ليلى بتوتر : تمارا ويوسف ؟!! ده

يعني ايه 

كملت بنبره فيها وجع : يعني ...يعني اختي بتحب خطيبي!! 

لسه بتقلب في باقي المذكره سمعت صوت صابرين 

صابرين : لقيتي المفرش  يا ليلى 

ليلى اتنفضت وسابت المذكره : اه يا ماما لقيته 

==================================

قدام السنتر 

خرج يونس و مش مدي ل تمارا اي اهتمام على عكس العاده 

بقى بارد ، هادي ، غامض بعض الشئ

تمارا خدت نفس وحاولت تقرب منو تكلمه 

تمارا: يونس 

يونس بص لها و مردش 

تمارا : يونس انا بكلمك 

يونس ببرود : نعم ، خير ، عايزه تعرفي يوسف نازل النهارده مع مين ؟ ، ولا أكٓل ولا لا 

تمارا : يونس بعد اذنك اديني فرصه افهمك 

يونس : تفهميني ايه ، انا مش عايز افهم حاجه اصلا ، ولا عايز اتكلم معاكي تاني 

سابها ومشي خطوتين و رجع تاني 

يونس : بلاش اللي بتعمليه ده عشان خاطر اختك حتى 

تمارا : يا يونس انت فاهم غلط 

يونس : بلا فاهم غلط بلا فاهم صح بقى فكك مني 

تمارا : يونس ممكن تصبر وتسمعني 

يونس سابها بتتكلم ومشي ، عامل نفسه مش فارق له بس هو موجوع ، متضايق ، مخنوق بس بيحاول يتجاهلها

===============================

ساره : ما تمشي بعيد عني يا جدع انت 

علي بضحك : ليه كده يا ام نسب.

ساره : عشان مينفعش نمشي مع بعض ، مش عايزه حد يتكلم معايا  ولا عليا 

علي : قطع لسان اللي يتكلم عليكي نص كلمه 

ساره : و بعدين انت جيت هنا ليه 

علي : من حظي الحلو والله 

ساره : طب روح شوف انت رايح فين 

علي : رايح على طريق كله هنا و سعاده ان شاء الله 

ساره : ياض بطل التلزيق ده 

علي : تلزيق ؟ ، ماشي يا صرصور ليكي روقه 

هشوفك كمان ساعه يلا سلام 

وسابها و مشي من غير ما ترد 

===============================

صابرين : مالك يا ليلى 

ليلى : مفيش يا ماما 

صابرين : سرحانه ف ايه 

ليلى : ف حاجات كتير ، متلغبطه شويه 

صابرين : بصي يا ليلى انا أه مبطيقش امك بس ده نكش عادي مش كرهه زي مانتوا مفكرين 

يعلم ربنا امك دي غاليه عندي ازاي ، هي بس ساعات بتعمل تصرفات بتضايقني وبتخنقني بس عادي يعني احنا مهما كان صحاب و جيران ، و انا امك قبل ما ابقى حماتك 

وبصراحه انتي عليتي ف نظري اوي اما عرفت انك بتساعدي يوسف ، بس بلاش يا حبيبتي تسهليله كل حاجه 

خليه يتعب شويه 

ليلى : حاضر يا ماما 

صابرين : طب مالك دلوقت زعلانه ليه 

ليلى: مفيش ، ده انا تعبانه بس شويه 

صابرين : طب رني على امك كده شوفيهم أخروا كده ليه 

وانا هروح ارن على البت الزفته دي اشوفها كل ده فين 

هو يوسف راح فين اصلا 

ليلى : هو قالي أنه رايح يجيب حلويات وحاجات لزوم القعده و كده 

صابرين : حلويات ايه ، ما انا قيلاله ميجيبش حاجه انا هبعت اجيب من هنا 

ليلى ب شك : معرفش هو قالي كده 

دخلت ساره من باب الشقه وهي شايله شنط كتير 

ساره ب ابتسامه عريضه : ايه ده ، لولٌا هنا 

صابرين بعصبية: انتي كنتي فين يا مقصوفة الرقبه كل ده

ساره : في ايه يا ماما مش قدام ليلى طيب 

صابرين بعصبية : فين الزفت يوسف 

ساره : ايش عرفني انا فين يوسف ، اسألي حبيبته 

صابرين : هو قالها أنه راح يجيب حلويات من برا 

ساره : لا انا لسه جايه من برا ومشوفتوش

كملت بتوتر : احم شوفت علي اخوكي 

الباب خبط »»

