الجريمة المرة دي حصلت في الصعيد.. ولكن البداية كانت مع بلاغ من واحد اسمه عمران وست اسمها نرجس، وبيقولوا في البلاغ إن بنتهم هربت من البيت.. الناس دي كانت معروفه في البلد إنهم ناس غلابة جدًا وفي حالهم، وبنتهم شيرين لسه مطلقة من يومين بس، إيه السبب؟ ما حدش عارف.
الحاج عمران والست نرجس قالوا في البلاغ إنهم اتفاجئوا من يومين ببنتهم راجعة ومعاها جوزها وطلّقها قدامهم، وإنهم لما حاولوا يعرفوا إيه سبب الطلاق ده منها، فضلت ساكتة وما تكلمتش، كأنها مصدومة من اللي سمعته. ولما اتصلوا بيه وسألوه، قال: اسألوا بنتكم عملت إيه عشان أطلّقها؟ ورفض هو كمان يقول السبب!
ولكن بعدها بنتهم اختفت، اتواصلوا معاه وقال إنه ما يعرفش حاجة عنها ومش عاوز يعرف حاجة، ولكن بعد ما البلاغ بيتقدم بـ24 ساعة، بيوصل بلاغ عن جث.ة مرمية في ترعة وقريبة من البلد اللي فيها الحاج عمران والست نرجس.
الجث.ة كانت في شوال، والشوال كان مربوط كويس، ولكن عشان كان طافي على سطح الترعة، الناس طلعته، وساعتها اكتشفوا الكارثة.
عشان يبدأ التحقيق في جريمة تفاصيلها غريبة، ولما تسمعها هتعرف إن في حاجة غلط ومش مظبوطة، وإن الموضوع في سر لما يتكشف هيحل اللغز اللي موجود.
...
جثة الخدامة
الجزء الأول
طبعًا رجال الشرطة لما وصلت المكان، الشوال كان فيه جث.ة البنت في أواخر العشرينات.. واضح إن ما مرش على وفاتها كتير، وده بسبب حالة الجث.ة اللي قدامنا، واللي كانت لسه ما دخلتش أي مرحلة من مراحل التعفن أو التحلل.
كانت سليمة.. ومن اللبس والتفاصيل اتأكد رجال الشرطة إن الجث.ة دي تبقى جث.ة شيرين بنت الحاج عمران، وده طبعًا بعد ما رجعوا بلاغات التغيب الفترة الأخيرة. نفس اللبس ونفس الصورة اللي قدمها الحاج عمران ومراته عشان الشرطة تدور على بنتهم. واضح إنها اتقتلت بسك.ينة، وده بسبب الطعنات اللي موجودة في جسمها.
وطبعًا بيوصل فريق من الطب الشرعي والمعمل الجنائي عشان يتم فحص الجث.ة والمكان اللي لقيوها فيه، بس طبعًا هنا رجالة المعمل الجنائي بتأكد إن المكان ده مش مسرح الجريمة.. يعني اللي قت.لها خلّص عليها وبعدين حطها في الشوال وربطه ورماه في الترعة.
أما رجالة الطب الشرعي فكانت لسه بتفحص الجث.ة الفحص المبدئي، وعشان الموضوع سمع ووصل للبلد اللي ساكن فيها الحاج عمران ومراته، أثناء ما الفحص شغال هما وصلوا، ولكن طبعًا تم منعهم من العساكر عشان رجالة الطب الشرعي تشوف شغلها.
وبعد ما خلصنا والجث.ة اتنقلت على الطب الشرعي، اتحركنا على المكتب، وكان معانا والدها ووالدتها.. وهنا هما اتهموا طليقها اتهام رسمي إنه هو اللي قت.ل بنتهم.
وعرفنا إن طليقها ده اسمه عباس عبد الرحيم، وتم استدعاؤه للتحقيق معاه، وفي نفس الوقت بدأت رجالة البحث الجنائي تعمل تحريات عن المجني عليها شيرين عمران وعن حياتها مع جوزها قبل الطلاق.
وبعد ساعات قليلة، حضر فعلًا المدعو عباس عبد الرحيم عشان يبدأ التحقيق معاه في اتهام والد ووالدة المجني عليها شيرين عمران، وأنا اللي بدأت الكلام:
_ أستاذ عباس، الحاج عمران ومراته الست نرجس مقدمين ضدك بلاغ إنك أنت اللي قتلت بنتهم شيرين، اللي هي كانت مراتك من كام يوم وأنت طلقتها، وعلى حسب الكلام اللي قالوه إنك طلقتها بدون سبب معلن، وحتى هي رفضت تقول أي أسباب قبل ما تتقتل.. فممكن أعرف حضرتك طلقتها ليه في البداية؟ وده هيترتب عليه السؤال التاني: قتلتها ليه؟
= أكيد هي رفضت تقول لأهلها لأن السبب مخجل، أصلها هتقول إيه؟ إني دخلت عليها لقيتها مع واحد في حضنه! وعشان أنا عارف إني لو خلصت عليهم هتسجن، حتى لو في الآخر الموضوع هيتحسب جريمة شرف وهطلع منها، بس كفاية الأيام السودة اللي هقضيها في السجن بسبب واحدة زي دي. وأنا ما قتلتهاش، ولو كنت عاوز أقتلها كنت قتلتها لما دخلت ولقيتها في الوضع المخل ده، بس أنا ما عملتش كده.
