ليث : عمي هنا الولد مظلومين

نوح : أي بعلي

محمد : هذن القوارير وصية الرسول

نوح : حتى بهاي مظلومين

ليث : يستاهلن الدلال بنياتنة

_ حباب أنت

ليث : من يومي

طبينا اني وعمي حاضني، بس شافتنة جدة گالت

غضة : الله يديمك سند الهن

هداني ومشى گعد يمها

محمد : ويديمج خيمة علينه

غضة : بعد روحي

عطاء : الله يساعدك خوية

رفع رأسه يرد على عمة

محمد : ويساعدج بعد اخوج

عطاء : بعد روحي ،شو أبوي ما رد وياك ؟

محمد : ضل هو وباقر هناك وانا رديت

عطاء : خير أن شاء الله

محمد : أن شاء الله ،بوية جفون گومي حطي موبايلي على الشحن

_ صار

اخذت الموبايل منه حطيته على الشحن ورديت گعدت يمهم، ما افوت الگعدة البيها عمي محمد

غضة : ما تجيبولي بنيات كاظم ،هذاك اليوم ما شفت منهن شي

محمد : تدللين الجمعة اجيبهن لان هسة عدهن دوام

بالليل مشينا لبيت عمي يوسف حتى نشوف بركة من يوم الاربعين وبعد ما مشينالها، تلگتنه عمة مو نفسها بساع چن كبرت، سلمنه عليها وسألنالها على بركة گالت بالغرفة

گبلي مشتلها غاية وانا ضليت شوي يم عمة الا لحگتها بس فتحت الباب غورگن عيوني من صارن حجاياتها ترس اذني

بركة : شلوون بي ،شلون ترضى روحي بالصار، وانا خواتي ثنين جوا التراب ،ولج من يوم الاربعين وانا نار بگلبي من قريت اسمهاااا على الگبرر ،والله مشتاگه الهاا، والله روحي لايبه على شوفتهاا، چنت اگولن ميخالف واهون بروحه بصائر على روحي ،عدي ميمنة تالي الهونت على روحي بيها هم مشت

متحاضنات ويبچن ثنيناتهن، بركة تحجي وغاية ما فكت حلگها ،و وين الا هودت ومسحت دموعها

بركة : ما چذب الگال ماكو وجع مثل وجع الفاگدله

عزيز ،كل ساعة احسن بروحي طير مذبوح تلوب روحي بالبيت وما اعارف دواها شني

سديت الباب وطبيت يمهن امسح بعيوني واحجي وياهن

_ كافي عيونچن انمردن

باوعت لغاية بصوت رايح گالت

بركة : شلون بيج وأنت الشفتي اختي احترگت

بلعت ريگها وچانت غصتها وضياع الجواب عدها كلش كافية توصل البيها، گامت فتحت الكنتور ركزت وياها من طلعت شي اسود، من انتبهت چان هذا شال ميمنة

بركة : هذا اكثر شي يوجع گلبي ،بس ضامته لان چانت لابسته من احترگت

غطيت وجهي ابجي بعد ما اگدر اكض دومي وهي گعدت منفجره اكثر من گبل شوي بچت ،وعلى صوت بچيي انا وياها طبت عمة

شيماء : بركة يمةة كافي ،اروحلج فدوة ،والله ما بي حيل يصير بيج شي ،مصبره روحي لخاطرج

تحجي وتبچي ،مسحت عيوني حتى من تشوفني سكتت تسكتت، ضمت الشأل ومشت شمرت لحضن امها ،عمة عيونها متروسة دموع بس تعارف لو نزلن گبال بركة راح تزيد ما تنقص ...

شهگت من شفت خشمها نزف، طلعت بساع تريد تغسل وعمة انخبصت خبص ،ركضنا وراها والقهر والخوف ماكلنه عليها، تغسل ويرد ينزف، بس طب برهان وشافها بهت

برهان : شبيها ؟

شيماء : بچت ،بچت ونزف، شگد اگلها ما ضل عدي غيرج لا تهدين حيلي عليج ما تسمعلييي ،راح تخبلني والله