صابرين : قومي افتحي يا مقصوفه 

ساره : ما تناديني ب اسمي يا امي ، سمتيني ساره ليه لما انتي هتقوليلي مقصوفه ، وبعدين انا لحقت دخلت حتى 

صابرين : اقعدي برطمي و سيبي اللي على الباب 

صوت خبط الباب ابتدى يعلى 

يوسف دخل بعصبية 

يوسف : ايه يا بت ام البرود اللي انتي فيه ده 

صابرين : ياض مش انا قولتلك أن انا هبعت اجيب الحلويات من هنا 

يوسف : اه مانا اما  افتكرت مجيبتش و رجعت 

ليلى : اومال كل ده كنت فين 

يوسف : كنت بشوف واحد صاحبي كده و الكلام خدنا 

ليلى ب شك : امم ماشي 

يوسف : طب ايه هو الجماعه اخروا كده ليه 

صابرين : هروح ارن عليهم تاني من جوا ع الارضي ، يمكن التليفونات عاملينها صامت 

يوسف : ايه يا صرصور مفيش حاجه تساعدي بيها ماما 

ساره فهمت أنه عايز يمشيها: لا مفيش 

يوسف : ظبطي السفره كده 

ساره ب سماجه : مظبوطه 

يوسف : طب غوري اعمليلي شاي 

ساره بخنقه : هوووف ، عايز تقومني وخلاص ، والله ل اعملك الشاي وحش 

ودخلت المطبخ وسابتهم 

يوسف : سرحانه ف ايي يا لولي 

ليلى : حبيت حد قبلي يا يوسف ؟

يوسف باستغراب: هو انا حبيت غيرك اصلا عشان يبقى قبلك ولا بعدك 

ليلى : انا مش بهزر يا يوسف 

يوسف : ولا انا بهزر ، وبعدين ايه السؤال الغريب ده 

ليلى : عادي سؤال جه ف بالي 

يوسف باستغراب: فجاه كده ؟! 

ليلى : اه 

يوسف : طب فيه حاجه عايز اخد رأيك فيها 

ليلى : ايه هي 

يوسف : انا شوفت شقه كويسه جدا ف مكان حلو برا الحاره نهائي 

ليلى : طب حلو اوي ، وعملت ايه 

يوسف : مش ده اللي عايز احكيهولك بالظبط 

ليلى  بتوتر : اومال ايه 

يوسف : الشقه دي عشان اجيبها محتاج فلوس كتير اوي 

ف انا جالي فرصة سفر ايه رايك اسافر و اكون المبلغ ونجيب بيه الشقه 

ليلى : هتسافر فين بقى ان شاء الله 

يوسف : هسافر الامارات 

ليلى : ومين اللي جابلك الشغل ده بقى ، دينا ؟؟ 

يوسف : احم ، اه هي 

ليلى : مفيش سفر يا يوسف 

يوسف بنبره جاده: هو ايه اللي مفيش سفر يا ليلى ،هو انتي مش واخده بالك من اللي احنا فيه، طب فلوس الدهب انتي قدرتي تدبريها طب الشقه هنعمل ايه فيها 

ليلى : نقعد ف ايجار معنديش مشكله ، انت لو مش معاك فلوس الايجار هبقى ادفعها انا لكن سفر لا وبالذات لو حاجه  تخص دينا دي عشان مش برتاحلها 

صابرين خرجت من الاوضه: وصلوا، انزل يا يوسف هاتهم من تحت 

يوسف بص ل ليلى  : هنتكلم ف الحوار ده بعدين 

===============================

دخلت تمارا و مراد و هند ، سلموا على اللي موجودين 

دخلوا و قعدوا 

تمارا دخلت لاحظت أن يونس لسه مجاش 

صابرين : منور يا حج انت والحجه 

هند : الله يخليكي 

صابرين : بنتكم بقت بنتي خلاص ، ولو يعني فيه حاجه مزعله الحجه ف احنا عزمناكم هنا النهارده عشان نبقى صافيين وتطمنوا على بنتكم معانا 

هند : لا يا حجه دي مشاكل جر شكل كده مش حاجه كبيره يعني ، وانا لو خايفه على بنتي معاكوا مكنتش وافقت انها تتخطب ل يوسف 