_ عندك دليل على كلامك.. دليل إنها كانت بتخونك يعني؟ ولو عندك دليل، مين الشخص اللي هي كانت بتخونك معاه؟
= للأسف ما عنديش دليل، بس الشخص اللي كانت بتخوني معاه.. جوز الست اللي كانت بتخدم في البيت عندها، واسمه علاء. وأنا عارف إنكم لو استدعيتوه هنا هينكر كل حاجة، بس ده اللي حصل، وأنا فعلًا ما أعرفش عنها حاجة من ساعة ما طلقتها.
...
كلام غريب، خصوصًا إن الجريمة دي في الصعيد، ومعروف عن أهل الصعيد إن الموضوع ده بالذات خط أحمر، يعني لو راجل دخل على مراته لقاها مع واحد، هيخلّص عليهم هما الاتنين من غير تفكير. لكن واحد يفكر بالعقلانية دي.. لا، صعب!
بس كلامه دخل طرف جديد في المعادلة، والطرف ده هو واحد اسمه علاء حسين. وفهمنا من الأستاذ عباس إن مراته كانت بتخدم في البيوت، وهو كان بيشتغل حارس على مدرسة حكومي.
المهم إن بعد 24 ساعة بتظهر التحريات والمعلومات اللي كانت موجودة في ملف التحريات هتخليك تتلخبط.
عشان التحريات بتأكد بشكل جزئي إن كلام الراجل ده صح.. إزاي؟
التحريات بتقول إن المجني عليها شيرين عمران كانت بتخدم عند ست اسمها ياسمين، وجوز الست دي اسمه علاء حسين. الست ياسمين طردت شيرين من بيتها وقالت إنها هتبلغ عنها الشرطة لأنها سرقت مبلغ مالي كبير من عندها، وساعتها اللي وقف ومنع الموضوع إنه يحصل هو الأستاذ علاء، وقال إن في اليوم اللي حصلت فيه السرقة شيرين أصلًا ما جتش عندهم البيت، وكان عندها ظروف ما قدرتش بسببها تيجي، وده كان على حسب شهادة الشهود والجيران اللي كانوا حاضرين الواقعة، واللي كانت بتمثل فضيحة بالنسبة لشيرين عشان تم اتهامها إنها حرامية.
بس في واحدة من الجيران اسمها صفاء حبت تتأكد من كلام الأستاذ علاء، ورجعت الكاميرات اللي موجودة على بيتها، واتأكدت إن شيرين راحت البيت في اليوم ده وخرجت قبل ميعادها، وكانت بتتلفت حوالين نفسها.
والسؤال هنا: ليه علاء رفض إن مراته تعمل محضر، وكذب وقال إن شيرين ما جتش في اليوم ده أصلًا؟ رغم إنه المفروض يقف مع مراته في موقف زي ده، خصوصًا إن شيرين هي الإنسانة الغريبة الوحيدة اللي بتشتغل في بيتهم.
ده غير إن شهادة الجيران بتأكد إن علاء ده مش مظبوط، وإن الستات اللي حوالين مدام ياسمين انقطعوا عن زيارتها بسبب نظرات جوزها ليهم.
ورغم إن ده مجرد استنتاج، ومش معناه إن الخيانة حصلت فعلًا، أو بمعنى أصح مش معناه إن علاء كان على علاقة بشيرين.. ولكن النقطة دي لازم تتحط في عين الاعتبار.
طيب، هل في حد تاني مشتبه فيه غير طليقها والراجل اللي اسمه علاء ده؟ أيوه، فيه أخوها، واللي التحريات أثبتت إنه كان بيلعب ألعاب القمار الإلكتروني، وكذا مرة يروح عندها البيت ويحاول يستلف منها فلوس عشان هي بتشتغل عند ناس معاهم فلوس، ولكن هي في كل مرة كانت بترفض، وآخر مرة هددها إنها لو ما جابتش فلوس هيخلّص عليها.
وفي عز كل ده تيجيلنا معلومة مهمة من رجالة البحث الجنائي، إن الست ياسمين اتطلقت من علاء وسابت بيتها ورجعت على بيت أهلها. طيب، إيه السبب؟ ما حدش عارف.
وساعتها طلع إذن من النيابة باستدعاء الأستاذ علاء حسين للتحقيق معاه، ولكنه تغيب عن الاستدعاء، فطلع أمر بالقبض عليه.
ولما رجال الشرطة اتحركت على بيته عشان تقبض عليه، كان في انتظارهم صدمة كبيرة، عشان الأستاذ علاء كان مقتول ومتعلق من رقبته في السقف!
بس الصدمة الأكبر إن رجال الشرطة وهي بتفحص مسرح الجريمة لقوا آخر حاجة كان ممكن يتوقعوها، والحاجة دي هي...
0 تعليق