تحجي وتلطم على روحها ،برهان فوگ قلقه خلته يقلق بالزايد

برهان : تطيحين علي أنت هم ،فدوة اروحنلج يمة اسكتي

شيماء : شسكت ولك شلون اسكت ،شوووف حالهاا

سدت البوري ايدها على خشمها

بركة : مابي شي

برهان : امشي لبسي حجابج والعباة اخذج للدكتور وديري بالج تحجين

بركة : ما اريدن

شيماء : مو بكيفج

مشت عمة جابتلها الحجاب والعباة، وجبرتها تلبسهن

شيماء : عينك عليها

برهان : وين ماخذها يمة

شيماء : كض ايدها لا تهدها

صفن بوجه عمة وهز رأسه

برهان : صار

كض ايدها وطلعوا ،ضلينه يم عمة لان وحدها منا لمن ردوا من الدكتور ،تلگيناهم من طبوا ،برهان وجهه مگلوب وبركة أي تفسيره ما بوجها

شيماء : شگاللكم الدكتور ؟

برهان : بس جاي يصير عدها صعود بالضغط

شيماء : مزمن مو ؟

هز رأسه ب أي وعمة شهكت شهگة من كل گلبها ولطمت على روحها

شيماء : جااا حتى هاااي الما ضلي غيرها لحگني الضغط عليهاا

بركة : شني السالفة يمة هو ضغط

شيماء : ضغط وبعدج ببداية عمرج ،ولج ولم سودنها الضغط

بركة :ماعلي شي لا تخافين

من القهر ما عارفت شني الاحجي لا أنا ولا غاية ،من ردينه سولفت الجدة

غضة : ياا يااا وينها وينه

_ اندري جدة والله حيييل انقهرت عليها ولو شايفه عمة شصار بيها ينمرد گلبج

غضة : حگها

ثاني يوم مشن جدة وعماتي يشوفنها والجمعة عمي كفل ليث يجيب بنات عمي كاظم ،بالگوات گومت غاية وياي على البيت حتى نكف الشغل

بساع وعمة تطبخ للغدا وبس اجن تغدينا و ورا صالة المغرب گاعدين وطب عمي محمد گامن البنات سلمن عليه

محمد : هلا بيچن بعد عمچن

سيوف : مشتاقيلك

محمد : تشتاگلج العافية ،بوية غاية

غاية : ها بوية

محمد : جبتلچن حلويات ،اخذنهن وامشن لبيت عمج يوسف يم بركة غيرن عليها جو و ودن على هيفاء وريحانة

غاية : صار

لبسنه عبينة واخذنه الحلويات ومشينا لبيت عمي يوسف ،بس دگينا الباب فتحه النه برهان من شافنه وخر من الباب يسويلنه درب نطب، بالمطبخ لگينه عمة سلمنه عليها وگالت

شيماء : بركة جوا طبنلها

غاية : گاعدة ؟

شيماء : أي أي ،بركةة يمةة اجنج البنيات

مشت گبلنه واحنة وراها، گامت على حيلها من شافتنه ،سلمت علينه وحده وحده

سيوف : جبنه حلوياتنة واجينه نسهغ يمج

بركة : كل الهلا بيچن هم زين اجيتن ضايجة وحدي

صارت گعدتنا بالصالة ،فرشنه سفره حتى لا نوصخ الگاع وبهذا الوكت مشى برهان يجيب البنات شوي وطبن ،هيوفة وريحانة وحواري وياها سيف وحوراء

حواري : الله صار چم يوم مفارگه هذا البيت

بركة : بعد لا تمشين ضلي

حواري : ما محظرة روحي ،باجر اردن

بركة : خوش

شالت حوراء من ايد ريحانة تبوسها وتحجي

بركة : شگد مشتاگتلهاا

حواري : أنت بذاته ،ما تجين تشوفيها

بركة : ما الي نفس اطلع

باوعت على هيوفة من گعدت وبالها ابد مو ويانة بكل زاوية جاي تصفن، تنهدت چن جابره روحها تضل وصدگ طلعت ريحانة لاحه عليها حتى تجي

الولد بعد ما طبوا علينه ضلوا بالديوانية ،عبرت الساعة هدعش بالليل وردينا للبيت يومين ضلن بنات عمي كاظم وردن

كلشي يمشي بلايه تغيير انا صار كل وكتي للدراسة من تقربن موعد الامتحانات وببالي درجات عالية

°ريحانة°

گاعده بس انا شايلة عون وافتر، شگد ما تعلم علي بس نوبات هواي ينذكر ميمنة ويبچي ،بس اريدنه يسكت گلبه منا وهو مفرفح، بچيت مأيسه منه يسكت

_ كافي ياروحي ،كافي ولك عمة گلبك راح يوگف

عون : ماما

كل ما يرددها گلبي احسنه جاي يتفطر، من سمعت صوت حركة برا فتحت باب المطبخ وطلعت بساع من شفته فقار هستوه يريد يطب للبيت