صابرين : ده العشم بردو يا حجه 

مراد : ربنا يتمم فرحتهم على خير 

يوسف : يلا يا حجه حطيي الأكل ، متقلقيش انا قاعد معاهم هقعد احكيلهم انجازات الشغل بتاعتي انا وليلي 

ساره ب لماضه: طب متحكيش بضمير عشان مياخدش عنك فكره وحشه ولا الجوازه تتفركش 

دخلت المطبخ تساعد صابرين ف حط الاكل 

يوسف بيحكي المواقف اللي بتحصله في الشغل و التريقه اللي بياخدها هو و ليلى بسبب اساميهم 

كله عمال يضحك على طريقته و المواقف بتاعتهم 

وليلى مركزه مع حاجه واحده بس ، و هي تمارا، بتراقب نظرات تمارا ل يوسف 

يوسف لاحظ صمت ليلى 

يوسف : ولا ايه يا ليلى 

ليلى مخدتش بالها هو كان بيتكلم ف ايه : نعم !! 

يوسف : مش حصل الكلام ده ؟ 

ليلى ردت عليه من غير ما تسمع اصلا هو كان بيقول ايه 

ليلى : اه حصل 

صابرين : يلا يا جماعه عشان نتغدى 

اومال علي راح فين 

هند : بيتكلم ف التليفون برا 

صابرين : روحي نادي عليه يا ساره و حطي الاكل ده للقطط و رني على يونس شوفيه فين كل ده 

=============================

خرجت ساره عشان تناديه ، كان بيكلم صاحبه بس خد باله أنها وراه 

علي بتمثيل : ايه يا روح قلبي عامله ايه 

زين صاحبه : روح قلبك ازاي يعني ، يسطا بقولك عايز الموتسيكل اروح بيه مشوار 

علي : طبعا يا قمر ، اللي انتي عايزاه، هعدي عليكي بالليل و اجيبلك اللي انتي عايزاه

زين ب شك : انت فيه حد جمبك ياض ولا ايه 

علي عمل نفسه بيبص حواليه و متفاجئ بيها : اه طب هقفل انا دلوقت و هكملك تاني يا عمري ، سلام 

ساره بصتله بقرف: الاكل اتحط.

علي : وانتي بتقولهالي كده ليه 

ساره بصتله بقرف وكملت بتريقه: اومال اقولك الاكل اتحط يا روحي ؟!! 

سابته و دخلت وهي بتبرطم 

وهو واقف مبسوط أنه قدر يضايقها 

================================ 

صابرين : مبتاكليش ليه يا ليلى 

ليلى : باكل اهو 

يوسف : الحمد لله يا عمي انا دبرت المبلغ بتاع الشبكه و ان شاء الله نروح بكره 

مراد : انت لحقت يا ابني 

يوسف : ده انا تعبت عما عرفت اجمعهم بس كله يهون لاجل عيون ليلى 

يوسف لاحظ انها متضايقه 

يوسف : مالك يا ليلى 

ليلى : انا عايزه اطلع اشم هوا برا عشان نفسي اتكتم 

صابرين : طيب يا حبيبتي تعالي اقعدي ف البلكونه ، يمكن عشان دخان الاكل ملى الشقه 

ليلى قامت من على الكرسي : هقف برا ٥ دقايق 

يوسف : طيب ، هجيبلك كوباية عصير كده تروق على قلبك واجي وراكي 

==============================

يونس دخل من باب البيت ، شاف ليلى واقفه قدام باب الشقه 

يونس : ازيك يا لولا عامله ايه 

ليلى : الحمد لله يا يونس ، انت عامل ايه 

يونس : كويس الحمد لله ، ايه مش ناويه تذاكريلنا فيزيا 

ده انا عندي شامل والله 

ليلى : عنيا طبعا،بعد  بكره هخلص شغل و ارن عليك تجيلنا هذاكرلك انت وتمارا 

يونس ب توتر : لا انا عايز اذاكر لوحدي ، قصدي يعني ان تمارا شاطره وانا مبفهمش وهي قاعده معايا 

ليلى : طيب تعالى بعد بكره ، عشان بكره هنجيب الدهب ف اجازه للكل بقى ، وهات ساره معاك 