_ فقااار

باوعلي مستغرب حالي انا عيوني مغورگه وعون لهسه ما سكت

فقار : شكوو ؟

اجاني مهبوط وانا امسح بعيوني

فقار : ليش تبچون ؟

_ عون ما جاي يسكت

فقار : ليش

_ يريد امه

فقار : ميمنة ؟

_ أي ،اخذه برا بلكي يسكت

فقار : هاا

_ خوما يضل يبجي

بعد صفنه اخذه من ايدي وطلع برا لحگته اباوع من الباب ،الولد برا واگفين من شافوا فقار طلع

وعون بأيده كلهم فتحلوله ايدهم يريدونه وهو بساع ضحك وشمر روحه على صخر من بيناتنهم ،شاله يحجي وياه

صخر : شلون يبچي عون الزغيرون وعمامه يشمون الهوه

يشمره عالي ويرد يكضه وعون يضحك چن بيه شاف ميمنة ،تنهدت وانا اباوع عليهم زين من سكت ،ارتاح بالي عليه وخليت وطبيت جوا ،سويتلي لفه مال جبن بساع اكلتها گبل لا يرد يجيبه الي والتهي وياه

شگد چان حباب وي ميمنة هسة شل حالي عليها راح يصير شهرين وهو ما نساها، ساعة هيج ورداه الي فقار نايم ،اخذته من ايده وطبيت جوا نيمته على فراشه وطلعت

صحته من راد يطب للديوانية

_ فقار اسويلك عشا

اندار علي

فقار : لا ما اگدر معدتي توجعني

_ جا مو وصاك الدكتور لازم تاكل حتى لا تتقلص معدتك

فقار : من اكل اتأذه بالزايد

_ من اهد الغدا لهسه مايصير والله

فقار : سويلي ميخالف اكل

_ شتريد ؟

فقار : شي خفيف لا بهارات ولا دهن هواي

_ اعارف

طب للديوانية وانا مشيت بساع للمطبخ شويتله تكه مال دجاج وطماطه، واخذتهن اله، ضليت گاعدة يمه

فقار : شبيج تباوعيلي ؟

_ اشوفك تاكل لو لا

فقار : يعني تراقبيني ؟

هزيت رأسي ب أي ،اكل شوي وگال

فقار : شبعت

_ كمل الشيش لا ادچك بيه

فقار : ما اگدر والله، شلون اجباري يعني

_ أي اجباري ،اكل وأنت ساكت

فقار : شو عايشة الدور أنت

_ اكبر منك تتحملني وتسكت

فقار : راح اطيج على مايج لان ماعدي خلگج

_ احسن

بس خلص الشيش اخذت الصينيه ومشيت للمطبخ رتبته وانا اطلع لاگتني هيوفة تريد تطب ،كل ما جايها تذبل اكثر ،على گد السؤال والجواب تحجي من بعد بركة وامها هيوفة اكثر وحدة تأذت عليها

اخذت دولكة ماي من الثلاجة و سألتني

هيوفة : شعجب گاعدة ؟

_ گبل شوي نام عون ،بس يبچي انهد حيلي عليه

هيوفة : على ميمنة ؟

_ أي

جرت نفس

هيوفة : حگه ،شني الشافه من عمره وفگد امهاته ثنينهن

_ هذا نصيبه من الدنيا ،بس ان شاء الله نعوضه احنه

هيوفة : كل ما جاي اباوعله اشوف بيه ميمنة شگد چانت تحبه

_ چنت اگلها لو صار عدج جهال تحبينهم مثل عون تگلي لا يرحوله فدوة جهالي

هيوفة : لا ربته ولا ربت جهالها

شهكت تجر النفس مختنگه ،جريتها للسنك وفتحت البوري اغسللها وجها

هيوفة : يمةةة اختيي

دموعها وي الماي اختلطن، اكض روحي گبالها وما ابجي لان هي بلايه شي شلونها، اجه ضيرم من فوک وبس شفاها بهل سرع خطواته و وگف گبالها ،لم وجها بين اديه

ضيرم : ريشة مو كافي ،هستوج مو چنتي تبچين

هيوفة : لو شگد ما ابجي عليها ما احس روحي ارتاح والله

ضيرم : هاي صاحبة عمرج ما الومج ،بس فكري بروحج شوي

غسللها وجها مره ثانية وكضها من ايدها ومشوا يصعدون ،دعيت الله يهدي گلبها لان بدأ يبين عليها تعب الحزن الصرلها بيه اشهر، مشيت للغرفة تمددت بصف عون ،الايام تگضي وهو الحمدلله بدأ يتعلم علي اكثر ،كل واحد بينه صار ملتهي بحياته ،ومر على وفاتها اربع اشهر

وبيوم چنه گاعدين العصرية ونزلت من فوگ تسحل بروحها

نجوى : يا ربي هاي البت راح تگضي والله من الضعف

وصدگ حجي امي ،من الضعف چنها انسانه ثانية بس گعدت گالتلها

نجوى : ما تخلين ضيرم ياخذج للدكتور، وضعج كلش ما عاجبني

هيوفة : مابي شي عمة

حواري : السلام عليكم

طبت مسوية مداهمة هي وجهالها، أبتسمت وگمت اخذت حوراء من ايدها وهي نزلت سيف بالگاع

حواري : ايديي يمةةة

نجوى : جا ما خليتي احد وياج يجي

حواري : ماكو الولد طالعين وبس بركة وعمة بالبيت

نجوى : جا بركة لو جايبتها هم تطلع من الحزن العايشته شوي

گعدت يم امي

حواري : گتلها والله فلا رضت

نجوى : موزين هيج تضل ،عينج عليها يمة

حواري : لا توصيني يمة، ابد ما مخليتها والله حتى هي ملانه مني

نجوى : أي عفية احسن

عون من شاف جهال حواري كيف يلعب وياهم، لليل اجاها حق وردت ميمنة الصغيرة تبچي لان مبقيتها عد عمتها ...

°حواري°

گمت افتر بحوراء اريدنها تسكت ،عضاها سيف وخبلها علي وما سكتت الا عطت بسيف، مشرشبه ولا چنها حلگدوتها ،سيف وعطت بيه طگ من البجي هي سكتت وحرت انا بيه، طب حق مستغرب صوت بچيته

عبد الحق : شكو شبيه ؟

_ عض حوراء وعطت بيه

اطيتهياه

_ اخذ ابنك لان راح اتخيل

عبد الحق : شبيج هاده علي

_ ضل أنت وجهالك هنا وانا راح اخليلكم الغرفة واطلع

وكبل لا يحجي شردت من الغرفة ،دگيت باب الغرفة على بركة وطبيت يمها لگيت

عمة عدها وبتي بحضنها سديت الباب وگعدت يمهن

شيماء : شبيج ؟

_ شردت من ابنج وجهاله

شيماء : ابني ،شمسويلج ؟

_ ورطني بتوم

شيماء : ياا ولج التوم صاروا ورطة

_ ماعليج بحجيي انا ضايجة واخربط ،أصلا احبنهم بس لان متعبيني

رفعتلها ايدي

_ شوفي شضعفاتني صرت من الفرة وراهم

شيماء : بس يمشون تخلصين من همهم

_ والله عمة ولا متفائلة

شيماء : دخذي بتج بدليلها

_ مو بتي متنازله بيها الج

شيماء : ولج بس بدليلها

اخذتها وصعدت، بس فتحت الباب أبتسمت وانا اشوفنه متمدد بالگاع وهم يلعبون على بطنه رفع رأسه باوعلي

عبد الحق : هاا شو رديتي ؟

_ اجيت ابدل هدوم ميمنة

عبد الحق : بدليلها واطلعي رجاءا

رفعتله حاجبي وهو دار وجهه ما يريد يتبسم ويخرب الملامح الجامده ،بدلت الميمنة وعناد ضليت گاعدة على الچرباية ومادتها گبالي اللعبها، اجه گعد بصفي وحوراء وسيف ضلوا بالگاع يلعبون

عبد الحق : شگد ما چنت اگولن انا عاشگج بس اكتشفت هل كلمة ما توصف عشگي الج ،مليتي علي حياتي وكل يوم بيها صار بوجوكم أنت واحلى نعمة منج محلين حتى ايامي الثگال بعيوني