على الاقل نلاقي حد ياكل دماغ تمارا بدل ما تيجي هي تاكل دماغنا 

يونس : ايه ده ؟؟ ، انا شامم ريحة اكل ، انتوا كلتوا من غيري ولا ايه 

ليلى ب ابتسامه : لا ده انا قومت بدري حبه ، روح الحقهم 

يونس : معلش يا لولا الاكل اهم من الشامل 

==============

« دخل يونس ، وفضل مكمل على أن تمارا لا تعنيله شئ ، مبصلهاش، متكلمش معاها ، دخل سلم على الكل » 

يونس : تاكلوا كده من غيري ، هروح أغير بسرعه و اجي 

صابرين : انت اللي أخرت ، كنت فين كل ده 

يونس : هكون فين يا امي ، في الدرس و خلصت روحت النادي وجيت اهو 

صابرين : طب غير و تعالى 

تمارا فضلت بصاله يمكن يبصلها بس هو عمل نفس مش واخد باله 

« دخل يونس اوضته عشان يغير ، لاحظ أن دفتر مذكراته برا الدرج و مش في مكانه » 

يونس : ايه ده ؟؟ ، ايه اللي جابه هنا 

يونس اتوتر اكتر ل أحسن يكون حد شافه أو قراه.

=======================

يوسف طلع ل ليلى ب كوباية عصير

يوسف : في ايه يا ليلى مالك كده ؟؟

ليلى ببرود : مفيش حاجه 

يوسف : كل ده و مفيش حاجه 

ليلى : عايزني اقولك ايه يعني يا يوسف 

يوسف : تقوليلي ايه اللي مضايقك ف حوار السفر ده، انا مش شايف فيه اي حاجه 

ليلى : عايز تسيبني وتسافر وتقولي مفيش حاجه 

يوسف : يا بنتي فكري فيها, شوفي احنا محتاجين فلوس قد ايه ، وانا لو قعدت اشتغل هنا ١٠ سنين كمان مش هعرف اجمع المبلغ ، احنا محتاجين فلوس كتير اوي 

وانتي شايفه أن الفلوس بتروح ف الخصم و المواصلات والأكل يادوب وبنستلف اخر الشهر 

ليلى : يعني انت شايف  سفرك هو الحل 

يوسف بجديه: اه طبعا هو الحل 

ليلى : حل ازاي بقى ان شاء الله، مانت تقدر تشتغل هنا عادي 

يوسف : عادي ازاي بقى ، وبعدين هناك هاخد مرتب حلو اوي مش هيتخصم ، لما اعمل شغل زياده هاخد فلوس عليه 

الاكل عليهم و السكن ، يعني أنا اشتغل بس واخد مقابل 

هاجي من هناك بقى اجيب الشقه ، واجيب موتوسيكل اروح بيه الشغل و اوفر فلوس المواصلات  ليكي وللبيت 

ليلى : ده كلام انت بتضحك بيه على نفسك عشان تسافر 

ولا وياريت جت على كده بس ، لأ، و منقي اكتر واحده بكرهها وتقولي هي اللي جيبالي الشغلانه، ملقتش غير دي وتشتغل معاها 

يوسف : هو انا بقولك هتجوزها ، بقولك انا هشتغل،هشتغل 

ليلى بجديه: وانا بقولك مش هتسافر يا يوسف 

يوسف: لا هسافر يا ليلى ، لازم اسافر ، و اهي فرصه عشان تشوفي انا هعمل عشانك حاجه ولا لا 

ليلى بجديه اكتر : مش هتساافر يا يوسف ، اشتغل هنا اي حاجه وانا هرضى بقليلك لكن انك تسافر لا وبالذات مع دي، دي مش بتبقى محترماني وانا قاعده هتحترمني وانا مش موجوده 

يوسف : يا بنتي ، يا بنتي افهمي مفيش حاجه بيننا غير اللي قولتهوووووولك، شغل و بس ، وانا مش صغير عشان لما هي تقرب مني ممنعهاش 

« تليفونه رن » 

ليلى : رد شوف مين 

يوسف : مش مهم ، احنا بنتكلم 

ليلى : لا رد وافتح الاسبيكر 

يوسف ب جديه : هو فين ايه يا ليلى 

ليلى بجمود: رد يا يوسف وافتح الاسبيكر 

يوسف رد ، ليلى خدت منو التليفون وفتحت الاسبيكر 

يوسف بتوتر : احم ، الو 

= ايه يا روحي ، سايبني كل ده و مردتش عليا !!! 

ليلى بصتله بصدمه !!!