باوعتله مبتسمة واحس بگلبي يدگ صار بقوة من حجاياته

_ وانا هم احبك

جر راسي لصدره

عبد الحق : گولي عاشگتك

_ حوريتك عاشگتك

باسني من راسي و وخرني ،بايده رفع ثوبي من الصدر

عبد الحق : كل ما اشوف شامتج اتهور، استري علينه

_ يعني أنت ما متهور گبل ؟

عبد الحق : شبعت تهورات وياج

اشر على الجهال

عبد الحق : وهذولي نتائج التهور

_ اطلگك اذا صاروا اربعة

عبد الحق : اريد توم

خزرته وطفرت من مكاني

_ تحجي صدگ

عبد الحق : جا چذب

_ اتبرى منك أنت وجهالك والله

جراني من ايدي ردني لمكاني

عبد الحق : اتشاقه وياج ،هذولي كافي

_ أحلف

عبد الحق : وداعتج

_ رضيت عليك

رفعلي حاجبه

عبد الحق : يعني چنتي ما راضية

_ ابدد

عبد الحق : اراضيج

_ لا رضيت وحدي

الاراضيج مالته كلش زين اعرفها ،ما نزلت بعد لان الوكت تأخر ،ثاني يوم بدلت للجهال ونزلتهم ،سويت ريوگ وهم يفترون يمي ،التمينا على الصينية حوراء عمتي توكلها وسيف ابوه وميمنة بحضني

جعفر : حواري

رفعت راسي

_ هاا

جعفر : انصحج بعد لا تخلفين

_ أصلا هذولي وتورطت بيهم

برهان : شلون ورطة ترد الروح

اخذ سيف من حق وگام يغسل اله وياه، وانا حطيت ميمنة الصغيرة عد بركة وگمت غسلت ورديت اخذتها ماكو شي غريب بأيامنه إلى أن عرفت من حق باجر نتائج الثالث

وبس علنوهن الصبح مشيت لبيت جدي العصر انا وجهالي وصلنه حق ورد من الباب تلگتني عمة عطاء عبالي راح تسلم علي بس اخذت حوراء ودارت وجها مني

_ يااا عمةةة

صحت وراها وهي طبت ،لحگتها

_ والله زحمة خطار ما تسلمين علي

عطاء : وينج وين الخطار أنت

سلمت على عمة زهرة ،اخذت مني سيف وانا مشيت جوا اصيحن

_ وييين طالبة الاعدادية عينيي

طلعتلي من الغرفة

جفون : گدامج بشحمها ولحمها

كملت

_ وبجفونها ورموشها

جفون : أي عيني أي

بوستها اتبارك الها

_ بالعافية نجاحج

جفون : الله يعافيج ،السنة الجاية تداومين وياي

_ أن شاء الله

عطاء : اذا ما طلعت حامل

_ يااا عمةةة

عطاء : جا غير أنت كل سنة حامل

_ فلا احبل بعد وشوفون

عطاء : سمعتن شگالت

جفون : ما تحبل بعد

_ تكضنها علي مووو ؟

عطاء : أي

طلعت جدة من غرفتها

غضة : ولج عطاء خلي البت بحالها

عطاء : اشاقيها يمة

بوستها ورديت يم جفون ساعة على گعدتنة وطب حاجه جفون

نوح : گومي ترسيلي دولكتين ماي

جفون : ليش منو اجه ؟

نوح : بيت غازي

غضة : بيت غاازري ؟

عطاء : اضن مخربط بالاسم

نوح : لا جدة ،اجوي وطلبوا نستقبلهم بديوانية

غضة : وطبيهم جدك ؟

نوح : شيخ واحد وشيخ خزعل ضغطوا عليه

غضة : وراهم شي

نوح : جا مبين ،وجتهم مو خالية

گمت ورا جفون للمطبخ بساع حضرتله الماي اخذه وانا حطيت قوري الجاي على النار

_ نمشي نسمع شعدهم

جفون : نرد أيام گبل

_ أي

جفون : امشي

°ليث°

على اعصابنه مگابليهم ما نگدر نحجي ولازم ندوس على ارواحنه لان طلعنه احنه الغطانين بحقهم من شكو شي سواه مرتضى طاح براسهم

قدملهم نوح ماي واباوع على جدي شوي ويگوم يحرگ غازي الگاعد گباله

رأجس : احجوا سبب جيتكم شني

شيخ واحد : تسملعهم للأخر وبلايه اعصاب

رأجس : مبين من حجيك اليوم راح تزعلون مني

شيخ واحد : ما ينزعل منك شيخ

رأجس : تفضل احجوا

حمحم غازي وكل العيون صارت عليه ،عيونه حطهن بعيون جدي وچن بس هو گباله

غازي : من گبل چم سنة طلبتك ورديتني بس هل نوبه الخراب على اصوله يصير لو طلعت منا ما ماخذ الگاصده

رأجس : لا تهدد واحجي عدل

غازي : منك تعلمنه التهديد

شيخ واحد : سموا بسم الله بالبداية وراح تتعاركون

غازي : ما نتعارك ،انا جاي واريد منك مرة لابن چسار ...

─── ⋆⋅☆⋅⋆ ───

القفلة المنتظرة من صدگ